Drim òr (14/04), tàm Hìu lơh broă Đảng Dà lơgar, Tổng Ƀí thư ồng Tô Lâm, Lam bồ Mpồl Sồr lơh đơng lam pơrjum dơ̆ 3 Mpồl Sồr lơh Dà lơgar bè tơn jơh Jơnau lơh nền tàm pơrjum sồ 18 ngai 25/10/2017 bơh Mpồl Duh broă Đảng Dà lơgar khoă 12 bàr pe broă bè pơn jat tai tam gơl pa, rơndăp tăp sèng mpồl lơh broă bơh ală anih lơh broă cíñ trị tơrmù di pal, lơh broă gơtùi, geh cồng nha nàng cribơyai, ring bal broă rơndăp lơh bơh Mpồl Sồr lơh dê bè broă lơh jat rơndăp tăp sèng, tơmut bal mpồl lơh broă sră nggal gơnoar atbồ kấp càr, kấp sàh mờ bơt bơtàu ală anih lơh broă cíñ trị 2 kấp tàm ală ƀòn lơgar.

 Đơs pơndŭt dar pơrjum, Tổng Ƀí thư ồng Tô Lâm đơs nền tus tơngai tŭ do dơ̆ lơh broă bè tơrmù di pal mpồl lơh broă ală anih lơh broă cíñ trị geh uă ngan ală rơnàng làng bol mờ mpồl bơtiàn ală lơgar cih dờp jờng rơ uă mờ do ngan là mờng chài rơ̆ ru kwơ ngan nàng bol he in lam lơh jrô ơnàng làm uă rlau tai broă lơh bè tơrmù di pal mpồl lơh broă jat di nùs nhơm tàm Pơrjum Dà lơgar dơ̆ 11 pa do. Bè kơnòl broă tàm tơngai tus, Tồng Ƀí thư đơs sùm broă lơh gam uă ngan, ơnàng ngan bơh Dà lơgar tus ală ƀòn lơgar mờ geh ală bơta gơrềng bal niam mờ bal gơ̆p den tàng Tổng Ƀí thư đơs là broă rcang lài pơgồp bal tài nùs nhơm bal là bơta kwơ màng ngan; tàm hơ̆ geh mpồl broă lơh lơh sir sră nggal geh gơrềng adat boh lam, bè broă tam gơl Sơnoa boh lam, broă tam gơl lơh sir kơrnoat adat boh lam, lơh sir ală jơnau cih bơh Đảng dê pal lòt lài 1 cơnđoà nàng kờñ lơh geh kơrnoat boh lam kơ̆ kơl jăp ai broă bơyai lơh jat geh lơh sùm mờ geh cồng nha.