Kuât pơlê Ia Gri, cheăm Biển Hồ krâm kuăn pơlê ƀă tómối, idrâp chêng pu hung pu hung, hlối tâng tá idrâp mâu prôa dêi kuăn ngo xua pôa Rơchăm Chốt tôu, lo ing pơlê Mrông Yố, cheăm Ia Phí, kong pơlê Gia Lai, phiu ro tối:
"Á troh akố djâ dêi prôa têng nêng, môi túa prôa hdroâng kuăn ngo, vâ veăng hơniâp ro, mơđah ăm vâi krâ-nhŏng o ƀă tơmối châ hmâng. Tơdroăng ki pro á tâ hơniâp ro tâ nếo cho châ hlo hngêi trá xŏn hiăng pro klêi rơtế ƀă mơngiơk reăng mâ hâi ki lĕm".
Ƀă nâ Mơ Ly, lo ing Đức Cơ, kong pơlê Gia Lai, kố cho rôh vâ nâ châ veăng hơdruê, rơtế ƀă rêm ngế mot tung tơdroăng ƀă tối tơdroăng ki hơniâp ro tung hâi mơdĭng.
“Á sôk ro xua châ veăng hơdruê môi ƀai hơdruê ‘na Tây Nguyên, pơ-eăng ‘na Đảng. A xuân sôk ro xua châ cheăm Biển Hồ pro hlâu krếo veăng leh Festival tŏn chêng koăng hơnăm kố. Reăng mâ hâi kong lĕm ‘nâng, á vâ krếo vâi troh akố vâ ngăn hâi mơdĭng”.
Kuăn mơngế ki 'nâ troh a Chư Đang Ya xua vâ ngăn ki lĕm dêi reăng mâ hâi kong, ai ngế ki 'nâ vâ tăng 'nâi mâu tơdroăng mơhno túa lĕm tro, xuân ai ngế ki 'nâ bu vâ ngăn mâu tơdroăng ki hdrối nah bu 'nâi ing um. Nâ Y Nư lo ing Kon Tum (ton) hiăng rĕng troh a Chư Đang Ya hdrối chôu po leh mơdĭng. Nâ tối, mâu tơdroăng 'na mơdĭng hiăng hlo tơbleăng tung lâp măng pơlê pơla ƀă kơ koan chêh hlá tơbeăng hiăng mơhnhôk tơdroăng ki rơhêng vâ 'nâi plĕng, pro nâ rơhêng vâ troh ngăn.
"Kố cho roh apoăng á troh ƀă Chư Đang Ya. Hlo vâi tơbleăng tung măng akố ai leh mơdĭng hơniâp ro mê á xuân rơhêng vâ troh vâ hơ'lêh tơdroăng. Á rơhêng vâ ngăn mâu tơdroăng leh mơdĭng, hmâng rơngê, ting ting, ngăn vâi tĕn hmôu ƀă ngăn mâu tíu mơđah tơbleăng akố."
La ƀă nâ Lan, leh mơdĭng reăng mâ hâi kong ƀă chêng koăng Chư Đang Ya cho môi tơdroăng ki phá tơ-ê méluâ hiăng ai hâi khế rêh ối a Gia Lai.
"Á rêh ối a Gia Lai châ 5 hơnăm la kố cho roh apoăng á châ veăng leh mơdĭng reăng mâ hâi kong, leh mơdĭng chêng koăng Chư Đang Ya. Á hâk vâ khât. Malối, reăng mâ hâi kong hên 'nâng, pro chiâng tơdroăng ki lĕm ro khât. Tâng ngế ki lâi tá hâi troh leh mơdĭng reăng mâ hâi kong mê thế mơnúa troh ngăn akố môi hdroh hôu".
Ôh tá xê to mơhnhôk mâu ngế ki troh lăm ngăn, châ tâ, châ hlo, Festival chêng koăng ƀă Măng tĭng reăng mâ hâi kong - Ngo on Chư Đang Ya ối châ tơdroăng ki tơmâng khât ngăn mâu ngế ki pêi cheăng 'na ôm hyô. Troh a Chư Đang Ya tung rơnó leh mơdĭng hơnăm 2026, jâ Phan Thị Thu Minh, Kăn pơkuâ môi kŏng ti ôm hyô a Hà Nội, tối ăm 'nâi:
"Drêng troh leh mơdĭng reăng mâ hâi kong hơnăm 2026, á troh akố vâ lăm ngăn. Á xuân pói tơngah tiah kố, tung hơnăm kố, ƀă tơdroăng tơ'mot mâu kong pơlê, leh mơdĭng reăng mâ hâi kong kô ăm hlo hên tơdroăng ki ro ăm tơmối drêng troh ƀă ôm hyô Gia Lai."
Tung rơxông xúa kŏng ngê̆ kơxô̆, rêm ngế tơmối ối chiâng môi ngế ki hơ'muăn tối 'na tíu troh. Môi um méa ki lĕm, môi tơdroăng video chêh xo klêi kơ'nâi rôh lăm troh pơrá kum um méa Gia Lai troh ƀă hên ngế tâ. Pôa Đức, môi ngế tiktoker lo ing Đức Cơ, tối:
“Hâi kố pin troh akố ƀă tơdroăng cho mơngế ki mơjiâng tơdroăng chêh 'na kơxô̆, vâ mơnúa ngăn ƀă veăng hơniâp ro leh mơdĭng. Pin hlo rêm ngế veăng kơhnâ khât, rơtế troh check-in, chôu vế mâu tơdroăng ki lĕm klêi mê mơ'no tung măng pơlê pơla vâ vâi pú tung tơnêi têa ƀă lâp plâi tơnêi châ ngăn ki lĕm dêi Gia Lai. Pin rơhêng vâ xúa kơmăi dêi tơná vâ rêm ngế hlo Gia Lai lĕm troh lâi".
Sap ing Festival chêng koăng troh măng tĭng reăng mâ hâi kong- Ngo on Chư Đang Ya, Gia Lai dế ai tơ’nôm rôh hơ’muăn dêi tơná ƀă ki kơnía krê xêh. Ƀă rêm ngế troh akố, rêm um méa châ xup xo, rêm tơdroăng hơ’muăn châ tối ăm dêi rơpó xuân chiâng môi tơdroăng tơdjêp djâ tơdroăng ki lĕm dêi kơpong tơnêi kố troh achê tâ ƀă tơmối.