A ƀuôn Kram, cheăm Ea Ktur, kong pơlê Dak Lak, kâu lăk ƀô̆ tŏn chêng koăng hiăng mơjiâng sap ing hên hơnăm kố. Klêi kơ'nâi 'mot tơkŭm thôn, pơlê a khế 6 kố nah, kơxô̆ mơngế mâu kâu lăk ƀô̆ tâk hên, tơdroăng cheăng châ pơtối rak vế. Ngoh Y Yôp Knul, ngế ki cheăng tung kâu lăk ƀô̆ tối, pakĭng chêng Rơđế rêm túa, mâu vâi pú hơnăm ối nếo ối xúa chêng arap dêi mơngế Jarai, kô̆ng riâ, rơvŏng hlŭm ƀă hên mâu prôa ki ê.
"Khu prôa mê đi đo ai tung pơlê, tơdroăng hriâm mê hâi ki lâi xuân châ pơtối hriâm. Peăng pin mê dế ai kâu lăk ƀô̆ hnê tôu chêng koăng tung pơlê, nah cho bu môi pơlê tê, khu nhŏng o ki ôí tung khu hiăng châ lối 30 ngế, klêi kơ'nâi 'mot tơkŭm mê kơxô̆ ki mê tâk hên tâ châ péa xôh, thăm rế hên tâ mê nếo, tá mâu chêng koăng, prôa, rơvŏng hlŭm, tá tơdroăng kơhnhon xuăng, tối tơdjuôm tâi tâng mâu leh mơdĭng lơ cho mâu tơdroăng ki vâi krâ-nhŏng o lăm mơđah mê ai pơrá ai kơdrâm mơngế kơhnâ veăng pêi pro".
A peăng mâ hâi lo kong pơlê Dak Lak, hdrối vâ tơmot chiâng môi, kong pơlê Phú Yên ai lối 20 kâu lăk ƀô̆ tuồng, hơdruê ƀai chòi ƀă đờn ca tài tử. Mâu tơdroăng mơhno túa lĕm tro xuân châ mâu khu tơrŭm Đoân, Hô̆i 'mot tung tơdroăng trâm mâ, tơ'noăng vâ tơ'mot droh rơtăm.
Klêi kơ'nâi 'mot tơkŭm ƀă rah xo bro lế lĕm tro tíu pêi cheăng, khôi túa lĕm tro kơpong têa kơxĭ mê ai hên đoân viên droh rơtăm tơtrŏng pơtâp ƀă mơhno, malối cho tung mâu tơdroăng trâm mâ tơpui tơno, tơ'noăng râ kong pơlê.
Ngoh Phạm Ngọc Toàn, Kăn pơkuâ hnê ngăn Đoân Droh rơtăm cheăm Tuy An Tây, kong pơlê Dak Lak tối ăm 'nâi, mâu khu tơrŭm Đoân, Hô̆i a pơlê pơtối rak vế mâu tơdroăng tơ'noăng rơngê ting ting, pakĭng mâu tơdroăng hnê tối hơdruê pơ-eăng ‘na kăch măng, pro tơ'nôm rôh vâ droh rơtăm tăng 'nâi khôi túa lĕm tro.
"Tung pơla achê kố mâu rôh tơ'noăng châ mâu râ khu tơkŭm po đi đo, tung mê, pakĭng hnê tối mâu ƀai hơdruê pơ-eăng ‘na kăch măng mê mâu rôh tơ'noăng hơdruê xuăng xuân châ mâu khu, rêm râ a pơlê cheăm tơkŭm po đi đo ƀă ing mê vâ ăm mâu vâi pú rak vế mâu khôi túa lĕm tro dêi mơngế Việt Nam"
Tơdroăng cheăng dêi khu droh rơtăm hơdruê, rơngêi, ting ting hiăng châ rak vế hên hơnăm hdrối a Dak Lak. Krê hơnăm 2024, tơ'noăng râ kong pơlê mơhnhôk vâ chê 200 ngế hơdruê, rơngêi, ting ting, kơhnhon xuăng cho mâu đoân viên droh rơtăm lo ing 13 tíu pêi cheăng râ tơring, ƀă 26 tơdroăng hơdruê. Hơnăm 2025, xua 'mâi xing xoăng, tơkŭm tíu pêi cheăng, tơdroăng tơ'noăng ôh tá châ tơkŭm po.
Troh khế 10 hơnăm kố, tung tơdroăng pêi pro mâu tơdroăng leh tơbâ 70 hơnăm Hâi mơjiâng khu droh rơtăm Việt Nam, Khu pơkuâ ngăn Đoân Droh rơtăm Dak Lak tơkŭm po nếo tơdroăng tơ'noăng, pro roh vâ mâu droh rơtăm mâu kơpong trâm mâ, tơbleăng khôi túa lĕm tro tiô khôi hmâ.
Ngoh Y Lê Pas Tơr, Kăn phŏ pơkuâ hnê ngăn cheăng Đoân Droh rơtăm kong pơlê Dak Lak tối tiah kố, tơdroăng ki tơkŭm po nếo roh tơ'noăng klêi kơ'nâi tơmot chiâng môi kong pơlê pơtối pro rôh ki tơ'lêi hlâu vâ mâu kâu lăk ƀô̆, khu tơrŭm mơhno túa lĕm tro droh rơtăm trâm mâ, hriâm ƀối ƀă tơbleăng mâu tơdroăng ki phá tơ-ê dêi kong pơlê tơná. Kố xuân cho môi tung mâu tơdroăng ki châ Khu pơkuâ ngăn Đoân Droh rơtăm kong pơlê Dak Lak rak vế vâ mơhnhôk mâu ngế hơnăm ối nếo veăng rak vế khôi túa lĕm tro.
"Ngin pói tơngah kô ai hên tơdroăng ki mơhnhôk hên tâ nếo, xuân môi tiah cho pro tíu ki xah hêi, tíu ki vâ ăm mâu vâi pú, mâu kâu lăk ƀô̆ mơhno dêi tơdroăng ki rơkê plĕng 'na ngê̆ thuât xuân môi tiah tơdroăng ki rơkê dêi tơná. Tơdrêng amê hlối tơbleăng, mơđah tơbleăng châ khôi túa lĕm tro ki má môi dêi hdroâng kuăn ngo tơná troh ƀă kơdrâm kơdrĕng vâi pú tung lâp kong pơlê".
Ôh tá xê to ai tơ'nôm rôh trâm mâ, ing rêm rôh pơtâp, mơđah, mâu ngế hơnăm ối nếo a Dak Lak xuân ai tơ'nôm rôh vâ hlê plĕng ƀă tơrŭm ƀă khôi túa dêi hdroâng kuăn ngo tơná. Tơdroăng ki veăng dêi droh rơtăm tung mâu kâu lăk ƀô̆, khu hơdruê xuăng a pơlê cheăm kô veăng kum rak vế mâu tơdrá rơngê ting ting, idrâp chêng koăng ƀă mâu prôa tiô khôi vâi krâ nah tung tơdroăng rêh ối pơlê pơla.