Dôk hlăm krah ƀuôn prŏng Gia Nghĩa, să Dak Nia mâo čar Dak Nông mjing anôk hiu čhưn ênguê yang ƀuôn mơ̆ng mnuih ƀuôn sang djuê ana Mnông Mạ; kriê pioh mđĭ bi lar knhuah gru čing čhar djuê ana pô msĕ si tông čing čhar, kơrŭ wĭt dŭm knăm mơak. Să mâo mkŏ mjing leh ƀuôn pơ̆k mñam, lehanăn hrĭ mñam, êpul hgŭm knă kpiê čeh... Mjing leh lu mta mnơ̆ng pioh kơ bruă hiu čhưn ênguê. Đru tŭ jing hlăm bruă anei mơ̆ng phung êdam êra hŏng djăp bruă ba anăp kyua klei hdĭp yang ƀuôn, bi hgŭm kriê pioh knhuah gru dhar kreh, bi mdoh wăl hdĭp mda, răng kriê kơ ƀuôn sang mdah mda, doh siam nanao. Mơ̆ng dŭm bruă êdam ara, mâo leh lu phung êdam êra mâo klei myun dưi mŭt Đảng. Đảng viên mda asei H’Don, K’iăng khua bruă êdam êra să Dak Nia, brei thâo. Hŏng bruă klam jing k’iăng khua bruă êdam êra să snăn kâo mâo nanao ai tiê hur har, hriăm lehanăn tui gưt knhuah mngač Hồ Chí Minh hlăm bruă knuă. Kâo lŏ dơ̆ng hâo hưn, kơ dŭm phung êdam êra mkăn ktưn čiăng dưi jing đảng viên msĕ si kâo mơh.

Bi đảng viên mda asei Đỗ Thị Hạnh, knuă druh adŭ bruă să Dak Nia, lač:  Dưn yua jih hdră êlan “đảng viên nao êlâo, ƀuôn sang hlue tluôn”, kâo gĭr ktưn ngă klei bi hmô jăk nanao, hlue gưt jih hdră mtrŭn mơ̆ng anôk bruă, mtă mtrŭn mơ̆ng hdră bhiăn, lehanăn hlăm knhuah kâo hdĭp grăp hrue. Mbĭt hŏng anăn, hlăm dŭm klei bi kƀĭn êpul bruă Đảng, kâo mâo nanao mơh klei akâo, bi êdah kơ hdră êlan čiăng ngă bruă đru kơ jih jang bruă srăng ngă hlăm mlan tinăp”.

Lê Đình Cường, Khua bruă Đảng să Dak Nia, brei thâo, bruă Đảng să ară anei mâo 217 čô đảng viên bi mguôp hlăm 20 êpul bruă Đảng. Ƀuh klă bruă klam mơ̆ng sa čô đảng viên hlăm bruă duh mkra ala ƀuôn, să mđing nanao bruă bi mŭt hlăm Đảng, boh nik hŏng krĭng mnuih djuê ƀiă. Hlăm mkrah thŭn anei, Bruă Đảng să mâo bi mŭt leh truh 3 čô đảng viên mrâo, hlăm anăn mâo 2 čô mnuih djuê ƀiă. Ară anei êpul bruă Đảng să hlăk dôk mprăp lŏ bi mŭt sa čô 1 đảng viên mnuih djuê ama Mạ. Lê Đình Cường, Khua bruă Đảng să Dak Nia, lač:Phung đảng viên mda asei mâo mjuăt bi hriăm kjăp hriăm leh gưl prŏng, lehanăn ară anei mâo bruă Đảng să mjing djăp klei găl kơ digơ̆ mâo nao hriăm dŭm boh adŭ mjuăt bi hriăm kơ kđi čar, mơ̆ng anăn digơ̆ dưn yua jih ai tiê uêñ klam pô ngă jăk bi leh bruă kčah jao. Mâo bruă Đảng să mđĭ bi mŭt đảng viên, boh nik mŭt hlăm Đảng hŏng krĭng mnuih djuê ƀiă. Leh anăn hlăm wưng tinăp srăng mâo dŭm hdră kčah bi sĭt bruă bi mŭt đảng, jao kơ dŭm êpul bruă Đảng mâo bruă klam hlăm grăp êpul pô lehanăn anăn hlăm alŭ wăl pô.

Mđĭ hĭn klei Đảng kiă kriê, mđing bi mŭt đảng viên hlăm krĭng mnuih djuê ƀiă, mâo đru mguôp leh sa kdrêč kơ să Dak Nia bi leh bruă mkŏ mkra krĭng ƀuông sang mrâo mơ̆ng thŭn 2018, Bruă Đảng, bruă sang čư̆ êa alŭ wăl mbĭt hŏng mnuih ƀuôn sang hlăk bi ktưn mđĭ kyar bruă duh mkra ala ƀuôn, kñăm mđĭ ênoh mâo ba wĭt kah knar kơ grăp čô mnuih hlăm sa thŭn êbeh 60 êklăk prăk, lehanăn 2025 să amâo lŏ mâo gŏ êsei ƀun ôh./.