Chêix ntux yiêz muk jok Bon ndis shuôk ju lix côngv thôngx

Muk jok Bon, sơưr đơưk zuôr muk tâu trơưk txox cêr ntêr 40 ntâuk cêik cêr txix huyện Quỳnh Nhai muk, lok sik chêix fuôx gox txix tuk qox Pá Uôn ndê trâu zar hâur đêx đas, txos trâu ntơưv tsênhv qơư huyện kuz sêiz shuôk têx tox trôngz hẩu rpêk jông jav, pak đêx lox đar…Kriz uô kror liv lok du lịch, paz muôx nzir phênhv sâu trâu pêx xênhv, ntâu shông đhâu, huyện, xar tưz hêik, paz pox nhuôs têx jêx jok kho đuô têx vax tsêr, cxiv uô qơư nox hâuk, nhoz so trâu tsôngv kruô du lịch. Shông 2018, HTX Du lịch côngv thôngx jok Bon tâu yênhx lix, xuz thơưx muôx 10 ziv chuôz zis cxaz chuôz. Chor thành viên HTX tâu huyện paz chiê muk ndis shuôk, cơưv shâuv tsưr ziv uô du lịch côngv thôngx hâur thiêz đrâuv tỉnh, cơưv shâuv lok tsưr ziv sik thav, tok kruô, tsưr ziv uô qơư nhoz pư, uô têx zav nox mênhx cxưx. Tix lâus Đinh Văn Vỉnh, hôiv viên hêik: shông 2019, tsuôk ciês tix lâus ziv chuôz zis tưz tok xar muôx 200 lênhx kruô tuôx nox hâuk, nhoz so ntơưv tsêr, hâur co muôx kruô hâur têz qơưk thiêz kruô ntiêx têz:“Cur chuôz zis uô du lịch cộng thôngx tâu 3 shông lơưv. Kruô tuôx ndis shuôk, du lịch xar nox đaz tsi mak pêz uô trâu tsôngv kruô nox têx zav nox co. Sik phênhv ntâu mak tsôngv kruô lok six nhiêv nox têx zav nox mênhx cxưx Thái li grêix njêl cxiêz, kêiz tsơưk đros hmôngr cxur, cxuô zav jâuz ntông, njuôs, nxuôz đêx…têx zav nox no mak tsôngv kruô puôr lênhx kruôk tiêk kaz”.

Jok Bon muôx 152 ziv chuôz zis puôr lênhx zos tsôngv box Thái đơưz uô nênhx nhoz. Muk du lịch jok Bon, đrâuv tâu nhoz so hâur têx tsêr lơưx cxôngx nzor, đa đêr sor Bó Ún, tsôngv kruô tsênhv tâu đros ciês pêx xênhv ntơưv tiv phaz uô têx zav nox, thiêz nox têx zav nox mênhx cxưx, nriêr pâuz tsôngv box têx txux lov muôx hâur têx zav nox, xêir zuôr têx zav huv trâu zuk chor nênhs cxênhz jê, fôngx zưs zos têx hax huv uô txix shông ntơưv tiv phaz. Zos chuôz zis tưs muôx chôngz lênhx nênhs tuôx nhoz so, chor hôiv viên hâur HTX ho sik paz nriêr qơư nhoz so, sik đros uô jâuz mor nox, tok kruô. Gri chor tsêr nhoz so côngv thôngx ntơưv jok Bon mak zos 50 cxênhz đêiv iz lênhx nênhs, li co tsôngv kruô tưz tâu nhoz so hâur têx tsêr lơưx lox jông, sor so. Đuô li, iz đôiv vênhx nghệ jêx jok, đhiê pax vuôs vênhx huôv Thái đơưz thâuv tưs cũ xnhoz tok njôngr chiê uô trâu tsôngv kruô sêiz li đhiê pax vuôs xòe, hu gâux đros trax tính tẩu…Niêv tix Hoàng Thị Dung, Giám đốc HTX du lịch côngv thôngx jok Bon puz pâuz:“Chiê zaz zâuv tsôngv kruô tuôx chôngz đuô mak HTX cux xav jênhv sir jos kriz uô nzir dịch vụ trâu tsôngv kruô muk uô nriêr pâuz đros pêx xênhv, kriz uô qơư tu zus kêiz, pak njêl chiê tsôngv kruô chiv chir cxov, uô nox ciês hâur jok. Tiv oz zos paz trâu chor chuôz zis tsik tâu uô dịch vụ sik đros uô chiê zaz zâuv chôngz kruô tuôx đuô. Sir jos cov tov ntêx o hâur jok chuôz zis tưs cux zuôr txêik tok tâu kruô tuôx nhoz so”.

Shông 2019, jok Bon tưz tok xar muôx 1.000 lênhx kruô tuôx nhoz so, nox têx zav nox mênhx cxưx kaz, đax đêx sor, paz trâu huôv tsar kinh têr, xar hôiv ntơưv tiv phaz. Zơưv Trần Quốc Hưng, Chủ tịch UBND xar Mường Chiên, huyện Quỳnh Nhai, tỉnh Sơn La hêik:“Xar cux tưz paz jêx jok kriz uô têx tsưr ziv dịch vụ tâu têz qơưk cxơưz cxiz uô, co zos tuôr chiê, phuôx huiz têx tsiv gri vênhx huôv mênhx cxưx, zos tsôngv box Thái đơưz sâuv thax tsav Quỳnh Nhai têx vênhx huôv jông. Xar cux tưz hêik têx jêx jok đros jok Bon txêik tok tsôngv kruô xar tuôx ndis shuôk uô si ntơưv no”.

Tuôx trâu Quỳnh Nhai, Sơn La ndis shuôk uô si sâuv pak đêx tênhv, tsôngv kruô sơưr đơưk ndo njôngr nhoz ndis shuôk uô si jok Bon chiê nriêr pâuz nzir lok pêx xênhv ntơưv no li têx vênhx huôv, phongx cxưx jông muôx hâur luz nênhx./.

(Tòng Anh-Lik Thox cxêik nhênhv)