Lênhx cưk kriê paz shux xênhz tox siêz Sơn La uô tâu trơưk tsưr ziv siêz xar

          Cưk kriê An Văn Thái nhiv no zos cưk kriê kriê môn Hóa học, tsêr cơưv THCS Lê Quý Đôn, TP Sơn La. Têx shông tov ntêx, cưk kriê kriê ntơưr ntơưv tsêr cơưv THCS thị trấn Bắc Yên, huyện Bắc Yên (Sơn La). No zos huyện tox siêz, phênhv ntâu shux xênhz zos nênhs mênhx cxưx tsơưs nênhs, muôx ntâu lênhx shux xênhz muôx luz nênhx txov nhêv, viv li cưk kriê thâuv tưs cux xar njôngr zuôr uô li chas chiê têx mê nhuôs nhiêv cơưv ntơưr thiêz paz têx mê nhuôs shux xênhz pâuz tâu sei têx yênhx tưv hâur cxuô jiês cơưv ntơưr. Đhâu ntâu hmo pư tsi tsâus jos chiê xar tsưr ziv, cưk kriê tưz xar tâu tsưr ziv zos sir zôngv têx cơưv hâur ntơưr chiê uô tsênhv tsênhz, cxôngx têx tsưr ziv li đros shux xênhz cơưv thiêz uô têx trâur nuv nhênhz chơưv khoa học, đhâu co jênhv tâu têx cưk kriê txơưr hâur tsêr cơưv li thôngx ziv thiêz shux xênhz jông siêz cơưv, cưk kriê An Văn Thái pheiz kênh:     “Yênhx tưv no zos yênhx tưv tổng hợp, muôx lênhx coaz txos ntâu bộ môn, muôx têx thâuv zuk cux pov lax, viv li zuk cux tsuv nriêr pâuz cxaz, nus cxaz têx cưk kriê txơưr chiê uô li chas uô jông txơưx jênhv, chox tâu yênhx tưv cxix cxuô tiv zix chiê kriê trâu shux xênhz, paz shux xênhz uô tiêr jông zuk li dự án”.

          Đhâu zuôr xar 20 shông uô hâux lưv kriê ntơưr, cưk kriê Thái tưz paz têx shux xênhz uô yênhx côngz yênhx châuv trâur nuv nhênhz chơưv khoa học, tax tâu ntâu giải hâur Hội tưr thik khoa học kỹ thuật cấp Thành phố, cấp tỉnh thiêz cấp têz qơưk. Tiv zix zos: trâur nuv tsiv uô qir hữu cơ vi sinhc xôngx têx vi sinh vật thiêz têx xiv huv kôngz nuv tsi zôngv txos nhoz tiv phaz tưz tâu ntâu ziv chuôz zis uô kôngz nuv sir zôngv; Phưv chuôz zênhx phân hủy dung dịch đa năng tax giải 1 cấp thành phố, giải 2 cấp tỉnh thiêz giải jông tiv zix cấp têz qơưk phưx vưv trâu hâux lưv kriê thiêz cơưv ntơưr; kror chuz hlơưr têx vuôz tsuôz kiês nênhs cxôngx zôngv yar ntux tax giải 2 cấp thành phố, giải 3 cấp tỉnh thiêz nhiv no tsênhv dưv thik giải xar tơưv khoa học hluôk nênhs cấp têz qơưk...      Đhâu têx trâur nuv nhênhz chơưv khoa học kỹ thuật tsênhv tsênhz, cưk kriê Thái tưz yênhx lênhx nênhs paz têx mê nhuôs shux xênhz xar tơưv uô tâu zuk li siêz xar njôngr, nhiêv thiêz sir jos cơưv ntơưr đuô. Shux xênhz Điêu Thị Minh Thu, cơưv lớp 9A, tsêr cơưv THCS Lê Quý Đôn, TP Sơn La puz pâuz:          “Tâu cxaz chuôz dự án khoa học đros cưk kriê Thái cur lok six jông siêz, viv cur zuôr tâu chox têx yênhx tưv cơưv tâu lok uô tsênhv tsênhz, thâuv tâu uô tsênhv tsênhz mak cur pov zôngx ziv to tâuz đuô; khov co uô jax cơưv sâuv lớp cux tâu jông đuô”.

          Cxôngx chuyên môn nghiệp vụ truôx tul, cưk kriê An Văn Thái tsênhv tâu tsêr cơưv, nganhx zaoz zux thành phố njênhs njôngr choz uô côngz xưv kriê cxaz trâu shux xênhz cơưv txơưx môn Hóa học chiê muk dưv thik. Xav txix shông cơưv 2015-2016 txos nhiv no, tưz muôx 22 lênhx shux xênhz zos cưk kriê Thái kriê tax shux xênhz txơưx cấp thành phố thiêz 31 lênhx shux xênhz tax shux xênhz txơưx cấp tỉnh môn Hóa học lớp 9.         Cưk kriê An Văn Thái puz pâuz, đrâuv sir jos paz têx mê nhuôs shux xênhz cxiv tsa têx trâur nuv nhênhz chơưv khoa học kỹ thuật, hâur côngz xưv kriê ntơưr, cưk kriê thâuv tưs cux cơưv cxaz yênhx tưv, tsưr ziv kriê ntơưr chiê kriê trâu shux xênhz têx yênhx tưv ntâu tiv zix, paz shux xênhz muôx pênhr xưv zuôr trâus hâur luz nênhx:

          “Iz cxiê tsưr ziv kriê ntơưr yiêz cur khênhr zôngv li kriê ntơưr thiêz uô tsênhv tsênhz, paz shux xênhz jênhv pâuz sei đuô têx yênhx tưv cơưv đhâu tsênhv tsênhz hâur luz nênhx, cxôngx co paz shux xênhz nhiêv lok khoa học, xar nriêr pâuz khoa học, xar vênhv zôngv têx yênhx tưv cơưv tâu trâu hâur luz nênhx”./.

(Trấn Long-Txâur Vax cxeik nhênhv)