Chuôz ndê cêr siz hluz siz paz hâur chêix ntux nas chuô

         Đêx ngaz cuôr tưz đhâu lơưv muôx iz ciêz, taz sik niêv tix Quàng Thị Ngân nhoz xar Nặm Păm, huyện Mường La (Sơn La) cux tsênhv lok six cxơưx, pôngz ziêz lox… Jiês lok nas lox nhiv kruôr đhâu tưz uô chor ar nhoz saz kâuv tsêr xưz poz lok hâur niêv tix luz tsêr, uô trâu tas nro chuôz zis tsuv txar qơư nhoz sêi đrơưv: “4 six ntux lok nas lox, 6-7 six mak ar piz xưz poz, sơưr đơưk thiêx khiêr tơưv đrâuv jôngr. Cux lok six nyêi tsav poz tas nro luz trôngz no lok trâus luz tsêr. Cur tuk txir muk uô nox tsik tâu lok, yuôr iz lênhs nhoz tsêr tsuôk pâuz puôs mê nhuôv jâuv kuôx xưz, tsik pâuz uô li chak hlo. Hmôngr jông thâuv co muôx sơưr đơưk hâur jok đros chor cưr tix nênhx tsa tuôx paz njêis yêv cxuô zav lok trâu saz đrâuv jôngr”.

       Toz hâu ntuz nas, cơư tơư nhav ar, taz sik, sâuv têx txox cêr muk lok đhâu têx trôngz nxaz, ar poz ntâu… zos chôngz lênhx nênhs sik paz njêis yêv, cưr têx ntông, têx txax, lâux câuz, lok sik cxuô zav muôx hâur chor chuôz zis tsênhv tsik tâu trâus ar cxuz lok trâu ntơưv têx qơưk ngaz tuk đuô. Tix lâus Lò Văn Hinh, nhoz jok Két, xar Tạ Bú, huyện Mường La hêik: “Cur chuôz zis mak tsik uô chak taz sik hâur jok muôx ntâu luz tsêr trâus hiêv. Cur cux đros sơưr đơưk pôngz siêz, paz tâu li chak mak paz xưz, njêis txar cxuô zav muk trâu qơư ngaz tuk đuô. Hâur qênhx shênhx phiv liv li no taz sik sơưr đơưk hâur jêx jok cux sir jos đros paz, cxuô cấp chinhr quyền cux tuôx paz trâu chor chuôz zis trâus hiêv”.

        200 ntâu luz tsêr trâu puôk tsuôx, 1 lênhx nênhs tuôs, 3 lênhx nênhs trâus saz; xar muôx 40 kror qơư xưz poz; xar muôx 50 héc ta blêx, tsoz chos trâus đêx ngaz cuôr, ar cxuz… Co zos têx kror trâus hiêv ntơưv huyện Mường La hâur jiês lok nas nhiv kruôr đhâu. Tas nro cxiv luôs chinhr triv nhoz Mường La tưz sir jos chiê paz ngaz tuk, truôx tuk luz nênhx trâu pêx xênhv. Zơưv Vũ Đức Thuận, Bí thư Huyện ủy Mường La puz pâuz: “Pêz cux tsênhv sir jos uô côngz xưv phax tar; tas nro chor xar, jêx jok puôr lênhx muôs đôiv sêiz jor, thâuv muôx đêx ngaz cuôr, ar poz mak zuôr paz njêis yêv txar lênhx nênhs thiêz cxuô zav muk trâu têx qơưk ngaz tuk. Pêz cux tsênhv huiz tôngv têx pênhr jos hâur xar hôiv chiê paz trâu pêx xênhv; muôx tsưr ziv paz trâu tsôngv box, tiv zix zos chor ziv chuôz zis muôx liêz têz, vax tsêr trâus đêx cuôr yôngz… uô jông Đảng, Têz qơưk têx tsênhv chêi paz trâu chor ziv chuôz zis trâus đêx ngaz cuôr”.

        Đros đrêiv Mường La, têx hnuz đhâu, cxuô cấp, cxuô nganhx nhoz tỉnh Sơn la tưz huiz tôngv pênhr jos, hêik sơưr đơưk paz nhiêx txiêx, cxuô zav trâu chor ziv chuôz zis vax tsêr, cxuô zav trâus đêx cuôr yôngz. Đoanx côngz xưv lênhx tov Ủy ban tỉnh Sơn La tưz qênhz  yuôx, nriêr pâuz qênhx shênhx, nriêr qơư nhoz yiêz trâu chor chuôz zis tsuv txar qơư nhoz.

        Zơưv Cao Viết Thịnh, Phưv Giám đốc Sở Kôngz nuv thiêz Huôv tsar jêx jok, tox siêz, Chánh Văn phòng Ban sêiz car phax tar ntux têz ruôr hiêv thiêz zok nriêr chơưv paz tỉnh Sơn La hêik pâuz: “Uô ntêx chiê khưx phưx, paz trâu chor chuôz zis muôx vax tsêr trâus puôk tsuôx, paz đros huyện bax têx qơư nhoz ngaz tuk li tsêr cơưv ntơưr, tsêr vênhx huôv chiê chox chor chuôz zis co lok nhoz. Choz trâu thax tsav qơư, tsênhv tsênhz zos xar txoz cxơưx trâu pox nhuôs, taz por hâur ntu tok têz qơưk muôx tsưr ziv yưv pênhr cxiv tsa qơư nhoz yiêz, lơưr muôx tâu qơư nox nhoz truôx tuk luz nênhx”.

        Txos nhiv no, Sơn La njuôk xav têx trâus hiêv tiv ntux nas chuô, đêx ngaz cuôr tas muôx 12 tiv đêiv. Phiv liv txix ntux yar ntux nas uô trâu thax tsav qơư tsuv cê sir jos phax tar, cê sir jos khưx phưx./.

Long Hạnh-Lik Thox cxêik nhênhv