Bôv đôiv Pênhz phax Lai Châu đros đrêiv pêx xênhv nhoz ntus đriv

Jok Nhú Ma, xar Ka Lăng, huyện Mường Tè, tỉnh Lai Châu, qơư muôx 60 ntâu ziv chuôz zis tsôngv box Hà Nhì uô nênhx nhoz. Ntơưv kror qơư no zênhx tâu pâuz txos zos thax tsav qơư pluôs tiv zix hâur huyện, hâur tas nro têz qơưk, đros tas nro chor chuôz zis njiz cêr yêiz pluôs thâuv chêix kôngz lôngk tsik tâu siêr muôx 60% ntâu. Taz sik, khov muôx chor bôv đôiv Pênhz phax tuôx nhoz ntơưv têx jêx jok, tuôx nhoz đros pêx xênhv, paz kruôz kriê trâu pêx xênhv huôv tsar uô nox, txos nhiv no hâur jok tsuôk yuôr oz pêz ziv chuôz zis pluôs lơưv xưz. Zơưv Lỳ Lé Chừ, tsar jok Nhú Ma, xar Ka Lăng, huyện Mường Tè puz pâuz: “Tuôx nhoz hâur jok, Bôv đôiv Pênhz phax tưz yax kriê trâu pêx xênhv tiêk tsuv por vêv zuk jêx jok, phax tar tơưs cuz, phax tar zax zênhz thiêz phax tar chor nênhs fêv muk lok đhâu ntus đriv”.

Zênhx Pênhz phax Ka Lăng nhoz sâuv thax tsav xar Ka Lăng, huyện Mường Tè; tâu choz jênhv vưv sêiz car, por vêv đriv têz ntêr xar muôx 29 cêik cêr đros muôx 4 tuk ndêx chiv ntus đriv thiêz thax tsav sêiz car zos 2 xar Ka Lăng thiêz Tá Bạ. Têx shông đhâu, taz viv tsik so sir jos kriz uô têx tsưr ziv sêiz car, tuôr truôx ngaz tuk sâuv thax tsav ntus đriv. Thôngx cxix, cán bôv, chiến sĩ hâur taz viv tsênhv sir jos cxaz chuôz cxiv tsa thax tsav qơư ngaz tuk, taz por ngaz tuk xar hôiv thiêz paz trâu pêx xênhv huôv tsar uô nox, cxiv tsa jêx jok yiêz.

Trung úy Lý Duy Khánh, Đội trưởng Đội vận động quần chúng Zênhx Pênhz phax Ka Lăng hêik: “Cur cux tưz đros chor car bôv, chiến sĩ hâur đôiv yax kriê, hêik pêx xênhv, paz pêx xênhv huôv tsar kinh têr, xar hôiv li: tu zus tsiêx cxu, kêiz ol thiêz chos blêx cov huv đros trâu tsênhv tsênhz yênhx jêx jok. Ntu đhâu cur tưz đros taz viv yax kriê, hêik trâu pêx xênhv pâuz lok Chêi Pênhz phax Việt Nam; cơưv shâuv thiêz uô lơưr zơưv hloz Hôx cêr uô nênhx jông; paz trâu pox nhuôs zos chor nênhs uô jông lơưr Têz qơưk thiêz chinhr quyền ntơưv qơư li têx cêr chêi thiêz cui tênhv”.

Cux xưk li Zênhx Pênhz phax Ka Lăng, huyện Mường Tè, ntu đhâu cán bộ, chiến sĩ Zênhx Pênhz phax Pa Tần, huyện Sìn Hồ cux tsik so muôx njêx muôs ntơưv thax tsav qơư yax kriê, kruôz kriê trâu pêx xênhv huôv tsar uô nox, taz por nga ztuk sâuv thax tsav. Khov muôx chor tuz lênhv pênhz phax li têx hâux lưv uô tsênhv tsênhz, truôx jông co, chor chuôz zis pluôs, txov nhêv sâuv thax tsav tưz tâu txo grêk tsơưs lơưr yênhx shông.

Đại úy Hồng Xênhv Shôngx, Chinhr triv viên phưv Zênhx Pênhz phax Pa Tần hêik pâuz: “Zênhx Pênhz phax Pa Tần hâur ntu đhâu tưz kriz uô tsaz yênhx đros đrêiv chor pox niêv nhoz ntus đriv. Sik côngv đros chor Hôiv pox niêv thành phố Việt Trì, Công an tỉnh Phú Thọ, xar Pa Tần paz kriz uô tsưr ziv uô nox, chiê paz trâu chor pox niêv tu zus buô muôs grêix. Taz viv cux tưz tso nênhs muk trâu thax tsav qơư chiê yax kriê, paz trâu chor pox niêv sơưr đơưk zuôr buô nôngz, cxiv uô tsêr guôx chiê tu zus buô, paz trâu chor chuôz zis huôv tsar kinh têr ntơưv thax tsav ntus đriv”.

Đại tá Lê Công Thành, Phưv Chính ủy Bôv Chỉ huy Bôv Đôiv Pênhz phax tỉnh Lai Châu puz pâuz: Tror uô lơưr Bôv Chinhr triv li Chỉ thị 05, txix hâur shôngk shông txos nhiv no, Bôv đôiv Pênhz phax  tỉnh tưz cxaz chuôz muôx 400 ntâu hnuz côngz kho đuô xar muôx 2 cêik cêr zoz thôngz jêx jok; paz pêx xênhv txar qơư, kho đuô thiêz uô yiêz muôx 30 ntâu luz tsêr; paz pêx xênhv sâu yênhx châuv héc ta blêx, jâuz tâu. Đuô li, lưx lươngv pênhz phax têx taz viv tưz chuôr yuô, khơưk muôz zuôr xar 1.500 kror hax huv, ntâuz bos kror ndâux, yo sor trâu chor shux xênhz sâuv thax tsav. “Đảng ủy, Bôv Chỉ huy Bôv đôiv Pênhz phax Lai Châu cux tưz lok six sir jos kriz uô thiêz cux tưz kriz uô tsênhv mênhx Bôv Chinhr triv li Kết luận 01 huv đros trâu tsênhv tsênhz hâur yênhx taz viv, thax tsav. Thiêz tsênhv tsênhz zos pêz tưz uô tsênhz mênhx Chỉ thị 01 txix kriz uô đêz đar txos tas nro chor tsưr tsix cơ sở Đảng, trâu canr bộ, đảng viên, quần chúng chiê cir jênhv thiêz kriz uô. Tiv oz, pêz tưz muôz Quân ủy Trung ương li Nghị quyết lok phuôx huiz lênhx bôv đôiv lâul Hôx trâu sơưr đơưk sox sêiz zuk chiê uô trơưk cov truôx jông đuô”.

Uô jông lơưr hloz Hôx têx luk kruôz kriê, ntu đhâu chor tuz lênhv bôv đôiv Pênhz phax nhoz ntus đriv Têz qơưk Lai Châu tưz phuôx huiz jông zos lênhx bôv đôiv Lâul Hôx, đros đrêiv pêx xênhv nhoz thax tsav ntus đriv txix têx hâux lưv uô tsênhv tsênhz. Yênhx lênhx canr bôv, chiến sĩ puôr lênhx sêiz “Zênhx zos tsêr, ntus đriv zos thax tsav qơư nhoz, tsôngv box cxuô mênhx cxưx zos cưr tix nênhx tsa”; cxiv tsa por vêv thax tsav ntus đriv truôx đrênhk, đros tsôngv box cxuô mênhx cxưx por vêv truôx jông tsưr qênhx têz qơưk, ngaz tuk ntus đriv têz qơưk./.

(Khắc Kiên-Lik Thox cxêik nhênhv)