Uô bluô nux txix chos txir tuôz ziz thiêz txir lưk jôngr hâur têx ar têz cxaz

          Hâur iz luz hli đhâu lok no, zơưv Nguyễn Trí Vinh chuôz zis nhoz jos Nà Cang, Xã Hát Lót, huyện Mai Sơn, tỉnh Sơn La, tsuôk cêv 1-2 hnuz tưz muôx txir lưk jôngr thiêz txir tuôz ziz muôs trâu tsôngv tuz luôv ciêz đrôngl. Zơưv Nguyễn Trí vinh cux shir phaz lul, shông no txơưv muôx caz moz Covid-19 uô phiv liv, taz sik tâu hâu nov ntơưv qơư đros trâu zơưv Vinh chuôz zis sir tas tsưr ziv đas jos uô thiêz chiv txir lưk jông shông no sâu tâu muôx 12 cxênhz luz, grê nhiêx muôs 10-12 cxênhz iz luz; đuô li txir tuôz ziz sâu tâu muôx 5 tấn, grê muôs 25 cxênhz đêiv nhiêx iz chiêz, zos chưx tas têx nhiêx ntiêr, côngk đas jos uô, zơưv Vinh chuôz zis cux sâu tâu ntâu nhiêx chox lok sir zôngv: “Muôs tâu tus grê truôx tuk, tuz luôv ciêz đrôngl cux nhiêv zuôr cơưs, lơưr tsuôk zos hu xor tôngx tuôx, zuk mav ntiêr yêz thâux xa muk trâu oz chas tỉnh li Bắc Giang, Bắc Ninh, Quảng Ninh, tuôz ziz mak tsuôk zos muôs trâu tỉnh Quảng Ninh”.

          Shông 1976, zơưv Vinh đros nưk chuôz zis yêik txix qơư nhoz Yên Sơn, Hoài Đức, Hà Tây (Nhiv no zos Hà Nội, yêik tuôx muk nhoz trâu jos Nà Cang, thâuv ntơư cux njiz trâus ntâu phiv liv. Txix têx cêr txov nhêv no, zơưv Vinh chuôz zis tưz ntâu faz tsưr ziv, shor zuôr chos zav tsoz chos tưs thiêx hla trâu cêr txov nhêv. Uô ntêx, zơưv chuôz zis chuôz piz chos poz cưk, chos caz tsiz, taz sik ar cux tsuôs jux juk, sâu tsik tâu nju kôngz. Đhâu ntơư, zơưv Vinh thiêx uô siêz truôx bo hlôngr chos tsoz chos txir tuôz ziz thiêz txir lưk jôngr. Đhâu chos siv oz pêz shông, chor txir ntơưr nziv chos trâu têx ar têz cxaz thiêz muôs tâu grê. Txix ntơư, zơưv Vinh thiêx li muk kir txêik pênhr nhiêx nhiêx têz qơưs lok zuôr txir yênhx puô tsoz chos txir lưk jôngr thiêz txir tuôz ziz chox lok chos trơưk đrêiv tsưr ziv kriê, txi txir ndư, muôs tâu grê. Xav iz shông zos chưx têx nhiêx ntiêr, côngk đas jos uô cux sâu tâu 400 ntâu triệu iz shông. “Kror zov chênhr zos zuk tsuv muôx six hơưv hnuz nhôngs uô thiêz tsuv  gruôs tu, zuk muk ntâu thax tsav qơư cux cơưv shâuv tâu tsưr ziv huôv tsar cêr uô nox”

          Têx tsưr ziv chos tsoz chos txir tuôz ziz shơư txir lưk jôngr, zos tsôngv px hâur thax tsav xar cơưv shâuv tsưr ziv chos, zơưv Nguyễn Trí Vinh shir phaz lul kriê. Pir li zơưv Nguyễn Trí Sơn nhoz côngv jos, hâur ntâu shông đhâu tưz tâu zơưv Vinh kriê cxuô faz tsưr ziv chos thiêz tsưx phưv tsoz chos txir lưk jôngr, txir tuôz ziz, txir mo môngk, txir lưv tsiz: “Thâuv chos thiêz tu têx txir ntông ntơư, zos njz trâus têx phiv liv tưs mak muk ciês tiv zơưv Vinh tsêr chiê zơưv Vinh kriê thiêz txix thâuv chos chor txir ntông ntơư muôs trâu tuz luôv txos trâu nhiv no, cur chuôz zis tưz bluô nux jux juk”

          Trơưk li zơưv Vinh njuôk xav, hâur ntu zuôr txos no, nưk chuôz zis tsênhv zuôr kriz đar ar têz chos txir cxuô zav tsoz chos ntông nox txir cov muôx chôngz lênhx ntâu tus tuz luôv tuôx zuôr txos thiêz tsênhv zuôr chos iz cxiê zav txir ntông txơưr sêz pok huv đros thax tsav qơư ntơư, zos huv đros mak tsênhv zuôr chos ntâu. “Hâur ntu zuôr txos no, tsuv chos cov tâu truôx 1h ntông txi txir tu tsưx phưv cov tâu zos đrêiv tsưr ziv kriê. Thiêz nhiv no mak cur tsênhv xar chos nzir tsoz chos txir ntông cuô mik đros trâu uô zuz muôs”./

Tsu cxêik nhênhv-Bích Thuy Tây Bắc