“Cxênhx txuôk nhiêx txiêx -viv luz nênhx tov kaz jông đuô”

Trâur nuv “Cxênhx txuôk nhiêx txiêx -viv luz nênhx tov kaz jông đuô” tâu tỉnh đoàn Sơn La krêz uô txix hli 3/2021. Iz đoàn viên hluôk nênhs cxaz chuôz txix tsưr ziv uô ntơưr cxênhx txuôk lơưr six hơưv 12 luz hlik lok sik gra nhiêx tsês chiê ntơưv zênhx hangx chính sách xã hội nhoz tiv phaz. Phênhv tsơưs tiv zix txix 1 txos 2 tsov đeiv đros iz lênhx nênhs hâur Ban chấp hành huyện đoàn, thành đoàn thiêz tỉnh đoàn. Đoàn viên hluôk nênhs, lênhx nênhs, taz viv, doanh nghiệp tsov lơưr zuk têx muôx tsênhv tsênhz chiê gra nhiêx txiêx tsês chiê cxênhx txuôk huv đros. Pheiz kênh lok tsưr ziv xar tơưv trâur nuv no, tix lâuk Nguyễn Duy Dũng, Phưv Bí thư Tỉnh đoàn Sơn La puz pâuz:

          “Ban thường vụ Tỉnh đoàn tưz krêz uô ntâu trâur nuv paz txưv đoàn viên hluôk nênhs nhoz tiv phaz, taz sik phênhv pênhr paz txưv huôv tsar cêr uô nox trâu hluôk nênhs mak tsênhv tsơưs, hâux lưv txeik pênhr njiz ntâu phêv liv. Đros tsưr ziv huiz tôngv nhiêx txiêx cxênhx txuôk txix đoàn viên hluôk nênhs, Ban thường vụ tỉnh đoàn tưz đros Zênhx hangx chính sách xã hội nhoz Sơn La tsưr tsix hnuz ntênhs “Cxênhx txuôk nhiêx txiêx -viv luz nênhx tov kaz jông đuô””.

          Iz fâu ntơưr cxênhx txuôk tâu krêz uô tsi taz zos iz hâux lưv uô muôx ziz njiêz hâur phongz yaox cxênhx txuôk, mak tsênhv tso pov cxênhx hluôk nênhs Sơn La li siêz jông, cêr pheiz kênh thiêz sik côngv siêz. Tix lâuk Trần Minh Khánh, Bí thư Đoàn phường Quyết Tâm, TP Sơn La pheiz kênh, ciês thâuv pâuz txos trâur nuv, tix lâuk tưz sir jos hu grus, vênhv tôngv đoàn viên hluôk nênhs sâuv thax tsav cxaz chuôz cxênhx txuôk:

          “Cur tưz gôngr côngv iz phênhv mê chiê cxênhx txuôk co zos 1 tsov 500 cxênhz đeiv. Cur xar njôngr chor nhiêx txiêx no zuôr paz tâu trâu têx hluôk nênhs tsênhv huôv tsar cêr uô nox uô hâuk, uô bluô nux txix zuk li pênhr xưv trâu tiv phaz thiêz têz qơưk”.

          Đhâ 9 luz hlik krêz uô trâur nuv, txos nhiv no tưz muôx 700 ntâu fâu ntơưr cxênhx txuôk tâu krêz, đros tas nro chor nhiêx txiêx muôs nhos 2,6 tỷ đeiv. Tỉnh đoàn thiêz zênhx hangx chính sách xã hội Sơn La tưz thôngx ziv muôz trâu 12 dự án jông nhoz têx huyện, thành đoàn chiê paz cxiv tsa, huôv tsar trâur nuv hluôk nênhs huôv tsar cêr uô nox, huôv tsar kinh têr, đros phênhv paz iz dự án zos 100 tsov đeiv.

          Pâuz txos pênhr paz txưv txix trâur nuv, đoàn viên Cà Văn Long, nhoz xã Hát Lót, huyện Mai Sơn tưz truôx siêz sâu bê txeik thiêz tâu thôngz đhâu txeik pênhr uô dự án huôv tsar chos ntông nox txir thiêz tu zus. Txix vax txir trâuv nhux tsuôk đar 4 cxênhz yiv ndis, nhiv no tix lâuk Long tưz muôx 1 hecta txir trâuv nhux chos sâuv ar nxaz thiêz tu zus muôx nhos 10 tul buô nôngz. Tix lâuk Cà Văn Long pheiz kênh:

          “Txix thâuv tâu paz txưv txeik pênhr txix đoàn hluôk nênhs, cur chuôz zis krêz đar qơư tu zus, tsêz chos, zuôr cxaz nôngz tsoz chos chox lok chos. Hluôk nênhs li phênhv pênhr paz cur uô tâu cur li siêz xar njôngr zos krêz đar trâur nuv huôv tsar kinh têr chuôz zis, muôz siêz phênhv sâu , hlôngr yiêz luz nênhx”.

          Muôx cxaz ntâu trâur nuv kinh têr yiêz, hluôk nênhs Sơn La huôv tsar cêr uô nox tưz qir khav tênhv tâu chêx cuk jông tsênhv tsênhz txix trâur nuv “Cxênhx txuôk nhiêx txiêx -viv luz nênhx tov kaz jông đuô”./.