Harei ini (26/12) di Ha Noi, Nyaom roya Pakacah anit ranam dalam taneh ia negar mbang ka XI brei rah tabiak hu mbaok di labaih 2.200 urang lambaok vakil. Ngan haong kadha “Pakacah salih bahrau, hadah krah, cakrok samar ba taneh ia tame jaman patagok khang, hadah krah, ginup meda”, nyaom roya lac harei pok glaong dom urang naih gheih abih dalam dom danak dak pakacah 5 thun tapa. Naih gheih yau danak dak pakacah “Dalam negar gul pataom pacang caga saong jayah jit ruak COVID-19", "Dalam negar rik prein ka urang kathaot”; “Jum tangin brei oh daok sang taik tahak dalam negar di thun 2025”…Dom danak dak ini hu ngak saong daok rik daong padang sa rahra bhap bini siam mekre, gul pataom, patagok taong abih.

Jien alin Tet Nguyen dan nathak Athaik Wao - Bính Ngọ 2026 di tinh Tay Ninh kuhria mboh dahlau glong abih tal 600 trieu dong sa urang di doanh nghiep FDI. Jien bilan kuhria tui yaok akaok menuac  ngak hu labaih 11 trieu dong sa bilan. Dalam nan, doanh nghiep karja hu jien bilan glong abih, jaik 16 trieu dong sa bilan. Bruk nan brei mboh brum kham merat saong bruk ngak di dom doanh nghiep dalam bruk sangka radiuk bhap bini urang ngak, rik tame khik brei salamat  raidiuk di tinh Tay Ninh tuk Tet mai, Bilan pataih tal. 

Bo Chi huy Bol lin tinh An Giang gam haong jabat hu pambuak bahrau peih padang 10 baoh sang gul pataom ka dom baoh sang kan kandah ka sang daok. Yaok baoh sang hu daong jien padang 60 trieu dong, khik kajap asal kadha “3 khang”, paben sang khang, latai, ganing saong pabung sang khang. Bruk ini oh lac daong rahra “hu labik daok karo”, bo daok kak kajap jang bruk gul pataom, pagam darah ralaow bol lin - rahra, padang hatai je dalam rahra karo kajap dalam tinh.

Dalam bruk khik iek gilai ikan, taong chap kaya ia, tinh Vĩnh Long ngak hu 18 dalam 19 bruk hu jao brei. Bruk ngak oh ka blaoh lac “ Ba tabiak sarak salih bruk ngak, yak klak dom gilai  oh daok nao ngak mbang taong chap ikan di tathik saong sarak daong urang nao tathik  pasiam, salaih jamraih VMS”. Njauk caik hatai, meng akok thun 2024 mbiah tal ini, tinh Vĩnh Long oh hu gilai taong chap kaya ikan lih tapa bhum tathik negar langiu suan hukum.

UB Bhap bini tinh Ca Mau bahrau mbaoh tangin Danak dak pacang haluh jaleih ar tasik ban Bac Lieu (banah daok veik di ar tasik Vĩnh Trạch Đông saong ar tasik Nhà Mát). Danak dak peih ngak hu pandar labaih 4ha taneh. Danak dak piah daong ngak salah blaoh, kandauk jalan ar piah patrun prein riyak dalam ban Bac Lieu dahlau diah, pacang khik jalan ar tasik gah Pur anak dom kanjah jhak di langik salih karei saong ia tasik tagok.

Mai meng bruk ngak hu dalam thun 2025, jien Rub di Nga hu tame dalam nyaom 5 kaya drap ar di dunya siam mekre. Bruk tagok yaom di jien rub kayua takik meyao meyit jien negar langiu Nga. Gam haong nan, dom urang buh jien tame ngak mbang haong Nga jeng sangka jang tal dom drap ar hu kuhria meng jien Rub, lagaih haong sarak jien  di Gilang karja negar Nga. 

Thai Lan bahrau pathau khan kakei caga ka bruk mbuan hajan praong saong ia sua theik di dom tinh gah Meraong negar. Rahra hu pachreih kakei bhian duah thau khau tin meng jabat chuc nang, kakei caga anak bruk mbuan rah tabiak ia sua theik, glut jaleih taneh, angin khang saong ia sraiy ar pacang, rilo meng lac di dom labik mbuan rah tabiak bala yau ye: dom bhum dhaong biar, jaik takai ceik, ar kraong… Dalam puac bilan 11 bahrau blaoh, hajan ia sua ngak kan kandah tal labaih 3 trieu rahra saong ngak labaih 160 urang metai.

Thun 2026, Mỹ pabak jien daong ka Ucraina gah bol lin biar biak ralo kuhria meng tuk Nga tame mesruh metak biak catang. Bruk cakak trun kadung jien lac bruk taom gaok karja Tong thong Donald Trump, urang rilo mbang khan lac, Mỹ oh daok jien piah bayar ikak je di bhap bini salih tame nan pablei vu khi yaom tamo ka dom gah NATO piah payua ka Ucraina. Meng thun 2022 mbiah tal Mỹ payua labaih 128 ti dola dalam nan hu phao vu khi, jien mbaok saong daong jien ngak pahala tal Ukraine./.