Ngak bruk haong dom tỉnh Cà Mau, Kiên Giang, Bạc Liêu, Sóc Trăng, Bến Tre, Tiền Giang saong Bình Định ka bruk Pacang caga chap mek kaya ikan suan hukum oh khan brei thau, oh tui hukum IUU, Pho Thủ tướng Trần Hồng Hà caik hatai, njauk padang ngak sa paben dữ liệu khik iek gilai ikan, dữ liệu brei ba tame hasa meng mentri tal dom bhum palei piah pandar. Tui nan brei pakhang, brei pasiam veik bruk gilai ikan 3 saoh. Ngan haong dom tỉnh hu takik gilai ikan, akaok bilan 11 brei ngak salah bruk khik iek, oh daok gilai 3 saoh.

Urak ini, urang nong di bhum ia taba Gò Công di tỉnh Tiền Giang yuak blaoh padai bilan Hè Thu 2024. Urang blei padai that di hamu ngan haong yaom meng 7.500 đồng tal 10.500 đồng sa kilo. Hadei tuk yuak blaoh, kaoh tabiak jien buh tame ngak urang daok laba labaih jaik 30 trieu dong sa hecta. Hu dom bruk pambuak ngak tabiak pandap pandar tui yaom glong di dom doanh nghiep, HTX ye urang nong hu laba glong jang bruk ngak yau dahlau.

Pambuak tal bruk uranaih Campuchia hu amaik ame ba nao likau mbang di grauk labik dom quan, huyen, Kong an TPHCM brei mboh, meng akaok thun mbiah tal ini, peih ngak dom mbang tabung glong, kong an pataom tame pasang iek, duah thau 8 urang dreih yau dui ba uranaih nao likau, pataom hu jaik 1.000 urang likau. Dom urang “ dui ba” lac gauk gar, amaik ame di uranaih…Dom urang Campuchia likau mbang jaik abih lac urang kumei, uranaih, urang jaoh jo, urang taha, hu raidiuk kan kandah di dom tỉnh  jiak taphia negar  Viet Nam yau Svay Rieng, Prey Veng.

Tui Pasak Kuhria mboh dahlau langik tasik pakat negar, meng ini tal harei 21/10, di labik tasik gah Meraong negar meda hu ralo mbang ia ndik, ia di balai Vũng Tàu ala 4 met. Piah caga dahlau, trun khat lahik kayua ia ndik khang ngak dauk, Mentri Ngak nong saong Patagok palei pala caong khin dom tỉnh, ban hu peih ngak dom jalan tathuak ia, khik hu siam bruk pala drak; pacang kajap danao raong kaya ikan hadang; samar yuak kuak paik nyam patam tame; pacang, caga ia dauk di do thi, labik dhong dauk, khik brei takik khat lahik.

Pak di dom tỉnh gah Pei negar, tui Rayo kuhria mboh dahlau langik tasik tỉnh Hậu Giang, kayua ia tasik Biển Đông ndik tagok, dalam dom harei anak tal, ia di kraong Hậu, labik kraong ia Hậu Giang - Cần Thơ tagok samar di tanut glong, tanut ka 3. Yau nan ye jabat chuc nang tỉnh Hậu Giang kakei, dom gilai kapal nao tapa brei peih suai veik piah plaik njiak riyak paoh tame ar ngak glut jaleih taneh. Mikva pataom tame pacang ar danao ikan, pok ar pacang bein phun mbang baoh, caga mac njuk pruh ia tuk ia dauk dui atah. Abih di nyu nan lac, hu dom jalan pacang caga  piah takik khut padai Thu Đông, njam patam…

Campuchia  padang ngak điện khí akok meti saong hu prein khang abih kuhria meng dahlau mai di taneh ia ini. Ngan haong phun jien kuhria labaih 1,3 tỷ USD, sang mac meda hu prein khang tagok tal 900MW, glong jang dua mbang dut saong prein khang di sang mac điện praong abih Campuchia urak ini lac danak dak thủy điện Hạ Sesan 2 ba tame ngak bruk di thun 2017. Tuk ngak salah, sang mac meda ngak 6.000 GW mon tuk điện dalam thun, meblah 26% kuhria abih tih điện di Campuchia.

Cảnh sát Medil patao Thái Lan chap mek 18 urang piah pasang iek bruk palei salih pandap rilo tal praong di Kong ty Icon Group. Njauk caik hatai, rilo urang parang iek, urang ba panuac di danak dak papar binguk , bac si danei angan  hu chap khik pambak tal bruk pachot pagat nan. Mbiah tal ini, hu labaih 1.100 urang hu payua harak đơn yaik pathau kong ty nan pachot pagat urang saong ba khaw tin ja suan ngak khat lahik labaih 400 Baht (labaih 12 trieu USD) di urang karei.

Hu takik abih 18 urang metai saong dom urang karei daok ndik iek ruak hadei menyum alak hu jru mek di bang Bihar, gah pun Ấn Độ. Dom urang metai meda daok tagok veik. Cảnh sát pak ini chap hu 22 urang pambuak tal bruk ngak tabiak, pablei suan hukum di bang ini. Bruk ba tal jru mek ka dom urang nan menyum alak metylic jru mek hu hlai alak catang. Tui yaok kuhria tapa, yaok thun Ấn Độ hu yaok rituh urang metai kayua menyum alak jhak./.