Mơguah kơnôl 11/11, ƀơi phương Quy Nhơn, tơring čar Gia Lai, yua hơjan prong, hơdôm hơpluh met khô̆t lŏn pơtâo hrŏm hăng phun kyâo pơprong glưh trun jơlan 1D. Lŏn pơtâo tơhlom trun jơlan ngă rơdêh ƀu dưi đuăi nao tơring čar Dak Lak. Tơdơi anun, anom bruă bơdjơ̆ nao tơring čar Gia Lai hơmâo pơkiăo nao mơnuih, măi kuăi hăng gơnam măi mok pơkŏn nao tơl anih kuăi rơmet hĭ lŏn pơtâo; laih dong pơgăn hĭ, črâo brơi rơdêh đuăi jơlan pơkŏn dong. Ăt amăng jơlan mrô 1D, jơlan čun čoe Quy Hoà hơmâo pơgăn hĭ, ƀu brơi rơdêh đuăi nao rai yua lŏn tơhroh. Anom bruă djru mă mơnuih hơmâo pơkiăo nao tơl hơdôm anih hŭi rơhyu, prap djru brơi mơnuih, prap ba đuăi mơnuih. Dong mơng kơnôl 11/11, hơdôm rơbâo čô čơđai ƀơi phương Quy Nhơn Bắc hăng hơdôm boh să Canh Vinh, Tuy Phước hơmâo brơi pơdơi sang hră yua hơjan prong, ia dăo blai hyu, ngă hŭi rơhyưt rô jơlan nao pơ sang hră.

Hơjan prong sui 2 hrơi laih rơgao, ngă kơ lu ia krông, čroh hnoh pơ kual gah ngŏ tơring čar Dak Lak ia lơ̆i kơtang, lip lu anih amăng plơi pla. Ƀơi să Xuân Lãnh hăng Đồng Xuân, gong gai plơi pla tañ pơdŭ đuăi hơdôm rơtuh boh sang anŏ mơnuih ƀôn sang laih anun kông ngăn mơnuih ƀôn sang ba nao pơ anih hơđong, laih dơ̆ng pơgăn jơlan nao rai ƀơi anih ia lip jơlan 19C. Ƀơi să Tuy An Tây hăng Đồng Xuân, hơdôm sang hră brơi čơđai sang hră pơdơi hrăm hră. Ƀing tơhan kơnuk kơna arăng brơi nao mă bruă ƀơi hơdôm anih phun, ia lip kơtang, amra bong glăi tơlơi truh či hơmâo amăng kual. Sang bruă lăng sŭ hlim hơjan kơnuk kơna lăi pơthâo, amra hơmâo tơlơi truh ia lip kơtang, ia kor, lơ̆n tơhlom ƀơi kual čư̆ siăng laih anun ia ling dăo kơtang ƀơi kual plung dơnung, anih čor lơ̆n dăo hăng ter hang ia krông, hnoh ia ania gah ngŏ tơring čar Dak Lak. Gong gai plơi pla hăng anom bruă hơmâo tơlơi dưi lăi pơthâo mơnuih ƀôn sang brơi răng kơđiăng hloh, ƀu dưi nao pơ jơlan ia lip kơtang, ia rô dơlăm, biă mă ñu jơlan găn nao pơ bơnư̆ pơkong ia, ia blai hang ia krông, ia ania đah mơ̆ng pơhlom, pơgang tơlơi rơnuk rơnua kơ abih bang.

Hơjan prong sui hrơi ƀơi lu bit anih ƀơi tơring čar Quảng Ngãi ngă ia ling dăo, lơ̆n tơhroh, ngă rơdêh ƀu thâo nao rai. Ƀơi să Sơn Tây, ară jơlan Trường Sơn Đông ƀuh 3 anih lŏn tơhroh, ngă rơdêh ƀu thâo nao rai dong mơng kơnôl 11/11. Ƀơi să Phước Giang, hơmâo 10 boh plơi pla ia dăo, sa, dua kual ia dăo truh rơbêh 1,5 met. Anom bruă bơdjơ̆ nao hơmâo djru brơi mơnuih ƀôn sang ƀơi hơdôm kual ia dăo ba nao pơ anih kơdư ƀiă. Ƀơi să Ngọc Linh, gong gai ƀon lan hơmâo ječ ameč ba đuăi 115 boh sang anŏ hăng 393 čô mơnuih bao pơ anih rơnuk rơnua. Tơlơi ngă bơngô̆t hloh lĕ kual Đăk Rế ƀuh lu anih lŏn čơđang hăng kơčong čư̆, bơdjơ̆ nao 96 boh sang anŏ dŏ hơdip ƀơi tơkai čư̆. Djop sang ano ƀơi anai hơmâo ba nao kơđăp pơ sang jơnum Jơnum min mơnuih ƀon sang să.