Tàm nùs nhơm niam, git jơnau nền nòn tàm Hìu Niam chài mpồl bơtiàn ƀòn Diêo, xã Bông Krang, kơnhoàl Lăk, càr Dăk Lăk tềng đăp bồng bi Dà lơgar, bồng bi Đảng, rùp rài Củ tịc Hồ Chí Minh, lŏ H Mên Teh đơs lơs jơnau sơn tơm să tàm dơ̆ Pơrjum mŭt đảng viên pa bè do: “Sùm đềt mềr mờ jơnau kờñ niam bơnĕ ngan Kăc màng bơh Đảng dê, lơh jăt nền cê gùng dà broă lơh cíñ trị, kơrnoăt pal jăt Đảng, Nghị quyết, cỉ thị Đảng, adăt boh lam Dà lơgar dê. Lơh gơs niam kơnòl broă geh jào. Sơn tơm să. Sơn tơm să. Sơn tơm să!”.

Lŏ H Mên Teh deh nam 1996, kòn cau Mnông, tơnơ̆ mờ uă nam lơh ngan bơh dùl nă làng bol jăk, nam do neh gơs đảng viên dơ̆ 9 tàm ci ƀộ ƀòn Diêo dê. Lŏ H Mên Teh đơs tai: “Añ gơlơh pơnyờ să ngan tŭ să tờm añ geh gơs dùl nă đảng viên Đảng Kộng Sản Việt Nam dê. Añ geh lơh ngan rơlao tai, añ tus bal pràn rơlao tai tàm ală broă lơh tàm thôn ƀòn dê”.

Bơtàu tơnguh đảng viên pa tàm tiah làng bol jơi bơtiàn ờ gal cau là bơta ờ tŭ lơi ƀuơn, tàm hơ̆ uă ngan là mờ ală xã gơtìp kal ke tàm kơnhoàl Lăk dê. Mơya mờ broă lơh ngan “bơ̆t bơtàu, bơtàu tơnguh ci ƀộ pràn kơl dang” tơl mpồl đảng geh lơh broă rơndăp lơh, cih gơs Nghị quyết bè jơnau kờñ bơtàu tơnguh đảng viên pah nam dê. Bal mờ hơ̆, ală đảng viên tàm tơl ci ƀộ, lơh krơh, lam lài, lơh bơta lòng gơs bơta niam tàm broă bơtàu tơnguh lơh sa mpồl bơtiàn tàm thôn ƀòn dê. Ồng Y Wu Sruk, Phó Củ tịc UɃÑZ xã Yang Tao, kơnhoàl Lăk pà git: “Đah ƀuơn tàm do he là cau kis tàm do dê, mờ xã Yang Tao là xã tiah ngài, tiah gơtìp kal ke, geh 95% là cau jơi bơtiàn ờ gal cau. Den he wă bơhiàn rài kis tàm do, tàm hơ̆ uă ngan là tàm jơnau đơs den he ƀuơn tam pà mờ làng bol. Tàm tơngu me git wă hơ̆ den he geh ngui, ai geh ală gùng dà broă lơh bơh Đảng, adăt boh lam bơh Dà lơgar tus mờ làng bol nàng làng bol wă mờ ngui tàm rài kis”.

Jăt mò Đào Thị Thanh An, Phó Ƀí thư Thường trụk Huyện ủy kơnhoàl Lăk, càr Dăk Lăk đơs, bơh tàm mùl màl kơnhoàl dê là tiah geh gal jơi bơtiàn ờ gal cau, Ƀan Lơh kơnòl broă sùm Huyện ủy kơnhoàl Lăk geh ai, broă bơtàu tơnguh đảng viên jơi bơtiàn làng bol ờ gal cau pơgồp bal mờ broă ai kwang bàng tàm mpồl lơh broă cíñ trị geh kwơ màng ngan tàm broă bơ̆t bơtàu Đảng, bơ̆t bơtàu gơnoar atbồ tàm ală xã. Bơh tŭ hơ̆ pơgồp bal tàm broă tơnguh cồng nha atbồ dà lơgar, bơ̆t bơtàu mpồl lơh broă cíñ trị pràn kơl dang, tơnguh nùs nhơm tam klăc bal ală jơi bơtiàn. Mò Đào Thị Thanh An pà git: “Gơtùi đơs là tàm tơngai do, gơnoar kwang bàng đảng viên, tàm hơ̆ uă ngan là đảng viên jơi bơtiàn làng bol ờ gal cau neh ngui geh gơnoar, kơnòl, tàm hơ̆ uă ngan là neh mblàng yal, lam sồr làng bol tàm broă bơtàu tơnguh lơh sa mpồl bơtiàn, sền gàr niam bơta lơngăp lơngai dà lơgar mờ bơ̆t bơtàu mpồl cíñ trị tàm ală tiah. Mblàng yal làng bol in bañ dờn, bañ iăt jơnau bơh cau ờ niam đơs mờ tơnguh broă tam klăc bal tàm ală jơi bơtiàn”.

Tus tŭ do, gùt kơnhoàl Lăk geh mờr 1 rơbô 400 nă đảng viên là cau jơi bơtiàn ờ gal cau, geh rơlao 42% khà đảng viên tàm gùt kơnhoàl. Do kung là mpồl tờm, tus bal niam tàm broă bơ̆t bơtàu thôn, ƀòn ngai sơlơ bơtàu tơnguh.