Bồ nhai 03 pa do, Đảng ƀộ, Gơnoar ătbồ mờ làng bol xã Ia Ly, kơnhoàl Sa Thầy dờp rò Jơnau lơh nền (Kwết địñ) bơh Ủy ƀan Ñân zân càr Kon Tum dê dờp xã Ia Ly lơh geh tơl jơnau sồr ƀòn lơgar pa. Ồng A Thoải, Ƀí thư Ci bộ mơkung là Kwang ătbồ thôn Chứ, xã Ya Ly di nùs ngan mờ cồng nha do. Tài bơh uă nam do, ồng neh lơh krơh lòt lài bal mpồl ci ƀộ kơ̆ nùs bơto pơlam, hòi jà 262 hìu làng bol thôn Chứ tam gơl bơta mờng kwèng kơlôi sơnơng, broă lơh mơkung bơtàu tơnguh lơh sa hìu bơnhă, mờ jơh nùs tus bal tàm broă lơh bal bơh ƀòn dê tă pơgồp bơta pràn bơ̆t bơtàu ƀòn lơgar pa. Ồng A Thoải pà gĭt, tàm broă hòi jà làng bol, kờñ ngan rlau jơh là bơta kơ̆ dơn, wă wờng di nùs di tồr. Ồng A Thoải, Ƀí thư Ci bộ mơkung là Kwang ătbồ thôn Chứ, chờ hờp ngan, yal: Bơh chờm uă cau kung ờ hềt wă sơl, hơ̆ sồng ngòt tai hoà hươr hươr mơya rơhời kung gĭt kơlôi tus bơta kwơ bal. Ală đảng viên tàm ci ƀộ kung jơh nùs mblàng yal, hòi jà làng bol khin cha ngui ală broă lơh pa tàm lơh gơlik phan bơna bơh lơh broă sa sươn sre mờ ai lài sền gròi tus broă bơsram sră bơh oh kòn dê.

Tơnơ̆ 12 nam kơ̆ dơn mờ jơnau kờñ bơ̆t bơtàu ƀòn lơgar pa, xã Ya Ly, kơnhoàl Sa Thầy hòi tơrgùm geh rlau 30 tơmàn đong lơh gùng lòt rê ƀòn lơgar, lơh kơnhăp jơh ală rbòng dà, lơh hìu bơsram, cơldŭ bơsram, mờ dong kờl làng bol bơtàu tơnguh lơh gơlik phan bơna.  Bal mờ hơ̆, tàm 3 ƀòn jơi bơtiàn dồ êt nă cau, geh: Chứ, Tum mờ Chờ tŭ do ờ gam tai hìu lơh ing, hìu ồm sèt ñhăt dà mìu. Tŭ do, khà hìu rƀah bơh xã dê gơmù mìng gam hơđơm 8%, priă lơh geh kờp bal dồ nă cau geh rlau 42 tơlak đong. Ƀí thư Đảng ủy xã Ya Ly ồng Phan Chí Thiện đơs nền, nàng lơh geh bơta tam gơl pràn mờ lơh geh tơl ală broă jàu tàm bơ̆t bơtàu ƀòn lơgar pa geh gơnoar broă kwơmàng bơh Ƀí thư Ci ƀộ 3 ƀòn jơi bơtiàn dồ êt nă cau dê mờ pơnrơ bè Ƀí thư Ci ƀộ ƀòn Chứ ồng A Thoải. Ồng Phan Chí Thiện, Ƀí thư Ci ƀộ xã Ia Ly, đơs: Tàm broă bơ̆t bơtàu ƀòn lơgar pa kung bè ală broă lơh bơh xã dê den ồng A Thoải lam lơh kràñ cê jơh nùs ngan. Ồng A Thoải sồr ală hìu bơnhă mờ geh wàng kơnrồ ờ sàng goh  ntrờn tĕ. Hòi jà, mblàng yal bàr pe nă làng bol in pà ù lơh gùng ai ƀòn lơgar pa in. Hơ̆ sồng bal mờ Ci ƀộ tam bơkàu lơh geh ù tiah ƀòn lơgar tơlir- sàng goh- niam.

Bơta geh ngan pà gŏ mpồl Ƀí thư Ci ƀộ tàm ală thôn, ƀòn jơi bơtiàn dồ êt nă cau tàm càr Kon Tum geh gơnoar broă kwơmàng tàm broă lơh bơ̆t bơtàu Đảng mờ kơnòl broă bơtàu tơnguh lơh sa, mpồl bơtiàn tàm ƀòn lơgar. Bơta do sơlơ geh đơs nền tŭ lơh jăt jơnau sồr tơrgùm dùl gơnoar broă Ƀí thư ăt bal gơnoar broă Kwang ătbồ thôn, tus tŭ do, càr Kon Tum neh geh 410 tàm 756 nă Ƀí thư Ci ƀộ ăt bal gơnoar broă Kwang ătbồ thôn, Kwang ătbồ Mpồl làng bol tiah drà. Ƀí thư Ci ƀộ ồng A Sao, ătbồ gơnoar broă Kwang ătbồ thôn Kon Teo Đăk Lấp, xã Đăk Long, kơnhoàl Đăk Hà, pà gĭt: broă uă rlau mơya ƀươn ƀoài ngan tàm tŭ sồr lơh, lơh jăt broă lơh bơh thôn dê. Bơh broă lơh krơh mờ đơng lam bơh ồng A Sao dê, 230 hìu làng bol bal mờ 1 rbô 200 nă làng bol kòn cau Sơdàng thôn Kon Teo Đăk Lấp ală nam rềp ndo neh khin cha tơrmù bă ù tam bùm blàng, tơngời, kòi mìr rề ơnàng uă bă ù tam kơphê, kau su mờ tờm chi sa plai. Ƀí thư Ci ƀộ thon Kon Teo Đăk Lấp, ồng A Sao, đơs: Kơnòl là cau lam bồ tàm thôn, añ pơđơl pràn ngan hòi jà làng bol geh sươn ngui jơh tàm ròng phan, tam chi sa plai. Añ kung pal lơh gơtùi den hơ̆ sồng gơtùi đơs làng bol. Lơh ai làng bol in gŏ, lơh jăt geh pơgồp bơnah ai thôn he dê in geh niam chài rơhời lik klàs rƀah dồ bă kơ̆ kơl jăp.

Nàng ngui niam gơnoar broă bơh mpồl Ƀí thư Ci ƀộ dê tàm ală thôn, ƀòn jơi bơtiàn dồ êt nă cau tàm bơ̆t bơtàu ƀòn lơgar pa, ală Đảng ƀộ ƀòn lơgar tàm càr Kon Tum sùm sền gròi tus broă bơto bơtê, tề lam mờ bơto yal jơnau gĭt wă nàng mpồl Ƀí thư Ci ƀộ in gĭt nền gùng dà, jơnau sồr, mơkung tơl pràn bơto pơlam, ià tê sơñio broă ai làng bol in tàm lơh broă lơh sa. Ồng Trần Ngọc Trực, Ƀí thư Đảng ủy xã Đăk Long, kơnhoàl Đăk Hà pà gĭt broă lơh mờ duh broă sùm Đảng ủy xã dê neh lơh jăt nàng ngui niam gơnoar broă bơh 5 nă Ƀí thư Ci ƀộ thôn jơi bơtiàn dồ êt nă cau dê tàm bơ̆t bơtàu mờ rề ơnàng broă lơh bơtàu tơnguh lơh hìu bơnhă dê, bè do: Bơh broă đơng lam, sồr lơh, Đảng ủy bơyai lơh ală dơ̆ ai ală oh mi Ƀí thư Ci ƀộ in să tờm lòt sền, lùp bơsram ală broă lơh jak. Tus tơngai do, lam lơh geh 5 broă lơh bơtàu tơnguh lơh sa tơnguh uă priă lơh geh gơ wèt mờ cau làng bol jơi bơtiàn dồ êt nă cau. Khà hìu rƀah gơmù uă ngan pơndrờm mờ ală nam lài. Khà hìu bơnhă tơl ngui tơl sa gơguh tai.

Tus tŭ do, càr Kon Tum neh geh 44 xã geh dờp lơh geh tơl jơnau sồr bơ̆t bơtàu ƀòn lơgar pa, tàm hơ̆ geh 4 xã lơh geh tơl jơnau sồr bơ̆t bơtàu ƀòn lơgar pa gơguh jơnhoa mờ 1 xã lơh geh tơl jơnau sồr bơ̆t bơtàu ƀòn lơgar pa lam lơh lài. Bulah ală thôn, ƀòn jơi bơtiàn dồ êt nă cau tàm càr Kon Tum mìng tơrgùm uă tàm tiah sar lơgar ngài mơya tus tŭ do kung neh geh 45 thôn, ƀòn lơh geh tơl jơnau sồr bơ̆t bơtàu ƀòn lơgar pa. Nàng broă bơ̆t bơtàu ƀòn lơgar pa tàm tiah jơi bơtiàn dồ êt nă cau tàm càr geh uă tam gơl niam, rài kis mờ lơh broă lơh sa bơh làng bol dê rơhời tam gơl uă sùm geh mpồl cau lam lài là mpồl Ƀí thư Ci ƀộ tàm ală thôn, ƀòn dê.