VOV.K'Ho - Ngai do, tàm Ƀlàng dờng Ba Đình, ƀòn dờng Hà Nội geh bơyai lơh dơ̆ tơngkah, ai ling lòt pơdar, làng bol lòt pơdar tơngkah 80 nam Kac màng nhai 8 lơh geh cồng nha mờ Sơntờm dà lơgar 02/9. Bal mờ hơ̆ là dồ ròt ală broă niam chài, đơs crih tamya, cuh phău bơkàu,… geh bơyai lơh tàm làm gùt dà lơgar.
Ngai 02/09 kung là tơngkah kir sơnrai ngai sang rài Củ tịc Hồ Chí Minh dê- Cau neh đơng lam Đảng he, Làng bol he, dà lơgar he sơrlèt rlau gĭt nđờ rbô kal ke, lơh geh ală cồng nha dờng ngan tàm dơ̆ tam lơh mờ bol sò tơm thàm phà dà lơgar he dong klàs jơi bơtiàn, sền gàr Dà lơgar mờ bơ̆t bơtàu dà lơgar. Jơh bal cau kra, cau kơnòm, ndrờm hơ bơsram mờ lơh jăt Wa Hồ, tơrgùm bal pràn dùl nùs bal bơ̆t bơtàu ƀòn tờm dà lơgar tờm ngai sơlơ dờng niam rlau, pas pràn rlau.