Akaok mintri, akaok Ủy ban bangsa Đỗ Văn Chiến

 

Akaok mintri, akaok Ủy ban bangsa Đỗ Văn Chiến – Phó akaok Mban pato tacei, akaok mban peih nyaom roya pakat negar dom bangsa takik Việt Nam mbang ka II thun 2020 bahrau ba akaok kapul pasang iek taong abih bruk caga ka nyaom roya. Akaok mintri, akaok Ủy ban bangsa Đỗ Văn Chiến ndem lac, khik kajap bruk pacang caga jit Covid 19 lac sa bruk ngak praong abih, biak iek glaong, ieu kakei mBan padang bruk ramik ngak pasiam viek taong abih dom adat di nyaom roya tui panuac kakei di mintri Y tế piah khik ka bruk pacang caga jit Covid-19 hu siam di abih. Adat ni hu brei tapa di mbang nyaom caga dahlau saong in tabiak 3.000 blah piah parabha ka taong abih dom urang mai hu mbaok dalam nyaom roya.

Pambuak tal urang ruak Covid-19 ka 1342, mesup ni (2/12), Đại học Công nghệ TPHCM (HUTECH)  khan lac brei padeih dom bruk pato pakai  song bac  di tong abih dom  cơ sở meng harei 2/12 tal  abih harei 6/12/2020. Jeng pambuak tal 2 urang ruak  1342 song 1347, dom  sinh viên di sang bac  Đại học Sư phạm song  Đại học Khoa học Tự nhiên TPHCM hu brei daok karei, cang bruk dut iek. Sang bac Đại học Khoa học tự nhiên ban raya khan lac  brei  sinh viên Khoa Công nghệ thông tin salih tapa bac online. Đại học Tôn Đức Thắng jeng khan lac brei padeih bac pataom gauk  di cơ sở prong di phường Tân Phong, quận 7 tal abih harei  6/12/2020.

Pasak pasang iek ruak kik tỉnh Cà Mau brei thau daok peih bruk brei daok karei di sang urang F2 di urang ruak ka 1.347 – cei gru pato sap Anh di ban raya HCM. Urang F2 lac kumei, 19 thun (daok di xã Khánh Tiến, huyện U Minh, Cà Mau), daok gam sang trọ haong urang F1 daok tui bac sap Anh kayua urang ruak ka 1.347 dang pato. Anak bruk njom mbak jit ruak Covid-19 daok rah tabiak sarau kadau, akaok UBND tỉnh Cà Mau bahrau hu harak pathau khan samar drah pato tacei paglaong dom bruk pacang caga jit ruak. Bhap bini njauk cuk pataih pacang pabah di labik hu rilo manuac. Dom bruk pataom rilo manuac njauk ngak tui dom panuac kakei, pato tacei di gah y tế.

Mesup ni (2/12), jalan pasei  Bắc- Nam labik tapa  tỉnh Khánh Hòa hu brei radeih pasei nduac veik, min tapa dom labik glut jaleih, bahrau dauk ia  brei peih nduac biak suai. Dahlau di nan kayua hajan dui atah  di melam 30/11, jalan pasei  Bắc- Nam labik tapa tỉnh Khánh Hòa njauk glut, jaleih jalan, ia dauk dalam. 9 kapul radeih pasei  Bắc- Nam dok peih njauk padeih veik di dom mblang radeih pasei di tỉnh Khánh Hòa. Gah jalan pasei hu ba  35 sruh radeih pajeng tuai , pajeng labaih 1.200 urang  piah ka dom urang nan nao tal labik.

Dah page ni, kapul daong duah urang njauk bala tỉnh Lâm Đồng hu duah mboh rup tau tuai ka dua njauk ia sua ba seik tuk rivang main di mblang bien pakat negar Bidoup - Núi Bà. Urang njauk bala lac saai N.T.H.M. (31 thun, daok di ban raya HCM) hu duah mboh chip di ala takai tatua tuan njauk ia sua. Dahlau di nan, di bier harei 29-11, dalam tuk nao iek mblang bien pakat negar Bidoup - Núi Bà, kapul urang tuai nao tapa tatua tuan (xã Đạ Chais, huyện Lạc Dương) piah tabiak jalan roya 27C ye hu ia sua tuh trun, dui seik mbaik tatua gam saong 5 urang tuai saong sa urang ba kapul.

Cao ủy Liên Hợp quốc ka urang tị nạn hu pok panuac tagok rajaei Ethiopia ka bruk brei adat nao tal 96 ribau urang  tị nạn Ê-ri-chin (Eritrean) di bhum gah brak Tigray – labik yau njauk pacang cakak meng harei  4/11, tuk Thủ tướng Ethiopia Abiy Ahmed brei tong tame hadei di tuk gah Mặt trận Giải phóng bhap bini Tigray taong tame sa labik quân sự. Dahlau di nan, Ủy ban Chữ thập đỏ dunya brei thau, jru tavoa song dom pandap panda, pandap y tế di dom labik iek glang pren yava  di labik ni dok kurang, daok biak takik. Meng tuk bruk mesruh gauk rah tabiak di  Tigray, hu labaih 44 ribau urang  nduac tapa Sudan plaih bala.

Rajaei Nhật Bản hu ba tabiak bruk rok tuai negar langiu biak rilo mai maong iek Thế vận hội Olympic Tokyo bilan pandiak 2021, bo oh ieu kakei klauk jru atau pasang iek jit. Min tuai mai tal brei hu harak dut iek lac âm tính haong vi rút SarCoV-2 saong brei tame ứng dụng tui iek y tế dalam phone par tangin tuk tame negar. Urak ni mban peih bruk Olympic 2021 hu pablei jaik 1 triệu vé ka tuai negar langiu saong jaik 4,5 triệu vé ka bhap bini dalam taneh ia.

Harei ni (2/12), hãng kapan haoh Boeing di  Mỹ hu ngak salah dom bruk ngak iek  10 harei ngan song 5 sruh kapan haoh phản lực peih tự động di Australia. Ni lac sa bruk cakrok patagok biak prong di Boeing song gah công nghiệp kapan haoh dalam tuk patagok công nghệ eng drei peih ngak. Urak ni bol bala dom negar biuh jien tabiak ngak dak harei dak rilo  tame công nghệ tự động, duah jalan ngak song phun jien takik jang, siam mekre jang piah patagok di abih dom prein khang. Tui kuhria mbang par camereip hu peih tabiak dalam thun ni song  Boeing meda peih bruk ngak tabiak rilo di kreih 10 thun ni./.

Urang lang: Thu Thảo-H.Pha  2/12/2020 16:15:48

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân