Bruk jhul pasamar bruk oh pandar bayar jien tapak dalam gah y tế piah pamaong tal bruk bruk sangka iek prein yawa thông minh hu jhul pasamar peih ngak. Yau nan min, urak ini hu labaih 50% bhap bini oh ka hu tài khoản gilang pariak atau bayar jien tapa thẻ điện tử. Bhap bini pandar dom dịch vụ y tế oh ka takre bo pandar thẻ bayar jien iek ruak yau nan ye sang iek ruak daok suai damuai peih ngak bruk baray jien tapa thẻ.

Urang ruak ngak the piah bayar jien iek rua di Sang iek ruak Từ Dũ

  Sa-ai Dương Ngọc Quỳnh Như, umo 32 thun, daok di quận 7 Ban raya HCM daok metian anek, tuk mai iek ruak di Sang iek ruak Từ Dũ, Ban raya HCM, sa-ai oh dang cang tui talei piah bayar jien iek ruak yau dahlau diah kayua sa-ai bayar jien tapa thẻ ATM. Sa-ai Như buh jien tame thẻ, hu mã số iek ruak dalam hệ thống  di sang iek ruak: “Nao iek ruak mbang camereip ye urang tacei pato ngak thẻ ATM di sang iek ruak Từ Dũ. Hu thẻ blaoh ye bac sĩ iek ruak blaoh brei cakak jien dalam thẻ, oh daok nao tapa labik bayar jien. Meda buh rilo jien sa mbang piah dom mbang hadei mai iek ruak.”

Di Sang iek ruak Đại học Y Dược TP.HCM hu peih ngak ứng dụng tut angan iek ruak saong bayar jien tapa trực tuyến hu pagam thiết bị thông minh, tui rilo jalan bayar jien iek ruak oh pandar jien tapak yau quẹt thẻ, bayar jien tapa internet banking saong cih tapa QR code, saong birau di abih lac bayar jien tapa ví điển tử Momo.

Tiến sĩ Thái Hoài Nam, Phaok akok Sang iek ruak Đại học Y Dược TPHCM brei thau: Mbiah tal ini, bruk bayar jien iek ruak tapa thẻ meblah hu labaih 35% jien iek ruak di sang iek: “Biak mbon mbiah urang ruak hu bayar jien iek ruak bo oh cang tui talei, abih takik tukvak cang, takik ngak harak ba-ar, saong daong sang iek ruak  trun takik urang ngak bruk saong khik iek hu lagiah jang.”

Sang iek ruak Từ Dũ saong Sang iek ruak Đại học Y Dược TPHCM tok takik dalam dom sang iek ruak hu pandar ứng dụng camereip dalam bruk bayar jien iek ruak tapa thẻ. Yau nan min, di Sang iek ruak Từ Dũ  ribau ba tame ngak di Khoa iek saong jru ruak tui hatai caong khin. Tui bác sĩ chuyên khoa 2 Trần Ngọc Hải, Phó Giám đốc Sang iek ruak Từ Dũ, labaih 60% urang mai iek ruak lac urang kumei saong daok di tỉnh xa, daok dom bhum palei, takik pandar cong nghe, điện tử, thẻ ATM, yau nan ye piah tacei pato dom urang ruak hu thau saong ngak tui gaok biak rilo kan kandah: “Khol dahlak buh tabiak rilo prein yawa dom urang tacei pato ka urang ruak, tacei pato di labik piah urang pandar thẻ. Jeng hu dom urang tacei pato piah urang mek veik jien daok labaih di thẻ điện tử dalam thẻ iek ruak di sang iek ruak Từ Dũ tuk hu urang ruak khin mek jien tabiak.”

Di ban raya HCM, tok hu jiak 10 sang iek ruak mek bayar jien tapa thẻ. Di dom sang iek ruak hu rilo urang mai iek ruak labaih 500 mbang yaok harei, yau Bệnh viện Chợ Rẫy atau Bệnh viện quận Thủ Đức, bruk bayar jien iek ruak tapa thẻ hu peih ngak meng dom ini mai, min bhap bini oh takre ngak.

Ong Nguyễn Lê Nhật Khánh, Phó Trưởng phòng Tài chính kế toán, BV quận Thủ Đức brei thau: Sang iek ruak hu ba tame pandar mac POS piah bayar jien iek ruak meng kreh thun 2016, mbiah tal urak ini  meng hu jaik 10% urang ruak hu pandar, ralo urang ndik veik iek ruak: “Dahlau di nan hu ba mac POS tame pandar min urang ruak oh pandar, urang ba thẻ mek jien tapa ATM mai bayar jien iek ruak, urang huac quẹt thẻ nyu meda lahik thông tin di urang, gak mai bayar jien tapak  mboh sahanang jang tapa thẻ bo oh thau nyu pandar hu ha-oh.”

Bruk ba tal bayar jien iek ruak tui jalan điện tử daok kan kandah kayua 3 gah nan lac: urang ruak, sang iek ruak saong gilang pariak. Dom sang iek ruak brei thau, bruk pagam phần mềm bayar jien saong danak dak daok rilo kan kandah. Langiu di nan, tukvak langyah bruk buh jien tame, mek jien tabiak saong bayar veik jien daok labaih tame thẻ daok suai damuai, oh njauk bruk pamaong tal brei takik harak gal, abih takik tukvak urang ruak daok cang. Abih di nyu, jien phí gilang pariak chiat, hu dom sang iek ruak njauk brei bayar jien phí tal 1 tỷ đồng dalam 1 thun ka bruk ini. Kayua oh mek jien phí di urang ruak, sang iek ruak oh ka hu cơ chế saong jien bayar ka bruk ini.

Piah jhul pasamar bruk oh bayar jien iek ruak tapak, sang iek ruak brei ngak tui quy trình nghiệp vụ iek ruak, jru ruak brei bayar jien tui jalan điện tử  saong khan brei ka dom khoa phòng, labik ngak gah iek ruak di đơn vị. Sang iek ruak brei pambuak saong dom gah pablei dịch vụ, jabat truyền thông piah pathau khan, tacei patao urang ruak, gauk gar di urang ruak thau kein lagaih jeng yau thau pandar piah ngak tui. Abih di nyu, njauk brei duah  rilo gah pambuak bruk bayar jien, gam abih takik jien phí, gam daong urang ruak hu palih ruah jalan bayar jien lagaih saong drei./.

Urang lang: Aí Nghiêm - 01/11

 

HỆ PAPAR SAP BANGSA VOV4 BHUM BAN RAYA HCM

Labik daok: 75 Trần Nhân Tôn, Phường 9, Quận 5, TP.Hồ Chí Minh
Yam ndok : Trần Văn Thao
Phaok yam ndok: Cao Thị Thoa, Trần Xuân Thân