Palei Cam 4, xã Xuân Hưng, huyện Xuân Lộc, hu jaik 490 baoh sang gam saong labaih 2.000 urang. Palei 4 lac labik hu rilo urang Cam di bih dalam tỉnh Đồng Nai. Dahlau di ini, kayua takik tabiak gah lingiu, bruk ngak mbang pagam pambak tame 2 vụ padai ia nan ye rai diuk di mikva kan kandah, rambah rambeip.

Tukvak tapa, hu bruk pathau khan, daong biak siam di karja  Xuân Hưng, urang Cam dalam puk kham merat bac megru, ba tame pandar dom ilamu birau dalam bruk ngak mbang. Meng nan, bruk ngak mbang di mikva hu patagok biak rilo. Yau sang ong Abdol Kholeh hu labaih 1 ha taneh ngak padai saong njam patam, dalam rilo thun tapa, ong buh tame rilo prein yawa piah iek glang min oh hu kein lagaih, kayua bruk pala drak tui jalan klak. Thun 2015, hu bruk daong di karja palei, ong khang hatai mesre 100 trieu dong meng gilang pariak ngak nong huyện piah salih tapa raong limo saong salih abih taneh hamu tapa pala thanh long hatai bhong. Meng thau pandar ilamu birau tame bruk pala drak, bein thanh long brei rilo baoh. Yaok thun, baoh sang ong duah jien tame jaik 100 trieu dong meng bein thanh long. Meng sa baoh sang kathaot, urak ini sang ong Abdol Kholeh hu kaya meda jang saong ong jeng sa urang nak nong naih joi di xã Xuân Hưng.

Ngak tui sarak bangsa saong bruk padang ngak palei pala birau, tukvak tapa, huyện Xuân Lộc hu rilo jalan ngak piah paglong raidiuk mbang ngui daok dang ka bhap bini Cam. Dom danak dak patrun kathaot di Karja hu buh jien abih tih yaok pluh tỷ đồng piah ngak jalan mbak palei pala, ba mbuan lagaih ka mikva nao mai, pajeng ba pandap panda. Sang daok, điện truac hadah, ia pandar..hu buh tame ngak pasiam. Langiu di nan, mikva daok hu daong pato bruk ngak, duah bruk ngak, daong phun pajaih, anek pajaih piah pala drak, raong glang.

Sa-ai Mary Yah, akaok mban ngak bruk mặt trận Ấp 4, xã Xuân Hưng brei thau: Raidiuk mikva hu rilo salih birau. Meyah dahlau di thun 2010, labik ini jalan haluk, pandiak ye dhun mun, hajan ye gluh baok; baoh sang hu pandar điện, ia hacih lac biak takik, labaih meteh palei lac sang urang kan, ye tal urak ini, dom sang kathaot trun daok 9 baoh sang, jien mek tame kuhria tui kaok menuac hu labaih 46 trieu đồng yaok thun.

Ong Abdol Hamit, Hakim Sang megik Nourul Ehsaan di Palei 4, xã Xuân Hưng, huyện Xuân Lộc brei mboh hatai chreih chrai anak bruk salih birau di puk palei drei: Hu Ndang saong Karja daong ka mikva pak ini...raidiuk hu salih birau ralo.

Ong Đào Đức Qúy, Phó bí thư Đảng ủy xã Xuân Hưng, huyện Xuân Lộc, tỉnh Đồng Nai brei thau: “ Dalam xã urak ini daok 38 baoh sang kathaot A, dalam nan hu 10 baoh sang urang bangsa takik kan kathaot. UB bhap bini xã hu patabiak bruk ngak brei trun kathaot. Kham merat meng ini tal puac thun 2020 oh daok sang kathaot thaot A ini”.

Meng dom sarak daong biak rilo di Đảng saong Karja gam saong bruk kham merat yam tagok di bhap bini Cam kan kathaot, dom baoh sang kathaot di xã Xuân Hưng, huyện Xuân Lộc, tỉnh Đồng Nai  hu trun daok takik./.

Urang lang: Aí Nghiêm -11/10/2020

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân