Lac sa pasak kinh tế prong di taneh ia, ban raya Hồ Chí Minh lac labik pablei salih nao mai haong rilo drak pasa dalam song langiu negar. Rilo urang Chăm pak ni sami samar peih prong bruk palei salih piah ngak kaya meda. Bruk yam tagok dalam palei salih di urang Cam dok di ban raya Hồ Chí Minh hu rik dong tame bruk patruh eik patrun kathaot, ba bruk ngak ka yaok ribau urang ngak, rik dong tani tanat an sinh xã hội. Urang kamei doanh nhân Sa Y Dah lac sa dalam dom urang nan, daa mik va song tong abih gauk tui pang tapa kadha vak di Ái Nghiêm yaih khan ka urang kumei doanh nhân ini::

 

Saai  Sa Y Dah ndik tapui thun  1983 di ban raya  Hồ Chí Minh dalam sa boh sang urang  Chăm kathaot  mai meng bhum palei  tỉnh An Giang. Dahlau di tuk jeng sa  doanh nhân dalam gah pablei salih khan aow  Chăm Islam, Sa Y Dah hu tuk vak ngak đầu bếp ka sa quán mbang di urang Islam  Malaysia, bloh ngak  lễ tân ka sa khách sạn hu angan je di Sài Gòn.

 

Padang mbang ngui di  Sa Y Dah meng bruk palih ruah khan aow  Chăm Islam ka tuai  Malaysia. Bruk naih gheih ka khan aow Chăm Islam  di saai hu mbloh tabiak. Tal thun  2010, saai  Sa Y Dah yam tame bruk palei salih khan aow  Chăm song ngan saong  đơn đặt hàng 2.000 baoh kapaik tuak di urang likei Islam. Hadei di nan, saai  pah  labik pablei pandap sit dalam drak pasa Bến Thành pablei di tuk melam.

 

Oh padeih veik di pandap meng kan, saai Sa Y Dah daok duah thau dom janih bingu la bahrau piah ba tame pandap di drei tui hatai takre di tuai damuai. Dom pandap kayua saai ngak lac biak mekre saong hu rilo janih yau: telekung – khan aow ngui cuk di urang Islam, khan aow, tanyiak, khan me-om. Dang anak yaok ribau pandap di saai takik mboh hu dreih gauk gah bingu la, kiểu cách, kayua yaok janih pandap di saai jeng hu sahneng duah, ngak karei jang nan ye hu dom  cửa hàng, labik pablei pandap lưu niệm blei mai pablei ka tuai dok dalam song langiu negar. Tapa nan, rilo tuai damuai thau tal pandap di saai, nan ye pandap di sa-ai pablei hu dak harei dak rilo jang. Hu phun jien, saai blei veik  cửa hàng di pasa  Bến Thành song mek angan lac  Abdul Aziz song  Saedah. Langiu di nan, saai  Sa Y Dah dok hu dom  shop karei tra.

 

Tapa rilo thun peih prong bruk palei salih, cửa hàng khan aow Chăm Abdul Aziz song  Saedah tui kuhria yaok thun duah hu jiak 1  tỷ đồng. Saai  Sa Y Dah hu ba bruk ngak ka labaih  10 adei saai, yaok urang duah hu meng  4 tal  5 triệu đồng sa bilan. Tuk bruk ngak mbang jak jeng, saai  Sa Y Dah buh jien kadung di drei  tapa dom negar  Malaysia, Ấn Độ, Campuchia…hu mbaok tame nyaom drak pasa , parang iek, yaih khan dom pandap khan bai di drei, jang yau bac megru bruk ngak mbang . Meng nan, hu rilo hợp đồng yaom yaok rituh  triệu đồng. Meng tari tarieng, oh huac glaih glar, saai tuk halei jeng hu dom jalan ngak cambaih laih ka bruk ngak di drei meng di tuk ngak tabiak pandap bahrau jang yau khik tani tanat drak pasa song peih prong drak pasa bahrau. Meng nan, bruk pablei salih di sang saai tuk halei jeng tani tanat song cakrok patagok, thun hadei kein jang thun dahlau. Saai lac:  “Urak ni, langiu di bruk patagok drak pasa dalam negar, hulin dok hu drak pasa pablei tani tanat ka Malaysia. Anak tal, hulin bac megru duah thau piah ngak tabiak dom pandap panda bahrau pabak ka hatai cong khin di tuai damuai. Tapa nan, drei hu jalan patagok, yaih khan pandap meng kan Chăm di Việt Nam, ngak brei drak pasa negar langiu thua tal, gam tagok jien mek tame, gam khik ramik ilamu bangsa di drei”.

Meng naih gheih  song kham merat dalam bruk pablei salih, saai  Sa Y Dah song dom urang menyim khan bai , urang thiết kế di  cửa hàng khan aow  Chăm Abdul Aziz song  Saedah dok ngak tabiak dom pandap panda ndung bak ilamu meng kan, dong ba khan bac  Chăm Nam bộ nao atah jang./.

 

 

 

 

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 75 Trần Nhân Tôn, Phường 9, Quận 5, TP.Hồ Chí Minh
Yam ndok : Trần Văn Thao
Phaok yam ndok: Cao Thị Thoa, Trần Xuân Thân