Cục Kapal haok Việt Nam padeih brei adat ka dom mbang par mai  Việt Nam meng dom negar, bhum taneh hu njom mbak anek ruak bahrau di virus SARS-CoV-2 song jit ruak rah tabiak kan kandah, dahlau di abih lac meng negar Anh, Nam Phi. Bruk ni hu mintri jalan mbak pajeng ba brei thau dalam harak samar drah payua tal dom jabat pagam tal  peih ngak sarak  01 di Thủ tướng rajaei ka  bruk patagok pacang  caga  Covid-19. Cục Hàng hải Việt Nam jeng hu tacei pato cảng vụ hàng hải pambuak bruk song dom jabat:  biên phòng, dut iek  y tế tagok bruk khik ramik, pasang iek oh caik ka urang angaok kapal gilai tagok angaok thu.

Dah page ni (13/1), mbang nyaom ka 26 HĐND tỉnh Kiên Giang mbang IX brei tapa sarak ka bruk buh jien tame ngak danak dak hệ thống an ninh công nghệ glaong ka 3 bilai pasang iek biên phòng di ban sit  Rạch Giá, Hà Tiên saong ban sit Phú Quốc. Danak dak kayua Bộ Chỉ huy Bộ đội Biên phòng tỉnh peih ngak meng thun 2021-2024, buh jien tame pablei pandap panda pasang iek, langyah thaot binguk, mac pasang iek kadung bak, kadung par tangin.. ngan haong yaom abih tih jaik 60 tỷ đồng. Jalan ngak ni piah khik siam abih ka gah an ninh, saron mbon labik pabah mbang negar, pasang iek catang urang tame, tabiak negar.

UBND TPHCM bahrau njauk hatai haong bruk ba tabiak lactrun jien pandar taneh pablei pandap di dom drak pasa meng kan dalam ban raya tui panuac likau di Sở Công thương. Tui nan,  UBND dom quận, huyện brei trun meteh jien dịch vụ pandar taneh pablei pandap di dom drak pasa meng kan  dalam tuk vak 6 bilan, meng bilan  7 tal bilan  12/2020. Jien piah ngak bruk di dom drak pasa dalam tuk trun jien  dịch vụ pandar mblang taneh hu kuhri kuhria meng jien mek tame di dom kadung jien.

Harei 12/1, di Ninh Thuận rah tabiak bruk mbaoh tangin tame harak pambuak bruk cak rok patagok rivang main sinh thái, padeih padai, ravang main bein pakat negar Núi Chúa saong Công ty buh jien tame ngak sang danaok saong pablei salih Anh Phát. Dua kapul ni meda pambuak gauk padang dom labik rahra daok piah cak rok patagok rivang main dalam rahra; khik ramik dom labik mbuan njauk urang lih tame, ngak khut; padang dom labik pataok gilai, khách sạn di dom vịnh, tasik di Ninh Thuận saong dom tỉnh jaik taphia. UBND tỉnh Ninh Thuận brei thau labik taphia tasik meng Vĩnh Hy (huyện Ninh Hải) tal bhum tasik Cà Ná (huyện Thuận Nam) hu ba tame quy hoạch labik cak rok patagok rivang main praong di taneh ia. Tỉnh daok ngak harak gar payua tagok UNESCO brei angan bein pakat negar Núi Chúa lac labik khik ramik langik tasik di dunya.

Mesup ni (13/1), sa mbang megei boh taneh khang 3,6 độ richter rah tabiak di huyện  Mường Tè (Lai Châu). Pasak brei thau bruk megei boh taneh  song riyak praong dok pasang iek mbang megei boh taneh ni. Dalam tuk nan, dom harei tapa hu tal  541 drei kubao, limo, pabe, saih song menuk ada metai kayua langik liar di bhum ceik gah brak. Mintri NN-PTNT, Tổng cục pacang caga bala meng langik tasik gam song dom tỉnh ban dok yaok pataom piah pok panuac likau rajaei dong ka mik va njauk khat lahik, saong daok peih bruk khik caga athur rong, phun pala, kaya ikan, patrun khat lahik. Tui kuhria mboh dahlau meng ni tal Tết anek sak kubao 2021 dok hu rilo mbang langik liar khang tuh mai negar drei.                 

Hạ viện Mỹ hu buh phiếu brei tapa sarak ieu Phó Tổng thống Mike Pence peih ngak Tu chính án 25 piah pajaleih Tổng thống Trump, hadei di bruk sarau kadhau rahtabiak di Quốc hội harei 6/1, ngak brei 5 urang metai. Piah peih ngak Tu chính án 25, ong Pence saong labaih meteh dom urang dalam rajaei di Tổng thống Mỹ njauk tabiak panuac lac ong Trumph oh hu prein ngak dom bruk di drei. Min, ong Pence tah klaak bruk ni, ndom lac bruk pajaleih nan oh ba mai kein laba siam abih ka taneh ia saong oh lagaih haong hukum negar. Tui kuhria, Hạ viện Mỹ daok  peih bruk buh phiếu brei padeih bruk ngan haong ong Trump di harei ni 13/1.

Mesup ni (13/1), Ủy ban Y tế song pren yava negar Trung Quốc brei thau: negar ni hu gac 115 urang njom  Covid-19, dalam nan hu tal 107 urang ruak dalam bhap bini. Yau nan, hadei di labaih 10 bilan, dom urang njom dalam bhap bini di Trung Quốc tagok labaih 100 urang dalam sa harei. Urak ni, hu 29 dalam 31 tỉnh, ban song bhum tự trị di Trung Quốc hu tabiak panuac, pachreih bhap bini oh nao palei dalam tuk Tết Nguyên đán.

Urang dang akaok jabat rajaei Nhật Bản Ka-tô Cát-su-nô-bu (Katsunobu Kato) harei ni (13/1) brei thau, rajaei negar ni daok patui bruk kuhria caga piah peih Thế vận hội Tokyo di bilan pandiak thun ni, hadei di tuk njauk brei padeih kayua jit praong Covid-19. Tui pasang iek bahrau abih di gah khau tin NHK (Nhật Bản) hu peih ngak di akaok bilan ni meng 1.300 urang meng umo 18 thun tagok, brei mboh tok hu 16% urang pachreih ka bruk peih Thế vận hội saong Paralympic Tokyo, dalam tuk nan hu jaik 80% urang lac njauk klaak atau brei padeih piah ngak hadei./.

Urang lang: Thu Thảo - H.Pha  13/1/2021 16:27:33

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân