Bruk brei thau song jao giải báo chí pakat negar  ka dak padang Đảng (Giải Búa liềm vàng) mbang ka V thun 2020 hu rah tabiak tuk melam blaoh di  Hà Nội. Dalam  1.710 kadha hu mbaok tame, Mban peih bruk hu jao 1 giải đặc biệt, 5 Giải A, 10 Giải B, 16 Giải C, 27 Giải Khuyến khích song 8 giải brei kadha vak ghieh abih pathau khan ka nyaom roya Đảng, ka bruk khik caga jalan sahneng di Đảng; patagok hatai sahneng  ka dak padang Đảng; duah tabiak kreih camin bac megru song ngak tui jalan hadah krah di Hồ Chí Minh. Mban tacei pato giải hu palih ruah 3 urang naih gheih dalam dom kadha báo chí mek hu giải, dalam nan hu 2 urang lac bangsa takik.

Harei 13/1, di Đăk Lăk, Hội đồng bangsa; Ủy Ban ilamo, pato magru, dam dara saong ranaih di Quốc hội pambuak haong Ủy Ban bangsa saong Tỉnh ủy Đăk Lăk peih ginum biai ka jalan ngak danak dak cak rok patagok kinh tế-xã hội,  khik ramik saong patagok yaom glaong di ilamo meng kan bhum bangsa takik saong bhum ceik di dom tỉnh Tây Nguyên saong bhum kreih negar. Dom urang hu mbaok pataom tame ginum biai jalan ngak hu bruk cak rok patagok kinh tế-xã hội, langyah bruk taneh riya, iek praong taneh pala drak, ngak siam bruk tani tanat labik daok, tani tanat bruk ngak mbang, pala drak, tani tanat raidiuk mikva bangsa takik…

Mintri ngak nong song patagok palei pala  pambuak bruk song UBND ban sit Cần Thơ hu peih bruk pablei tabiak negar langiu lô brah akaok thun 2021 di Việt Nam tapa Malaysia song  Singapore labaih 1.600 tấn. Ni lac 2 drak pasa di nyaom 10 negar hu yaom jien mek tame prong abih  dalam bruk  pablei brah tabiak negar langiu di Việt Nam. Thun blaoh, gah padai brah mek hu jak jeng prong, yaom jien pablei brah tabiak negar langiu glong di abih kuhria dalam 10 mai ni. Bruk ni brei mboh pajaih padai daok siam tagok,  padai pahe, urak ni padai siam hu pala labaih 85% dom pajaih.

Tui jabat thường trực Ban pato tacei pacang caga bala meng langik tasik saong daong duah urang njauk bala, di dom tỉnh bhum ceik gah barak, mbang laar  khang ngak ka 375 drei kubao, 119 drei limo metai …. Taeng di tỉnh Lai Châu, laar khang ngak ka labaih 100 drei athur raong metai, khat lahik tal bruk raong glang, ngak kan kandah tal raidiuk di bhap bini. Dom gah chức năng hu ba tabiak harak pato tacei dom jalan pacang caga laar, iek lipa ka anek thur raong, kaya ikan saong padang sa kapul ngak bruk piah pato tacei pacang caga laar ka thur raong di dom baoh sang.

  Mesup ni (14/1), di phường An Phú, ban sit Thuận An, tỉnh Bình Dương pui khuah khang ralai abih labik pablei radeih máy song sa binah  labik pablei takhaok. Biak metuak dom urang dok hu mbaok di pak nan samar nduac tabiak gah langui nan ye oh hu urang halei njauk hagait. Min. labik pablei radeih máy prong labaih 200m2 njauk pui mbang abih, jaleih trun, rilo radeih máy khuah daok talang; sa binah tabung ton di labik pablei takhaok nyu jaleih. Pui khuah ngak ka bruk nao mai di pak ni srau kadau.

Hạ viện Mỹ harei 13/1 ginum biai saong buh phiếu brei tapa sarak kaoh duas Tổng thống Donald Trump ngan haong panuac lac pachreih bruk sarau kadhau. Yau nan, meng bruk ni, ông Đô-nan Trăm jeng Tổng thống Mỹ camriep njauk kaoh duas dalam 1 vaktu ngak bruk di drei. Hadei di tuk hu brei tapa di Hạ viện, sarak hu ba tagok Thượng viện lac labik rah tabiak mbang langyah ong Trum tui hukum.

Dom urang ilamu di Viện Hàn lâm Khoa học Nga hu duah tabiak  jalan pacang cakak Covid-19 meng bruk pandar sa janih enzyme hu dalam nọc ala. Dom  urang sinh vật học duah mboh lac, siam di abih lac jru mek di ala ia Nikolsky, hu  hoạt tính metai virus khang pacang veik anek ruak Covid-19. Dom janih ala ni dok di tây nam Nga song Ucraina.

Rajaei Indonesia brei thau meda ngak tui jalan “brei nao, brei mai” dalam bruk klauk jru vắc-xin Covid-19 ka bhap bini negar langiu. Tui nan meda klauk jru caga ka rahra negar langiu di negar ni, mayah rahra Indonesia di negar langiu hu klauk jru. Indonesia hu parabha kadung jien kanja yaom 156 tỷ Rupiah ka bruk daong khik rahra di drei dalam thun 2021, dalam nan hu gam bruk klauk jru pacang caga vaccine Covid-19./.

 

Urang lang: Thu Thảo – H.Pha  14/1/2021 11:00:32

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân