Tapon limo di urang bangsa dak harei dak rilo 

Dalam tỉnh Ninh Thuận urak ni hu labaih  204 ribau  hecta glai song taneh glai. Dalam nan, glai  đặc dụng lac  41 ribau 728 ha, dok veik lac glai pacang caga song glai piah mek kayau. Piah ngak hu siam bruk khik iek glai, dom pakat, dom gah song karja pak ni hu peih ngak samu gauk rilo jalan ngak.

Mban khik eik pacang caga  glai Tân Giang urak ni dok khik iek labaih  25.880 ha glai. Thun  2017, Mban khik iek hu jao bruk khik iek glai ka kapul nyaom bhap bini dom xã Phước Hà, Phước Thái, Phước Vinh…ngan song taneh prong labaih  9.900 ha.

Ong Lê Minh Hiền, Akaok mbang khik iek  glai pacang caga danao Tân Giang, brei thau: Bruk jao glai hu bhap bini pachreih tui song peih ngak biak siam. Yaok adit, dom kapul parabha meng  2-3 boh sang  salih gauk nao pasang iek yaok labik glai. Meyah mboh dom bruk ngak suan ye khan ka po glai thau chip. Meng nan hu daong ka Mban khik iek pacang cakak chip bruk am cuh glai ngak puh, lih mek taneh glai, kaoh mek kayau suan hukum. 

Langiu di nan, meng pok jien dong di dom danak dak, dom mban khik iek glai hu tacei ba dom kapul bhap bini taduan khik iek glai peih dom bruk ngak kinh tế tui jalan khang kajap. Tapa nan, dong ka bhap bini hu jalan ngak mbang, dong ba bruk ngak song patagok jien mek tame.

Meng thun  2016 mbiah tal ni, dom gah po glai  hu jao ka dom kapul  bhap bini taduan khik iek glai tui dom danak dak  ngan song taneh prong  69 ribau  120 ha, yaom dong  300-400 ribau  đồng/ha/sa thun. Abih tih jien bayar ka dom kapul bhap bini lac labaih  58 tỷ đồng, rik dong salih bahrau rai duik ka bhap bini. Dom kapul bhap bini pandar siam lagaih pok jien hu bayar, blei labaih 1.420 drei limo, pabe, pabo, kibas, pabui song pala jiak  2.000 phun mbang boh piah peih tabiak jalan ngak mbang, tagok jien mek tame. Dom puk palei dok hu peih ngak bruk pala glai pablak song phun mbang boh hu yaom  kinh tế glong yau: bơ, kruac bung, panat…ngan song taneh prong  400 ha.

Piah ka sarak khik iek song patagok glai kak pagam song bruk patrun kathaot hu siam lagaih, ieu pataom pren khang di bhap bini dalam bruk hu mbaok tame khik iek glai, tuk vak anak tal, Chi cục Kiểm lâm tỉnh Ninh Thuận daok tacei pato dom po glai pambuak bruk song dom puk palei patagok taneh jao glai khik iek ka dom kapul bhap bini, patagok bruk pasang iek dom đơn vị dalam bruk peih ngak sarak bayar jien khik iek glai. Lingiu di nan, daok pataom tame padang ngak song pambak prong bruk ngak mbang, khik kajap bruk ngak mbang duah jien ka bhap bini./.

Urang lang: Hanipha- 16/7 

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân