Muk Nguyễn Thị Hồng, daok di palei sa, xã Tam Hiệp, huyện Châu Thành- urang dalam Kapul daong urang ruak kan kathaot, urang jaoh jo song uranaih metui medar tỉnh Tiền Giang. Lac urang kak kajap rai di drei song bruk ngak pahla, dong patrun pandik harao ka dom urang ruak kan kathaot hu rai duik kan kandah. Nhật Trường, urang vak di rayo sap ndom VN dok di bhum taneran krong Cuu Long hu kadha vak brei thau ka kreih camin hadah ini.

Dom uranaih metui medar, uranaih kan kathaot hu Jao pok jien bac

 

Thun  2006, muk Nguyễn Thị Hồng padeih bruk palei salih piah salih tapa ngak bruk pahla daong ka menuac urang. Nan lac bruk pambuak hong dom kapul ngak pahla  song dom sang iek ruak di ban raya  Hồ Chí Minh piah ba dom urang ruak kan kathaot nao blac draih meta, blac draih boh hatai oh mek jien, yau: dhar kapul Thiện Sứ (Kapul dong urang ruak kan kathaot, urang jaoh jo ban raya Hồ Chí Minh), Hiệp hội Doanh nghiệp Đức (SWHH), sang iek ruak  Nguyễn Trãi, Nhi Đồng 2 (ban raya  Hồ Chí Minh); bác sĩ Lê Trần Khánh Vân (sang iek ruak Chợ Rẫy, ban raya  HCM). Ngan song dom ruak meta, tal urak ni, muk Hồng hu dang tabiak ba yaok ribau urang nao iek ruak, daok ruak boh hatai jeng hu dom rituh urang. Langiu di dom urang ruak kan kathaot di  ỉnh Tiền Giang, muk  Nguyễn Thị Hồng hu dong ka rilo urang di dom  tỉnh karei yau : Bến Tre, Long An, Đồng Tháp.  Rilo urang sang kan kandah, amuk dang tabiak jak ba dom urang ngak pahla, kapul nyaom ngak pahla dong jien mbang huak, jien nao mai …dalam nan, dom mbang blac draih boh hatai meng dom pluh tal  jiak  100 triệu đồng. Bruk palih ruah, ba urang ruak nao tal sang iek ruak, abih di nyu nan lac ruak boh hatai biak tantu cambaih laih, muk Nguyễn Thị Hồng peih radeih mac nao taom gaok urang ruak rilo mbang, tacei pato, pambuak haong sang iek ruak piah ngak harak gar. Yaom lac bruk ngak ni oh hu jien bilan atau jien hagait karei, bo daok huak lisei sang, buh jien kadung dom triệu đồng sa bilan, min kayua abih hatai song xã hội, muk  Hồng chreih chrai ngak bruk pahla meng hatung hatian di drei.

 Drei sahaneng, drei oh kaya meda ye drei buh pren yava di drei nao duah urang hu jien ndo bo oh thau brei ka urang halei, dalam tuk hu menuac caong daong bo oh thau likau di urang halei. Ye drei lac menuac pambuak  talei piah dong , meyah urang halei caong khin, drei nao taom gaok urang ngak pahla , likau dong ka urang nan.

Kayua bruk iek ruak meta song ruak boh hatai brei saoh ka urang kan kathaot lac bruk ngak biak siam nan ye hu biak rilo menuac, rilo kapul ngak pahla pachreih tui muk  Nguyễn Thị Hồng dalam bruk nao duah urang ruak, dong pandap panda, radeih pajeng ba urang nao iek ruak. Jaik abih dom urang ruak hu muk  Hồng song dom kapul ngak pahla dong nao iek ruak jeng hu abih ruak, hu duik rai siam mekre. Bahrau ini, muk dok dang tabiak tacei jalan, dong ka rilo urang kamei kan kathaot nao iek dom ruak  phụ khoa brei saoh. Muk  Võ Thị Chín, urang pan akaok Kapul dong urang ruak kan kathaot, urang jaoh jo, uranaih metui medar  tỉnh Tiền Giang brei thau, muk Nguyễn Thị Hồng lac sa dalam dom  hội viên kham merat di abih. Dom bruk ngak di muk hu rik dong paglaong bruk ngak di Hội. Muk Võ Thị Chín khan lac: "Saai Nguyễn Thị Hồng tame Hội meng lavik mai. Sa-ai biak kham merat jak ba dalam bruk blac meta. Langiu di bruk blac meta, saai dok hu mbaok jak ba blac boh hatai. Ni lac sa urang kamei biak sami samar, meng hu saai  Hồng bo kapul dong urang ruak kan kathaot, urang jaoh jo, song uranaih metui medar  tỉnh Tiền Giang hu TW Hội alin brei harak meyaom. Saai Hồng  jeng hu TW Hội song UBND tỉnh brei harak meyaom”.  

Hu 13 thun kak kajap song bruk ngak pahla, yaom lac gleih glar min mbaok meta di muk Nguyễn Thị Hồng tuk lei jeng bui sambai chreih chrai, abih di nyu lac tuk mong mboh urang ruak abih ruak. Muk  Hồng brei thau, yaom lac umo  63 thun min dok biak takre bruk dong ka urang ruak kan kathaot: “ Hulin sahneng lac dok pren lac drei dok ngak . Ngak tal tuk halei bo drei oh dok ngak truh ye padeih. Kayua dom bruk ngak ni yaom lac oh trak damak, min brei hu hatai anit song pren yava piah nao mai”.

Huak lisei sang bo kuhria bruk di urang karei, sa bruk ngak hu makna prong glong di muk Nguyễn Thị Hồng, daok di  xã Tam Hiệp, huyện Châu Thành, tỉnh Tiền Giang lac sa bruk ngak brei mekre jang hatung hatai anit ranam anek menuac di urang kumei Viet Nam. Tuk halei jeng sangka dong ka dom urang hu rai duik kan kandah, piah ka dom urang nan hu duik rai bui sambai, khang kadang, muk  Nguyễn Thị biak njauk iek prong iek glong song pok meyaom  được trân trọng và biểu dương./.

 

 

 

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 75 Trần Nhân Tôn, Phường 9, Quận 5, TP.Hồ Chí Minh
Yam ndok : Trần Văn Thao
Phaok yam ndok: Cao Thị Thoa, Trần Xuân Thân