Rilo labik pachreih tuai mai rivang di bhum taneran krong CL 

Urak ini, di dom tỉnh: Ninh Thuận haong Bình Thuận, jit ruak daok pasang iek hu, oh hu urang njom bahrau Covid-19; tỉnh Bà Rịa – Vũng Tàu jeng oh hu urang njom mbak dalam bhap bini. Min bruk srau kadau njom mbak jit ruak Covid-19 mbang ka 2 daok ngak brei menuac sia oh khin nao du lịch, ba tal bruk ngak mbang di dom doanh nghiệp brei pah labik ndih daok, nhà hàng mbang huak… gaok rilo kan kandah. Tui amuk Trần Thị Thanh Tâm, po labik brei pah labik daok di ban sit Phan Thiết, tỉnh Bình Thuận, kayua huac jit, nan ye rilo harei tapa, dom tuai damuai jeng oh khin nao tal Bình Thuận, yaom lac dom labik mbang huak, ndih daok jeng ngak siam bruk pacang caga jit:

"Kol dahlak jeng hu ngak dom bruk pacang caga jit yau ye brei pataih pacang mbaok tuk tuai mai tal, duk iek pandiak dalam rup di taong abih tuai saong abih dom urang ngak. Dalam tuk ngak bruk, meyah mboh pandiak, patuk atau dom kadha yau pambuak tal jit ruak Covid-19 ye kol dahlak brei paatah  saong khan brei gah angaok thau piah hu jalan pambuak gauk iek glang tuai damuai dalam luac tukvak daok pah labik daok ini"

Ong Đinh Văn Quyết, Yam ndok labik ravang me-in Marina Vũng Tàu, tỉnh Bà Rịa – Vũng Tàu brei thau, meng tuk jit ruak Covid-19 tamuh veik, tuai mai tal labik ravang me-in biak takik, dom nhà hàng, dom labik ravang iek dom pulao trun 100%, labik pablei ia menyum, pablei cà phê trun 80% duk saong dahlau daih. Urak ini tuai mai tal labik du lịch bhian lac menuac dalam palei saong tok meyum cà phê. Ong Quyết daok brei thau, yaom lac tỉnh oh ka hu brei daok paaath di gauk, min taong abih dom tour njauk urang klaak abih:

"Dom labik ravang me-in di pulao kreik pabah mbang abih ye, nhà hàng jeng kreik pabah mbang tuk melam, cà phê hu pablei tuk harei min urang menyum rilo meng lac menuac dalam palei ".

Meng akaok thun tal ini, gah du lịch tỉnh Bà Rịa - Vũng Tàu trun labaih 30% tuai damuai saong 26,7% jien mek tame duk saong tukvak ini thun dahlau. Makna lac kayua jit Covid-19 nan ye rilo tỉnh ban brei daok paatah di gauk, bruk ravang, me-in…brei kreik pabah mbang. Yaom lac tỉnh pacang hu siam jit ruak Covid-19, bruk caong nao ravang me-in tagok veik min rilo meng lac nao ta-eng, atau dom kapul sit nao me-in takik harei. Daok tuai negar lingiu haong dom kapul praong rilo menuac daok veik lavik harei oh hu hadom.

Tui ong Trịnh Hàng, Yam ndok Sở Du lịch tỉnh Bà Rịa – Vũng Tàu, piah gam patagok kinh tế gam pacang caga jit ruak, gah du lịch hu panuac ieu taong abih dom tuai damuai brei khan gah y tế, rahra saong tuai damuai brei rao tangin dahlau di tuk tame dom labik ravang me-in, menuac ngak jeng yau tuai damuai brei cuk pataih pacang mbaok, oh pataom rilo menuac saong brei daok atah di gauk:

“Di BR-VT oh ka hu urang njom dalam bhap bini, nan ye labik ini hu taong yaom lac takik njom mbak. Urak ini dom labik brei pah labik ndih daok, dom nhà hàng jeng daok peih tabiak. Tapa pasang iek dom labik brei pah labik ndih daok, dom nhà hàng mboh lac bruk pacang caga jit hu ngak biak siam”

Ong Hồ Sĩ Sơn, Yam ndok Sở Ilamu – Thể thao saong Du lịch tỉnh Ninh Thuận brei thau, taphia bruk patagok pacang caga jit di doanh nghiệp, gah du lịch Ninh Thuận hu peih ngak rilo danak dak dui pachreih ravang me-in dalam taneh ia yau pambuak haong dom doanh nghiệp du lịch dalam saong lingiu tỉnh piah padang dom tour du lịch:

"Gah du lịch pachreih ba dom doanh nghiệp duah dom labik nao tal, dom janih bahrau. Daok gah khách sạn jeng brei sahneng duah jalan ngak piah dui pachreih tuai damuai "

Gah du lịch dom tỉnh ban jeng brei thau lac oh taduan tuai mai meng dom labik hu jit, daok tuai di dom bhum karei mai, hu ieu khai báo y tế dahlau di tuk tame bilik daok, piah khik caga siam mekre prein yava di bhap bini. Meng dom jalan ngak dalam bruk pacang caga jit, tui iek siam menuac tame… jia lac du lịch di Ninh Thuận, Bình Thuận jeng yau Bà Rịa – Vũng Tàu meda yam tapa kan kandah dalam tuk srau kadau njom mbak jit ruak Covid-19 mbang ka 2”./.

Urang lang: Mousaphuong 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân