Rilo urang nong salih tapa bruk ngak nong 

Saai Nguyễn Hữu Tân, daok di ban sit  Sông Đốc, huyện Trần Văn Thời brei thau: 4 thun dahlau, bruk tong cap ikan meng halam dui biak rilo song duah hu jien biak glong . Min, sang saai oh tong cap tui jalan “pametai abih” ni  bo buh tabiak labaih  600 triệu đồng piah ngak “lưới rê”, pamong tal bruk tong cap khang kajap. Min tui saai Tân, oh lac thei jeng hu jien piah salih tui jalan ni, abih di nyu nan lac dom sang tong cap tapen tasik ye dak kan kandah:

"Phun jien oh ginup piah tabiak tasik. Rilo urang tong cap dok tong chap di tapen tasik. Bruk dong phun jien ka urang tong cap cakrok jeng hu dom sarak , min takik urang mesraiy hu. Kan kandah prong abih di urang tong cap lac kurang phun jien piah tabiak tasik" .

Piah pasiam veik song patagok khang kajap kaya ikan tapen tasik, sa dalam dom bruk prong bo gah chức năng tỉnh Cà Mau dok ngak lac pakhang  bruk tui iek dom ghe gilai tong chap. Xã Khánh Bình Tây Bắc (huyện Trần Văn Thời) hu labaih  500 ghe gilai tong cap ye hu tal  413 sruh ala 20 CV (mã lực) bhian tong cap di tapen tasik. Urak ni, tong abih dom ghe gilai ni brei mbaoh tangin tame harak sinya  tong cap khang kajap.

Ong Bùi Chí Ngạn, Phó akaok UBND xã Khánh Bình Tây Bắc brei thau, dalam dom ghe gilai mbaoh tangin sinya hu biak rilo sruh brei salih bruk atau salih pandap taong cap piah khik caga kaya ikan tapen tasik. Langiu di nan, karja pak ni jeng hu tacei pato mik va tong cap meng dalam tuk ngak bahrau ghe gilai song tut angan bruk ngak, pamong tal patagok haong gauk. Bruk bui sambai lac hatai sahneng di bhap bini hu rilo salih bahrau:

"Khol hulin pathau khan, meng nan hatai sahneng di bhap bini hu rilo salih bahrau. Dom ghe gilai tong cap tapen tasik dak harei dak tagok. Akaok thun 2017 hu  47 sruh  min urak ni tagok jiak  90. Kaya ikan tong cap hu rilog jang, rai duik di bhap bini hu cakrok patagok" .

Meng jalan ngak salih bruk tong cap kaya ikan tapen tasik kayua UBND tỉnh Cà Mau patabiak meng puac thun  2018, gah ngak nong tỉnh hu padang danak dak  ka bruk peih ngak mô hình ni. Ong Nguyễn Việt Triều, Phó akaok Chi cục kaya ikan  Cà Mau brei thau lac hu 10 boh sang hu dong ngak iek salih bruk, tuk camereip ba mai siam mekre. Min, pren khang karja urak ni oh ka ginup piah peih ngak danak dak. Sa kan kandah karei lac bhap bini brei hu meteh phun jien tuk hu dong salih bruk min oh njauk lac sang halei jeng pabak hu. Kayua yau nan ye, jalan salih bruk ka urang tong cap ikan hu tỉnh peih ngak patui gauk; dom bruk  hu salih jeng pamong tal rilo janih, khik ka nyu lagaih haong bruk di anak meta, lagaih haong hatai khin di mik va:

"Langiu di salih bruk tong chap oh tui jalan pametai abih kaya ikan, khol hulin jeng kuhria tal salih tapa dom bruk ngak karei yau rong pala kaya ikan atau rong glang, pala drak. Bruk pato bruk ngak ka urang ngak palei pala tui hatai khin jeng dok hu kuhria tal".

Dom kaya ikan tapen tasik dalam dom thun jiak di ni trun daok takik mboh anak meta. Bruk salih bruk ngak, pamong tal bruk tong cap khang kajap dok lac bruk njauk ngak chip, brei hu dom tỉnh ban hu tasik caik hatai sangka jang, patui jalan lang talaih kan kandah, jak ba mik va urang tong cap ikan ba gauk tame khik caga drap ar meng langik tasik./.

Urang lang: Hanipha

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân