Urang ngak hu taduan pandap dalam tuk vak kan kandah 

Brei panuac di nyaom roya pakacah gauk anit ranam taneh ia MTTQ Việt Nam vaktu 2015-2020, Thủ tướng Nguyễn Xuân Phúc caong lac anak tal, MTTQ Việt Nam daok pamedeih tagok prein khang jum pataom abih bangsa, jum pataom abih rahra, bhap bini dom bangsa, agama, ngak brei njauk gauk meng jalan sahneng tal jalan ngak, khang hatai pakacah peih ngak hu dom sarak di Đảng, hukum di Karja, pamaong tal bruk padang taneh ia Việt Nam rahra kaya meda, taneh ia khang kajap,  dân chủ, công bằng, văn minh.

Ủy ban Thường vụ Quốc hội hu ba tabiak sarak padang ban Hồng Ngự di tỉnh Đồng Tháp tui panuac caong di rajaei. Rajaei brei thau lac ban sit Hồng Ngự daok dalam bhum kinh tế praong gah barak di tỉnh Đồng Tháp, lac pasak kinh tế, khoa học kỹ thuật – ilamo, albik kinh tế tapen negar di tỉnh. Dom thun tapa, kinh tế di ban sit tagok tani tanat, cơ cấu kinh tế tagok siam, raidiuk di bhap bini dak harei dak paglaong, phúc lợi xã hội hu sangka iek praong. Bruk padang ban Hồng Ngự di tỉnh Đồng Tháp lagaih haong bruk rami ramik taong abih gah cak rok patagok đô thị Việt Nam tal thun 2025, pamaong tal thun 2050.

Labaih 500 kapul nyaom, menuac urang  hu pok meyaom di nyaom roya pakacah gauk anit ranam taneh ia tỉnh Bình Phước mbang ka 5 ngan haong kadha "Jum pataom, sahneng duah, pakacah gauk dak padang saong khik caga taneh ia". Dalam nan hu rilo urang ngak nong naih joi lac urang bangsa takik. Abih di nyu nan lac thun 2019, Bình Phước peih bruk pakacah “Ngak 1.000km jalan bê tông palei pala saong palahik 1.000 sang bhap bini bangsa takik kan kathaot”. Bruk nan hu abih menuac sia pachreih tui, rik daong paglaong raidiuk di bhap bini palei pala, patruh kathaot khang kajap. Meng nan baoh sang kathaot dalam tỉnh trun daok 2,55%.

Tatua Trần Hoàng Na atah 600 m, praong 23 m pambuak quận Ninh Kiều haong Cái Răng, pambuak jalan roya 1A haong dom jalan praong, patrun bruk gar radaih bahrau hu peih ngak dah page ni 18/9 di Cần Thơ. Tatua brei nduac 60 km/h, padang ngak meng vòm pasei pandar miat,  bêtông cốt thép dự ứng lực. danak dak hu taong abih yaom jien buh tame lac 791 tỷ đồng meng kadung jien daong cak rok patagok (ODA), ngak salah hadei di 22 bilan padang ngak. Nan lac tatua camriep di ban Cần Thơ hu peih bruk mek rilo panuac ka  jalan padang ngak, gam khik kajap bruk nao mai di jalan radaih, jalan ghe gilai, gam ndung bak bruk padang ngak di tỉnh.

Kapul urang ilamu Sở Y tế Đồng Nai khan lac makna ngak brei anek naih kumei metai hadei di tuk klauk vaccine viêm não Nhật Bản lac kayua “rup pabhap dị ứng haong vaccine" saong vaccine viêm não Nhật Bản JM-020319E, klauk ka nek naih kumei nan lac jru siam. Nan ye Sở Y tế Đồng Nai brei adat pandar vaccine ini dalam tỉnh. Dahlau di nan, anek naih kumei 1 thun hu klauk vaccine viêm não Nhật Bản B di pasak Y tế ban sit Hiệp Phước, huyện Nhơn Trạch. 3 maong hadei, anek naih nan nyu makngu rup pabhap, rak darah nduac srau kadau blaoh metai hadei di nan.

Tổng thống Alexander Lukashenko di Belarus brei thau lac bol bala daok caik hatai caga biak glaong, kreik pabah mbang negar haong Ba Lan saong Litva piah pacang dom srau kadau urak ini. Tổng thống Belarus 1 mbang tra brei panuac lac, bruk trun jalan dalam taneh ia dui atah luac 6 adit tapa ndok ong padeih ngak lac mai meng bruk pacuh pajarak di phương Tây. Dom bruk trun jalan rilo di Belarus patuh tabiak hadei di mbnag pilih ruah tổng thống harei 9/8 saong ong Lukashenko hu pok ngak veik mbang ka 6. Dom gah đối lập di Belarus ndom lac bruk bầu cử njauk blei saleik.

Hãng Reuters ba panuac urang dang akaok kinh tế di Gilang pariak dunya (WB), amuk Carmen Reinhart, ndom lac kinh tế dunya meda labik 5 thun piah pasiam veik meng gaok kan kandah di jit Covid-19. Rilo taneh ia trun kayua jit ruak lavik jang dom taneh ia karei saong bruk nan ngak brei trak jang bruk oh samu gauk tuk dom taneh ia kan kathaot gaok kan kandah rilo di abih. Amuk Reinhart daok brei thau lac, mbang akaok meti dalam 20 thun tapa, urang kan kathaot eik lipa di dunya meda hu rilo jang hadei di bruk srau kadau kayua Covid-19. 
Jabat pasang iek khí hậu di Liên minh châu Âu brei thau, thak meng dom glai khuah di gah pai negar Mỹ daok par tal châu Âu. Dom mbang khuah glai di dom bang California, Oregon haong Washington di Mỹ pambak praong jang meng yaok pluh tal yaok ratuh mbang duk saong tanut kuhria rah tapa. Thak haong thur mur meng pui khuah nyu par atah tal 8.000km nao tal Bắc Âu. Tui kuhria pui khuah par tabiak labaih 30 triệu tấn CO2. Urang jakar Mỹ ndom lac dom bruk khuah glai meda ngak ka bruk jit ruak Covid-19 dalam taneh ia srau kadau jang kayua bhap bini brei daok dalam labik hu rilo menuac. Lingiu di nan, suak yava njauk thak pui, thur mur meng dom mbang khuah meda ngak ka bruk viêm phổi di dom urang ruak Covid-19 jeng trak damak jang./.

Urang lang: Mousaphuong -Thu Thảo 

 

 

 

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân