Tukvak jaik di ini, Sang iek ruak Nhi đồng 1, Ban raya HCM hu 3 mbang taduan uranaih njauk asau kaik tame mbaok mboh biak anit. Bruk njauk ndem nan lac rilo labik kaik di akaok, mbaok, idung, caik veik laka biak trak ka prein yawa saong jalan sahaneng ka uranaih harei hadei.

 

Bruk camereip lac kamuan L.N.D, umo 17 bilan, daok di tỉnh Tiền Giang hu ba tame Sang iek ruak Nhi đồng 1 tuk hu rilo labik tahak praong di mbaok. Tui panuac khan di urangdalam sang nan, bilan dahlau, tuk kamuan daok mbang xúc xích ye asau di sang taphia blaak tame mbang xúc xích saong kaik kamuan, ba tal dom laka nan…Hadei di tuk ba tame sang iek ruak Nhi đồng 1, dom bác sĩ blaic raih m chip piah khik mbaok meta ka adei.

Daok kamuan Đ.Q.V, umo 18 bilan, daok di tỉnh Bình Dương labuh tame asau di sang drei raong tuk nyu daok ndih nan ye asau kaik tame mbaok. Bruk ka klau lac adei L.N.G.H. (umo 19 bilan, daok di tỉnh Tây Ninh) hu ba tame sang iek ruak di harei 10/6 tuk mbaok tahak praong ralo labik, kalik tahak mboh talang, mblo limek…Kayua kamuan ini yam mai jaik asau di sang tuk nyu daok mbang yau nan ye nyu kaik.

Tiến sỹ, bác sỹ Nguyễn Văn Đẩu, Akok Khoa tagei mbaok – Sang iek ruak Nhi đồng 1 brei thau, yaok thun hu rilo uranaih njauk asau kaik ba tame blaic raih cấp cứu. Kayua uaranaih sit yau nan ye asau bhian kaik tame mbaok, akaok, takoi, ini lac bala trak, dalam tuk urang praong oh caik hatai sangak, bruk caik veik ka harei hadei lac biak trak: “Dahlau di abih lac jhak tal prein yawa, akaok sahaneng saong rup pabhap di uranaih, nyu haduh hatai pandik harao. Hadei di nan, tuk laka  siam nyu caik veik inem laka ngak vaiy cambuai, meta oh pik hu. Iek ruak ini abih biak rilo jien, amaik ame saong dom gru jru jeng biak pandik harao.”

Dalam dom janih athur raong, asau raong dalam sang piah iek lac mbuan pambak ruak meruai glaong ka dua, hadei mengeo. Dalam tuk sang halei jeng raong asau yau urak ini, bruk nan dak harei dak tagok glaong. Abih di nyu nan lac, tukvak jaik di ini hu biak rilo urang metai kayua tamuh ruak meruai kayua asau, mengeo kaik. Piah caga ruak meruai, urang raong brei klauk jru caga ruak meruai tui bilan ka asau. Meyah asau ruak, metai oh thau kayau halei, brei khan ka gah thú y piah hu tacei pato.

Dom bác sỹ kakei, dom maik ame hu anek sit brei takik raong asau, meyah raong brei klauk jru  pacang caga ruak, kak asau atah di uranaih, pacang pabah asau, khik iek uranaih oh brei juak, lua asau tuk nyu ndih, nyu mbang. Amaik ame brei caga haong asau raong di sang, asau dak praong ye daok mbuan kaik khang ba tal laka praong, trak damak ka uranaih./.

Urang lang: Aí Nghiêm -  2/7/2020

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân