Bruk duah menuac lihik gaok rilo kan kandah 

Bruk duah urang daok lahik dalam bala glut jaleih taneh trak di danak dak thủy điện Rào Trăng 3 dui atah labaih tha bilan meteh blaoh min oh ka padeih. Harei ini, dom urang gah duah daong daok ngak veik bruk duah urang ngan saong hatai kham duah mboh dom urang gaok bala daok lahik. Yaom lac kan kandah, glaih glar, mbuan gaok bala min dom urang jakar, bol  pan phao karaong, urang ngak gah jalan mbak kham ngak bruk di labaik nan luac harei melam, caong khin duah mboh dom urang daok lahik piah ba mai veik saong gauk gar, baoh sang di urang. Ong Nguyễn Văn Phương, Phó Akaok UB bhap bini tỉnh Thừa Thiên Huế brei thau: dom đơn vị kham merat ba abih prein yawa piah duah dom urang gaok bala daok lahik dalam kraong ia Rào Trăng. Mbiah tal tukvak ini, dom kapul duah hu 6 atau urang, urak ini daok veik 11 urang tra oh ka duah mboh.

Hu rajaei Việt Nam brei adat, ong Nguyễn Xuân Cường-Akaok mintri ngak nong song patagok palei pala hong ong Andrew Jeffries - Yam ndok pakat negar gilang pariak patagok Châu Á ADB hu mbaoh tangin tame harak sanya gauk samar dong pakat dunya oh bayar veik yaom jien  2,5 triệu USD meng ADB ka bruk pasiam veik dom khut khat meng bala di langik tasik kayua ribuk ia sua meng bloh di dom tỉnh gah kreih negar.  Pok jien dong ni hu kaoh tabiak meng kadung jien pacang caga bala meng langik tasik châu Á - Thái Bình Dương di ADB, hu padang tabiak piah samar dong ka dom negar njauk kan kandah trak damak kayua bala meng langik tasik.     

Harei 24/11, Việt Nam hu bahrau 4 urang njom ruak Covid-19 mai meng negar langiu, dalam nan hu 2 urang Viet Nam mai meng negar Cộng hoà Czech saong dua urang ilamu negar Ấn Độ.  4 urang njom ruak birau nan lac ka 1313 tal 1316 mai meng negar langiu, brei daok karei di Hà Nội dua urang saong di Vĩnh Long dua urang. Tui Tiểu ban Iek ruak brei thau, biar harei kabroi 24/11 hu dua urang taong dhit ruak. Dalam dom urang daok iek ruak di dom labik y tế, urak ini hu 12 urang âm tính mbang ka 1, 6  urang âm tính ka 2 saong 12 urang âm tính mbang ka 3 saong ruak SARS-CoV-2.

Di nyaom biai tapak patagok bruk pacang caga jit COVID-19 dalam tuk vak bahrau kayua mintri Y tế peih tabiak harei  24/11, Akaok mintri  Y tế Nguyễn Thanh Long brei thau Việt Nam hu tapa  83 harei oh hu urang halei njom  COVID-19 dalam bhap bini. Min, akaok mintri Y tế Nguyễn Thanh Long brei mboh hatai suh sah kayua tuk vak urak ni di dunya hu labaih  59 triệu urang njom COVID-19, urang njom ruak harei hadei rilo jang harei dahlau, song patagok samar di tong abih negar, abih di nyu lac  di  Mỹ, châu Âu, châu Á. Rilo negar châu Âu brei pacang cakak veik. “Akaok mintri  Y tế brei thau, taeng dalam harei  23/11, hu labaih  5.000 urang tame tabiak Vietnam, dalam nan hu 77 urang tame VietNam suan hukum di gah brak.

Harei 24/11, Kapol Pasang iek pacang caga ma tuý, Chi cục Hải quan pajeng ba samar- Cục Hải quan Ban raya HCM pambuak saong Kapol 6 - Cục Duah thau caga buôn lậu (Tổng cục Hải quan), Công an Ban raya HCM pasang iek 9 kiện pandap panda pablei tabiak negar langiu saong tame negar tapa bưu chính viễn thông, pajeng ba samar, camerep hu mboh labaih 20 kg matuy yaok janih hu padauk biak sir dalam dom kiện pandap nan. Pandap nan di urang angan P.M.Q payua meng Ban raya HCM nao Úc, pandap panda dalam bưu phẩm ye hu khan lac khan ao. Tui dom urang jakar hải quan, ini lac jalan ngak birau di dom urang piah ba matuy tabiak negar langiu suan hukum tui jalan kapal haok saong njauk Cục hải quan Ban raya HCM samar duah mboh, pacang cakak  veik.

UB nhân quyền rajaei Ê-ti-ô-pia harei ni brei thau, takik di abih  600 urang njauk pametai dalam sa mbang pametai menuac di  gah brak  Ê-ti-ô-pia harei 10/11 meng bloh.Dalam panuac khan hu batabiak, Ủy ban nhân quyền brei thau, tong abih dom urang metai lac urang bangsa takik Amharas di ban sit Mai-ka-ra. Bruk pametai kayua kapul dam dara urang Tigrayan hu angan "Sam-ri" ngak, song hu bruk dong di gah an ninh pak ni.Bruk tong gauk ngak ka dom rituh urang di 2 gah metai song dom pluh ribau  urang nduac tapa jalan tapen negar  gah brak  Ê-ti-ô-pia piah tapa Xu-đăng plaih bala.

Jabat patagok vaccin pacang caga Covid -19 di Nga harei kabroi brei thau, yaom jien ngak tabiak janih vaccin Sputnik-V di darak dunya lac ala 20 đola Mỹ ka sa urang hu klauk jru. Vaccin Sput-ních-Vê njauk brei klauk dua mbang. Yau nan, sa mbang klauk jruk abih ala 10 đôla Mỹ. Tui urang ngak praong di Kadung jien buh tame ngak tapak di Nga Ki-rin Đi-mi-tri-ép ( Kirill Dmitriev) brei thau, vaccin di Nga lap jang dua mbang dut saong dom janih vaccin karei pacang hu siam ruak dreih yau nan.Sput-ních Vê nan lac vắc-xin lap jien abih dut saong bruk pacang ruak hu siam tal labaih 90% di tuvak klauk caga iek mbang ka 3.Urak ini labaih 50 taneh ia khin blei labaih 1 tỷ 200 mbang vaccin di Nga.Vaccin pabak ka darak pasar dunya jeng meda hu ngak tabiak di dom taneh ia pambuak bruk ngak  vaccin yau ye Ấn Độ, Braxin,Trung Quốc,Hàn Quốc,Hungary saong dom taneh ia karei. 

Harei  24/11 (tui tuk vak pak ni), ong Joe Biden, urang hu gah truyền thông Mỹ brei thau lac mek hu jayah dalam mbang palih ruah tổng thống meng bloh, brei thau bruk ba menuac tame ngak ka nyaom sarak đối ngoại song an ninh negar di drei.Ong Bai-đần brei thau hu salih sarak "negar Mỹ mangaok di abih" di Tổng thống Donald Trump song sinya negar Mỹ hu ngak bruk veik hong dom negar di dunya pambuak bruk haong drei./.

Urang lang: Hanipha- Ái Nghiêm- 25/11

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân