Jaik di ini, di dom tỉnh Đắk Lắk saong Đắk Nông gam gam hu dom sruh jit ruak bạch hầu dalam labik daok di bhap bani. Hadei di tuk hu sa uranaih kumei metai, yaok rituh urang di Đăk Nông njauk brei daok atah di gauk piah pacang ruak njaom mbak. Ini lac ruak hu jru kauk caga taong ruak, min meyah oh hu langyah samar drah, urang ruak meda kan suak yava saong ba tal metai lahik. Dom kadha njauk thau ka ruak ini hu khan tal mikva saong taong abih gauk dalam kadha Urang iek ruak harei ini:

\

Urang ruak hu tui iek pak di sang iek ruak 

Phaok Giáo sư, tiến sĩ Trần Đắc Phu, urang dahlau diah ngak akaok Cục Y tế pacng caga, Mentri Y tế brei thau: ruak bạch hầu hu angan khoa học lac Dip-the-ria, lac janih ruak njaom khuẩn cấp tính hu giả mạc di tarakon,  thanh quản saong idung. Ruak meda hu mboh di kalik, kết mạc meta atau di bộ phận sinh dục. ini lac ruak gam nhiễm trùng gam nhiễm độc.

Ruak bạch hầu njaom tapa jalan suak yava kayua taom gaok urang ruak atau urang daok khang kadang min hu vi khuẩn bạch hầu. Ruak meda njaom mbak kayua taom gaok dom janih pandap hu gam chất bài tiết di urang njaom vi khuẩn bạch hầu.

Tuk njaom vi khuẩn, urang ruak mboh pandiak, pandik tarakaong, kalik hijao, tagok baoh kuh ala kang. Ruak meda ngak brei viêm phổi, suy tim, ba tal metai lahik dalam 6 tal 10 harei.

Phaok Giáo sư, tiến sĩ Trần Đắc Phu brei thau: urak ini hu jru taong ruak bạch hầu, yau nan min, dalam tukvak daok tamuh khang, ruak meda ngak brei kanjah jhak tal baoh hatai, thận saong glo akaok di urang ruak.

Meyah urang ruak padeih taong ruak meteh dhi, mbuan ba tal metai lahik. Urang ruak nao sang tuk oh ka abih ruak ye mbuan ba tal njaom mbak ruak ka bhol bhap rah ra.

Jalan pacang caga ruak siam di abih nan lac klauk vắc-xin. Hu rilo janih daong pacang caga hu bạch hầu yau: vắc-xin 3 dalam 1; 4 dalam 1; 5 dalam 1 atau vắc-xin 6 dalam 1 hu pacang caga ka 6 janih ruak njaom mbak ka uranaih meng 2 bilan tal ala 24 bilan daok dalam danak dak klauk jru peih prong saong klauk jru mbang jien.

Piah pacang caga ruak bạch hầu, bhap bani bhian rao tangin meng sabon; pacang pabah tuk patuk atau dhung phal; khik rup pabhap, idung, tarakon ka nyu hacih sa-at yaok harei; takik taom gaok urang njauk ruak atau medhil lac njauk ruak.

-  Khik ramik sang danaok laneng lanoi, hacih sa-at saong hu ginup aia harei.

-   Urang njauk ruak atau medhil lac njauk ruak brei samar ba nao tal labik iek ruak piah taong ruak samar drah.

Bạch hầu lac ruak mbuan ba tal metai lahik min meda pacang caga hu tui jalan klauk jru pacang caga. Ngan haong uranaih, suai ba nao klauk jru pacang caga meda ngak ka uranaih mbuan njauk ruak.

Ruak bạch hầu oh hu bruk miễn dịch luac rai, kayua yau nan ye meyah njauk ruak ye mbuan njauk ruak gilac veik biak glaong. Kayua yau nan ye, klauk vắc-xin lac jalan ngak pacang caga siam di abih./.

Urang lang: Jasi 25/6

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân