Ngan saong urang Việt, Tết trung thu lac sa rija, biak karei saong hu rilo makna. Tui dom urang roh duah Việt Nam ye tết Trung thu hu meng samar dom Po Hùng padang taneh ia, brei mboh tapa dom bingula hu sarak tame mbaok hagar Đông Sơn. Tết Trung thu rah tabiak di kreh bilan thu, langik la-an bingi, lagaih piah peih dom bruk pataom gauk me-in sambai. Meyah harei Tết tame thun bharau bhap bini ngak ahar bánh chưng, bánh giầy paling da-a mukkei ye Trung thu, dom baoh ahar am cuh, ahar njal laman yamen bingi gam saong dom janih baoh kayau oh kurang hu dalam salao pandap paling tagok. Ini jeng lac tuk piah ka urang ngak amaik ame brei mboh hatung hatai anit ranam, iek glang anek bik, urang praong sangka uranaih. Hadei ini, tết Trung thu daok hu dom ilamu biak glaong karei, nan lac piah urang dalam baoh sang hu pataom mbaok.  Ahar am cuk, ahar njal laman yamen bingi jeng yau ahar bánh chưng, ahar bánh giầy hu dom ilamu kaya mbang yau gauk lac kalik ahar papaok dom hatai hu lime janih yau brei mboh bruk daok dang di urang angaok dunya ngan saong urang alot diah, hatung hatai anit ranam daong ba gauk.

  Langiu di nan, tết Trung thu hu iek yau  harei tết di uranaih yau nan ye daok iew lac “ Têt eik ia Bulan”. Uranaih tuk Trung thu bhian hu urang praong alin brei pandap ma-in yau gom ong sao, gom bol lin, mbaok athur ja, hagar keiw, hagar bỏi…Dalam dom harei jaik tết Trung thu, di dom jalan dalam ban praong yau Ha Noi, Ban raya HCM…,sambo mau hadah hadai tagok di dom labik pablei ahar Trung thu, dom pandap main meng kan. Daok di dom sang ilamu, sang bac, labik main bui sambai, chreih chrai tagok caga ngak rilo kadha main ka uranaih. Darak pandap main Tết Trung thu thun ini mboh hu rilo pandap meng kan pak meng kreim la-a, ba-ar nện, ba-ar jangaih camin…Langiu di ahar Trung thu di dom labik hu angan je, ahar Trung thu meng kan di dom labik ngak tui jalan ong muk patua veik jeng hu urang takre blei.

Dom thun tapa, dom pakat, dom gah, dom palei sangka peih ngak dom  bruk ilamu, daoh tamia, pandhih the thao, melam ia bulan bak baoh, pakacah tamia lân…daong ka dom adei thau makna tet Trung thu; peih ngak dom bruk rivang, alin pandap ka uranaih hu raidiuk biak kan kandah…daong dom adei hu uan raok Trung thu bui sambai. Bruk sangka daong ka uranaih kathaot uan raok trung thu dak harei dak hu caik hatai rilo jang, mai meng dom kapul urang ngak pahala. Jaik abih dom kapol, urang ngak pahla jak ba rik daong jien, pandap ka uranaih kathaot di bhum atah bayah. Ngan saong uranaih luac thun bilan kurang anak kurang likuh, taduan hu pandap, hu main bui sambai nan lac sa bruk haniem phol.

Urak naih harei ini oh lac njauk daong brei bo daok brei hu pato pakai, meng dalam sang bac saong langiu xã hội piah paglaong kaok sahaneng, hu thau rilo jang, piah thau khik ramik saong patagok dom ilamu siam gheih meng kan dalam harei tết Trung thu rik daong ngak brei kaya meda jang ilamu siam gheih di bangsa./.

Aí Nghiêm - 27/9/2020

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân