Pathau mik va song tong abih gauk! Drah samar saong tuk halei jeng sangka tal chất lượng pato pakai, ba bruk ngak hadei di tuk bac megru bloh, lac jalan padang hatai jia piah ka rilo urang ngak di palei pala nao tal Pasak pato bruk ngak huyện Krông Ana, tỉnh Đăk Lăk. Danak dak pato pakai di Pasak hu peih praong saong lagaih haong bruk di anak meta, pabak hu hatai caong di urang ngak nong saong njauk tui bruk di yaok puk palei. Meng nan urang duah hu bruk ngak, tabiak truh kathaot khang kajap. Kadha vak di Hương Lý, urang vak di rayo sap ndom VN daok di Tây Nguyên.

Hadei di tuk bac bloh tal jhik công nghiệp di Pasak pato bruk ngak huyện Krông Ana, sa-ai Trần Thị Phương daok di palei 2, xã Quảng Điền, huyện Krông Ana, tỉnh Đăk Lăk hu bruk ngak tani tanat saong jien duah hu yaok bilan labaih 3 triệu đồng. Dalam tuk bac saong hadei di tuk bac thau bloh, sa-ai Phương tuk halei jeng hu gru di pasak abih hatai tacei pato:

 

 “Dahlau daih drei daok di sang daong pasang likei dom bruk sit sot dalam sang, jien duah hu oh tani tanat. Meng tuk hu xưởng jhik, drei duah hu jien, yaok bilan hu 3 triệu đồng, daok hu ba bruk ngak ka dom adei sa-ai kumei. Pasak pato ka drei thau jhik. Urak ini drei jhik hu ye. Urang abih hatai tacei pato. Nan ye urak ini drei thau pandar jamriak jhik, thau jhik, jeng lac mai meng dom gru abih hatai tacei pato ka drei”.

 

Sa-ai Phan Xuân Anh daok di tổ dân phố 3, ban sit Buôn Trấp, huyện Krông Ana, tỉnh Đăk Lăk brei thau, dahlau daih sang kan kandah lô, kayua jien mek tame tok pagam pambak tame 3 sào padai. Hadei di tuk bac bloh tal pato pala bimao kayua Pasak pato bruk ngak huyện peih tabiak, meng hu pong hadei di yaok vụ yuak padai bloh saong jaik 250 m2 taneh klaak saoh di gah likuk sang, sa-ai pala nấm sò saong bimao pong. Gam saong bruk tacei pato abih hatai jai di urang jakar di Pasak, bruk sangka duah labik pablei kaya nong di kapul urang ngak nong huyện, tal urak ini, yaok bilan sang sa-ai duah hu 8 triệu đồng meng bimao.

 

 “Tuk nao bac di pasak pato megru huyện Krông Ana, tacei pato biak abih hatai jai, tacei pato biak siam tui yaok quy trình. Bruk pala bimao hu biak rilo quy trình, meng ủ mùn tal tame kadung, ươm, cấy saong pala tal tuk kaoh mek. Tuk bac bloh mai sang drei pala ye hu pasak  blei meneing saong kapul urang ngak nong jeng duah labik pablei ka drei”

 

Dalam dom thun tapa, Pasak pato bruk ngak huyện Krông Ana, tỉnh Đăk Lăk pataom tame pato pakai dom bruk urang nong caong khin, meda pambak praong, samar duah hu jien, yau ye: bruk pala bimao, bruk pala hareik, ủ hareik ka limo atau dom bruk xã hội daok caong khin yau: padang ngak, jhik công nghiệp, jhik dân dụng... Lingiu di nan, piah paglaong kein laba bruk pato bruk ngak, dom gru pato di Pasak tuk halei jeng abih hatai tacei pato, salih bahrau jalan pato bac, tok caik 30% tukvak pato lý thuyết, daok veik lac pato ngak tui jalan “pan tangin tacei bruk”. Kayua yau nan ye, dom urang bac hadei di tuk bac bloh jeng ngak biak samar saong biak gheih. Anai Hồ Thị Hằng, Gru pato di Pasak pato bruk ngak huyện Krông Ana, tỉnh Đăk Lăk brei thau:

 

 “ Dalam dom thun jaik di ini, kak kajap haong dom labik caong hu di abih piah pato ka nyu lagaih haong bruk di anak meta. Kayua bruk caong rilo, hu labik caong dahlau, hu labik caong hadei  min labik halei caong rilo di abih ye pasak rami ramik tukvak  tukvak bac ka nyu lagaih piah ka dom adei bac bloh ngak hu bruk chip”.

 

Tui ong Phạm Văn Phương, Phó giám đốc Pasak pato bruk ngak huyện Krông Ana, tỉnh Đăk Lăk, meng thun 2016 tal urak ini dalam huyện hu labaih 3.600 urang ngak caong bac 15 bruk ngak nong saong bruk oh lac ngak nong. Pasak hu pato bruk ngak ka labaih 1.000 urang ngak palei pala, lac pabak hu 30% dom urang tut angan khin bac. Dom bruk hu pato lac: pala bimao, jhik công nghiệp saong jkhik dân dụng, raong glang, pasaim radaih patuh, jamriak ngak nong, padang ngak sang, ilamu ngak mbang huak, Điện dân dụng...  Urang duah hu bruk ngak yaok thun labaih 80 %, rik daong biak rilo dalam bruk patrun kathaot di puk palei:

 

“Bruk peih pato bruk ngak ka urang ngak palei pala tui đề án 1956 di Thủ tướng rajaei mbiah tal urak ini, pasak pato bruk ngak patagok biak siam. Ini lac sa dalam dom đề án pato bruk ngak brei ka mikva urang ngak nong hu bruk ngak duah hu jien piah patrun kan kandah. Tapa pato bruk ngak, hu biak rilo urang bac bloh hu tapa truh kan kathaot”.

 

Piah patui jalan paglaong siam mekre saong kein laba di pato bruk ngak, pabak hatai caong khin bac bruk ngak di urang ngak palei pala saong darak pasar urang ngak, Pasak pato bruk huyện Krông Ana hu pambuak pato bruk haong padang bruk ngak, paglaong jien mek tame, salih bruk ngak saong patrun kan kathaot khang kajap./.

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân