Labaih sa bilan tapa, Việt Nam oh hu urang njom Covid-19 bahrau halei dalam bhap bini. Ni lac bruk biak njauk uan tambuan ka dom kham merat di rajaei song bhap bini . Min, tuk bo dom negar karei di dunya, urang metai kayua jit ruak Covid-19 dok tagok glaong ye khol drei oh iek lap piah oh caik rah tabiak bruk njom ruak mbang ka 2 , song abih di nyu nan lac tuk Việt Nam oh ka tabiak panuac lac abih ruak. Kadha vak di urang vak di rayo sap ndom VN dok di ban raya HCM:

Dom urang ruak Covid 19 hu abih ruak 

Di sa siêu thị angaok jalan Lê Thánh Tôn, quận 1, ban raya HCM chreih chrai rilo menuac urang jang hadei di tukvak atah daok atah di gauk. Oh dok bruk dut iek pandiak rup pabhap  atau khi atah di gauk  2m yau dahlau deih, min dom jalan ngak piah pacang jit  dok hu siêu thị ngak yau : caga ia rao tangin thu ka tuai, pabak khẩu trang y tế ka urang ngak. Min, dalam dom tuai tame tabiak  siêu thị ni  ye hu rilo urang oh cuk  khẩu trang. Meda lac bruk takik sangka, iek lap dalam pacang caga urak ni dok mboh di rilo rahra. Tuk hu tangi sua kayua habar tuk nao tal labik rilo menuac yau siêu thị bo oh cuk khẩu trang, saai Cao Ngọc An, daok di quận Bình Thạnh brei thau: 

Dreih yau nan, di pasa Thị Nghè, quận Bình Thạnh, meng menuac pablei tal urang blei jeng oh cuk khẩu trang atau ngak catang bruk pacang caga jit kayua mboh lac abih jit ruak . Min, jeng dok hu rilo menuac oh iek lap bo daok paglaong bruk pacang caga jit. Saai Lê Thị Khanh, bhian nao pasa ni brei thau:

"Hulin nao pasa, blei pandap  ye hulin cuk  khẩu trang, tuak muat, cuk harum tangin piah khik caga pren yava ka hulin song ka bhap bini ".

Ban raya HCM dok ngak siam bruk pasang iek song pacang caga jit ruak Covid-19. Dom labik rivang me-in jeng daok hu peih pabah mbang piah taduan raok tuai damuai. Dom công ty du lịch daok ngak bruk gilac veik yau dahlau. Ong Nguyễn Kim Toản, Akaok  Công ty TNHH Thường Nhật pajeng ba tuai rivang main  brei thau, meng tuk klaak bruk daok atah di gauk, hu bruk iek lap, oh sangka di dom tuai du lịch yau: oh cuk khẩu trang, oh rao tangin  tuk mai labik rivang iek, sambai main. Yaom lac yau nan, bruk pacang caga jit ruak  Covid-19 jeng dok hu dom labik  song công ty du lịch peih ngak.

Tui Tiến sỹ - Bác sỹ Phạm Thị Thùy Dương, urang pato di sang bac đại học Y Dược ban raya Hồ Chí Minh, labaih sa bilan tapa Việt Nam oh hu urang njom  Covid-19 bahrau dalam bhap bini, min oh hu makna lac  jit ruak oh dok tra . Bruk Mbuan si njom mbak jeng meda dok rah tabiak dalam bhap bini, meng dom urang nhập cư, meng dom urang meng negar langiu mai. Việt Nam jeng oh ka tabiak panuac lac abih ruak, nan ye bhap bini njauk caga pacang klah njom mbak ka rup drei song ka boh sang :

"Takik tabiak labik hu rilo menuac, makna lac oh hu bruk hagait ye drei jhui tabiak. Pagap yau drei nao pasa blei rilo pandap sa mbang atau drei ieu  siêu thị ba tal sang, jeng takik tal  nhà thờ atau baha . Brei cuk  khẩu trang saong jhui gaok tame meta, cambuai . Brei rao tangin gam gam kayua ia pabah urang ruak prah tagok angaok mbaok hagait nan virus nyu duik tal dom harei, tuk drei gaok tame meta, dhung, cambuai drei bo oh ka rao tangin nyu pambah tapa ia pabah".

Thạc sỹ - Bác sỹ Nguyễn Trí Dũng, Akaok pasak pasang iek ruak kik ban raya  HCM jeng ndom lac, bruk mbuan si njom ruak jeng dok nan kayua dom negar karei jit ruak dok rah tabiak khang, urang metai tagok glong, kayua yau nan ye piah njiak bruk njom mbak ka 2, thei jeng brei thau caga, jhui iek lap song oh klaak tapa dom jalan pacang caga jit ruak :  

"Dom negar jaik taphia ye jit ruak jeng dok rah tabiak kan thau dahlau, yaom lac tuk vak bahrau, min khol drei caga taduan dom urang Yuan mai veik palei, ni jeng lac sa dalam dom Jalan mbuan si tamuh tabiak dom urang ruak bahrau dalam tuk vak anak tal. Tapa dom ilamu dalam tuk vak dahlau, ngak habar pasang iek hu bruk  njom ruak, jang yau padang ngak dom tanut siam mekre piah gam pacang caga gam peih ngak dom bruk yau dahlau dalam tuk vak bahrau" 

Dalam tuk Mỹ, Nga, Tây Ban Nha, Anh atau Brazil dok kaong rup pacang caga jit song dom urang metai dok hu rilo, ye khol drei oh hu urang halei metai kayua ruak Covid-19, nan lac bruk pabak brei ka dom kham merat oh thau gleih glar di rajaei song bhap bini . Min, bruk mesruh pacang Covid-19 jeng oh ka padeih. kayua Yau nan ye, urang halei jeng brei thau pacang caga jit./.

Urang lang: Hanipha- 3/6

 

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân