Anak bruk rah tabiak khang kan si thau dahlau di jit Covid – 19, di tỉnh Đắk Lắk daok hu rilo kapul nyaom, menuac urang kham merat hu mbaok tame pacang caga jit. Dalam nan hu ong Sùng Minh Sơn - akaok palei Ea Bar, xã Cư Pui, huyện Krông Bông lac kreih camin hadah. Urang vak Tuấn Long daok di Tây Nguyên hu kadha vak ndom ka dom bruk ngak siam saong hu makna di urang akaok palei bhum atah bayah ini

 Ong Sùng Minh Sơn ( gah hanuk) dalam thaot binguk

 

  Dom harei tapa, sap loa papar sap lưu động meng sap Mông dom asal kadha ka pacang caga jit Covid-19 hu bhap bini palei Ea Bar, xã Cư Pui kanal abih. Sa-ai Sùng Thị Bầu, sa urang dalam palei brei thau, dom asal kadha ini hu akaok palei Sùng Minh Sơn lang tabiak, blaoh bac saong phát loa meng labaih 1 bilan ini mai, hu gam khau tin brei thau ka jit ruak yaok harei nan ye bhap bini biak caik hatai tui pang, thau cambaih dom jalan pacang caga.  

 "Sa-ai nan khan brei thau meng sap di bangsa drei nan ye mikva thau chip. Mikva daok pak ini takik ndom hu sap Kinh, nan ye bruk khan brei thau meng sap Mông lac biak lagaih. Dom asal kadha hu akaok palei khan brei thau, yau ye: jhui pataom rilo menuac, tabiak jalan brei cuk khẩu trang, pandar sabon rao tangin pametai anek ruak, mbang tasak menyum tasak, plaih taom gaok urang ruak piah caga njom mbak...".

Ong Sùng Minh Sơn – akaok palei Ea Bar xã Cư Pui brei thau: Yaom lac palei daok di bhum atah bayah, min ong haong mban khik iek palei oh mboh lac Ea Bar oh hu Covid 19 mai tal. Urak ini jit Covid-19 jeng daok rah tabiak khang di rilo labik, urang dalam palei jeng hu nao mai dom tỉnh gah barak, nao ngak di ban raya Hồ Chí Minh, Bình Phước, Bình Dương..., nan ye bruk pacang caga jit njauk ngak catang. Jaik 2 bilan tapa, lingiu di bruk khan brei bhap bini thau ka jit ruak, mban khik iek palei daok duah thau cambaih yaok urang di yaok sang, thau cambaih thei nao halei saong meng halei mai piah tacei pato khai báo y tế:

 "Drei lang taong abih asal kadha pathau khan di phòng y tế huyện ka dom jalan pacang caga jit Covid-19 yau: tuk tabiak jalan brei cuk khẩu trang, pandar ia pametai anek ruak; kakei mikva takik nao ravang palei Hà Giang jaik haong Trung Quốc; tuk nao ravang blaoh mai ye brei khan ka bilai y tế thau piah brei daok karei ginup 14 harei. Drei bhian ruah tuk pathau khan lagaih di abih lac di tuk dah page, tuk padeih jala pandiak atau di tuk biar harei, di dom harei car saong harei adit. Tuk pathau khan ye mikva thau, taong abih gauk jeng ngak catang tui bruk pacang caga jit ruak."

Dalam xã Cư Pui urak ini hu 2.460 sang gam haong 13.800 menuac, dalam nan hu jaik 90% lac urang bangsa Mông, Thái, Dao ... palei daok di dom tỉnh Tây Bắc yau: Hà Giang, Tuyên Quang, Điện Biên. Dom tỉnh ini hu jalan tapen negar haong Trung Quốc, labik camereip abih tamuh tabiak jit Covid-19 di dunya.  

Tui ong Nguyễn Văn Tâm - Chủ tịch UBND xã Cư Pui, piah ngak tui kadha "pacang jit yau pacang khamang", lingiu di bruk ba tangin tame di karja saong dom kapul nyaom dalam xã, ye bruk ngak di dom akaok palei yau  Sùng Minh Sơn lac biak praong, daong bruk pathau khan, tacei pato bhap bini jalan pacang caga jit hu siam lagaih.

 "Tui tài liệu tacei pato di gah Y tế, sa-ai Sùng Minh Sơn akaok palei Ea Bar hu lang tabiak sap Mông, blaoh bac tame phone tangin ngak jeng file. Patui di nan, sa-ai mek loa lưu động hu pambuak bluetooth piah peih dom file ini tal dom labik daok di mikva, piah khan brei mikva thau. Meng tuk hu bruk ini, hatai sahneng di mikva hu paglaong, tui nan patrun hu bruk njaom mbak ruak dalam bhap bini".

Tal tukvak ini, bruk pacang caga jit ruak Covi-19 di Đắk Lắk hu siam, lagaih. Hu yau nan, meng hu bruk ba tangin tame di taong abih hệ thống chính trị, di abih bol bhap rahra. Dalam nan meng jalan ngak gheih, siam lagaih yau akaok palei Sùng Minh Sơn di palei Ea Bar, xã Cư Pui, huyện Krông Bông hu daong ka bruk pacang caga jit hu peih tabiak praong, dalam, khik siam mekre, salamat ka mikva daok di dom palei, bhum bhap bini bangsa takik./.

Urang lang M.Phuong  5/4/2020

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân