Danak dak ngak kè jalan tapen kraong Cái ngan saong phun jien buh tame ngak laih 3.500 tỷ đồng lac danak dak praong hu caong lac ngak brei salih birau mbaok meta đô thị di ban Biên Hòa saong ngak jeng bruk pambuak dom jalan tame tabiak saong dom tỉnh karei. Danak dak ini hu peih ngak di tuk yaom taneh di dom labik peih taneh tagok glaong, meng 20 tal 30 trieu đồng sa met vuong, min yaom jien taneh di Karja tok sumu 70%, yau nan ye bruk bayar jien taneh piah mek taneh ngak danak dak daok suai tal 2 thun. Anak bruk nan, tỉnh Đồng Nai brei ramik veik phun jien buh tame ngak tagok tal 3.900 tỷ đồng. Jeng dreih yau nan, danak dak jalan pasak Ban Biên Hòa hu phun jien buh labaih 2.700 tỷ đồng ye urak ini hu tagok 3.100 tỷ đồng. Dom danak dak daok peih ngak jalan tathuak ia saong halang ia nerak tachrauk di ban sit Long Thành, pasiam peih praong jalan Bùi Văn Hòa (TP Biên Hòa), hồ Gia Ui 2 jeng hu tagok phun jien buh tame ngak min ngan saong yaom taneh birau, phun jien tui nan jeng tagok dom pluh tỷ đồng.

Di sa jabat pambuak bruk pablei salih taneh di Ban Biên Hòa, tỉnh Đồng Nai, urang ngak bruk di labik ini ba tabiak yaom taneh dự án di Trảng Bom kayua Công ty TNHH P.M ngak po đầu tư. Công ty daok yaih khan pabei labaih 20 lô taneh, yaok taneh praong meng 100m2 - 200m2 hu yaom meng 12,5 trieu tal 38 trieu đồng sa met vuong.  Urang yaih khan daok brei thau lac, yaom taneh ngak nong di huyen Trảng Bom kayua karja ba tabiak tagok meng 2,2 tal 3 mbang min yaom taneh di darak pasar tagok tal 10 mbang. Yaom taneh tagok ye doanh nghiệp tuk khin salih bruk pandar taneh, pah taneh, kak je, lệ phí pandar taneh njauk brei bayar jien je glaong jang dut saong dahlau diah biak ralo. Cong ty jeng oh duh hatai ralo kayua yaom pablei taneh meda pabak veik ka dom jien karei, min manuac blei njauk sahneng kuhria tani tanat saong dom po buh jien taem ngak mbuan kadun klak.

Ralo danak dak hu quy hoạch di taneh ngak nong njauk brei bayar veik taneh saong salih bruk pandar taneh min  kayua meng akok thun 2020, yaom taneh tagok ba tal rilo danak dak jhul phun jien tagok, dom po đầu tư njauk brei ramik veik phun jien buh tame ngak.  

Dalam thun 2020, tỉnh Đồng Nai brei mek veik 145 danak dak birau, taneh labaih 700 hecta, patagok taneh njauk mek veik abih tih labaih 18.000 ha piah peih ngak 1.175 danak dak. Dalam nan, hu labaih 60% danak dak di gah ngak hạ tầng kỹ thuật lac jalan mbak, labik bhap bini daok, danak dak ribaong kraong.  Ralo taneh njauk mek veik di Ban Biên Hòa saong dom huyen Long Thành, Nhơn Trạch, Vĩnh Cửu. Bruk njauk duk hatai lac yaom taneh di dom labik peih taneh tui yaom darak pasar glaong jang rilo mbang dut saong yaom taneh di karja, yau nan ye bruk mek veik taneh kan hu bhap bini njauk hatai.

Ta-eng Ban Biên Hòa hu 215 danak dak ngan saong 677 ha taneh njauk mek veik dalam thun ini. Taneh ngak sang daok praong 100m2 hu harak pandar taneh eng hu ieu pablei yaom 1,2 tỷ đồng saong glong abih lac taneh di ralo jalan dalam pasak, yaom taneh meng 60 -80 trieu dong sa m2.

 Tui dom urang ilamu gah taneh riya, kayua kan kandah meng jit Civid-19 yau nan ye yaom taneh di Đồng Nai yau dang veik, yaom taneh tok tagok di dom labik hu rilo bhap bini, khin blei piah pablei veik di TP Biên Hòa, huyện Long Thành, Nhơn Trạch pambuak dom jalan praong yau cao tốc TPHCM - Long Thành, danak dak ngak mblang kapal haok Long Thành… Akok UB bhap bini tỉnh Đồng Nai Cao Tiến Dũng brei thau: thun 2020, kuhria abih tih phun jien di karja buh tame ngak dalam tỉnh jaik 13.900 tỷ đồng, dalam nan hu labaih 6.700 tỷ đồng piah daong ka danak dak mek veik taneh, daong  bruk tái định cư mblang kapal haok Long Thành. Phun jien daok veik hu tỉnh parabha  ka yaok rituh danak dak, brei bayar dahlau ka dom danak dak praong; meyah tagok phun jien buh tame ngak hu UB bhap bini tỉnh kuhria brei sumu, pabak veik. Ub bhap bini tỉnh Đồng Nai jeng hu tacei pato karja dom palei brei pasang iek ka nyu cambaih laih saong kuhria iek veik ka njauk, ka ginup, tui nan brei kuhria mboh dahlau bruk cak rok patagok dalam 10 thun anak tal piah rami ramik veik, pabak bruk quy hoạch pandar taneh ka lagaih; palaih njiak bruk quy hoạch ralo danakdak min oh peih ngak hu, blaoh klak nao./.

 Urang lang: Aí Nghiêm - 5/11/2020

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân