Adei Đổng Trọng Nghĩa, bangsa Chăm, anek saih tal bac 5D – sang bac Tiểu học Mỹ Hương, ban sit Phan Rang Tháp Chàm, tỉnh Ninh Thuận bahrau mek hu giải nhì mbang pakacah toán trí tuệ dunya peih tabiak di Thái Lan. Ini lac mbang pakacah hu mbaok 22 negar di dunya. Dahlau di nan, adei Đổng Trọng Nghĩa mek hu rilo giải thưởng toán pakat tỉnh song pakat negar. Kadha "Menuac gheih bruk siam" adit ni, khol hulin khan kadha vak di Minh Triều, urang pambuak bruk song rayo sap ndom Viet Nam ka kreih camin anek saih Cam naih gheih ni:

Adei Đổng Trọng Nghĩa

 

  Adei Đổng Trọng Nghĩa ndih tapui thun 2009, urak ini daok bac tal 5D, sang bac Tiểu học Mỹ Hương, ban Phan Rang - Tháp Chàm, tỉnh Ninh Thuận. Meng tuk daok sit, adei brei mboh bruk naih gheih saong takre toán học. Ngak randap saong danak dak toán học trí tuệ di Ninh Thuận meng thun bac tal 2 min adei Trọng Nghĩa hadah mbaok meta lac tha dalam 6 anek saih lambaok  ka Viet Nam nao pakacah toán trí tuệ dunya birau peih tabiak pak Thái Lan saong adei mek hu giải nhì.  Adei Đổng Trọng Nghĩa, bac tal 5D - Sang bac Tiểu học Mỹ Hương, ban  Phan Rang - Tháp Chàm, Ninh Thuận khan lac: “Anek takre bac toán meng sit. Amaik ame tangi dom kadha toán ye anek ngak biak samar saong njauk…Mbang pakacah toán trí tuệ dunya ngan saong 22 taneh ia anek mek hu giải nhì. Anek biak uan tabuan, baoh sang anek jeng biak sambai.”

Thun 2017, gru akok tal bac 2D, Sang bac Tiểu học Mỹ Hương hu yar ka adei Đổng Trọng Nghĩa harak da-a di Pasak Toán Trí tuệ Superbrain Ninh Thuận piah payua ka amaik ame. Yaom lac oh ka bhian mboh min amaik ame adei Đổng Trọng Nghĩa brei anek tame Sang Uranaih tỉnh Ninh Thuận piah duah thau. Hadei di tuk pang dom anai gru di Pasak Toán Trí tuệ Superbrain Việt Nam saong Ninh Thuận langyah brei thau gam haong dom thaot binguk, amaik ame di adei Đổng Trọng Nghĩa tut angan brei ka anek tui bac ngan saong caong khin anek drei patagok taong abih gah dalam bruk bac da-a, pasram patia jalan diukrai, padhih , bruk daok dang, pamedeih tagok dom naih gheih dalam rup piah sumu dom bruk daok rah tabiak dalam raidiuk. Sa-ai Đổng Văn Dinh, ame di Đổng Trọng Nghĩa lac: Dahlau di tuk tapa Thái Lan pakacah toán trí tuệ dunya, kol dahlak hu kakei anai gru ba anek saih nao pakacah bhian khan brei thau bruk pakacah di anek. Tuk thau Đổng Trọng Nghĩa mek hu giải nhì, sang dahlak biak uan tabuan. Yau nan min, sang dahlak thau lac tapa ini piah bac megru saong dom ayut dunya. Bruk pakacah nan hu daong ka Nghĩa hu rilo ilamu bac da-a. Sa-ai Đổng Văn Dinh lac: “Tuk anek nao pakacah, baoh sang dahlak caong khin  piah hu bac saong dom ayut dunya, piah harei hadei bac da-a siam jang. Caong khin harei hadei praong tagok rik daong ka palei Cam jeng yau taneh ia Viet Nam.”

  Di Sang bac Tiểu học Mỹ Hương, langiu bruk bac naih joi mon toán, Nghĩa daok joi dom mon bac karei tra, hu mbaok tame pakacah rilo mbang kayua sang bac peih ngak. Anai gru Nguyễn Thị Thương Huyền, gru dang akok tal bac 5D - Sang bac Tiểu học Mỹ Hương, Ban Phan Rang - Tháp Chàm, tỉnh Ninh Thuận ndem ka  Đổng Trọng Nghĩa yau ini: “Đổng Trọng Nghĩa lac anek saih yau kareih camin dalam tal bac, ngak pho akaok tal bac. Lac anek saih bac naih joi rilo thun gam. Nghĩa biak takre bac mon toán. Tuk bac toán, adei hadah karah duah tabiak rilo jalan ngak toan biak thong minh. Birau ini, adei lambaok ka Viet Nam pakacah toán trí tuệ dunya pak Thái Lan, hu 20 taneh ia mai pakacah, adei mek hu giải nhì. Daok Viet Nam pang hu adei giải nhì dahlak biak sambai hatai. Nan lac bruk hadah mbaok meta oh lac ta-eng Nghĩa bo ka sa tal bac 5D, hadah mbaok meta ka maik ame, jeng yau sa sang bac Tiểu học Mỹ Hương.”

Jalan di anak daok atah saong rilo kan kandah. Caong khin lac, meng hatai takre bac mon Toán saong bruk kham merat meda daong ka adei Đổng Trọng Nghĩa bac da-a naih joi saong rilo jak jeng di harei hadei./.

Urang lang: Aí Nghiêm -6/1

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân