Ban raya HCM daok tame bilan hajan – jeng lac tuk bhian rah tabiak dom bruk yau phun kayau jaleih, klaoh talei điện. Piah khik salamat ka bhap bini, dom gah chức năng di Ban raya daok pataom tame pasang iek dom jalan talei điện piah trun biar di abih dom bala kayua điện. Kadha vak di Vinh Quang, urang vak di rayo sap ndem Viet Nam daok di Ban raya HCM hu khan brei thau ka bruk nan:

  Anak bruk langik hajan hangin yau urak ini, dom mbang jaleih gheng điện, điện tavak tame gauk tuk halei jeng oh thau. Rilo mbang bala pandik harao kayua  điện ngak ka bhap bini mboh haduh hatai tuk tabiak jalan.

Langiu di nan, yaom lac bilan hajan min bruk apui khuah sang, sang mac ngak pandap kayua chap điện di Ban raya HCM biak mbuan rah tabiak. Dalam tuk nan, rilo urang daok takik caik hatai sangka, sahaneng lac bilan hajan kan si apui khuah, patuh, doanh nghiệp jeng daok iek lap bruk padang kapol caga padam apui khuah. Bruk phun jaleih, talei điện laik njauk menuac nao jalan tuk hlei jeng lac bruk huac kanda di  bhap bini tuk tabiak jalan. Muk Huỳnh Thị Minh Thi daok di quận Tân Bình, Ban raya HCM caong khin: “Bilan hajan atau bilan pandiak hu phun druh trun, hangin khang ralo, meyah jalan talei điện hu siam ye salamat jang.”

Piah khik salamat gah điện, dom harei tapa, Tổng Công ty Điện lực Ban raya HCM hu pagam hệ thống pacang klaoh talei trung thế. Camereip bruk ini hu ngak di dom sang bac, daong khik veik talei điện tuk klaoh oh laik trun ala jalan saong prah điện, khik salamat ka bhap bini jaik taphia. Ong Võ Quốc Tuấn daok di quận Tân Bình sahaneng lac, bruk ngak nan di gah điện biak siam, rik daong takik bala rah tabiak tuk klaoh talei điện:“Dahlak mboh ngak yau nan biak siam, talei điện oh laik trun jalan jeng daok tuan angaok talei điện. Khik salamat ka anek saih saong bhap bini daok jaik taphia.”

Ong Phạm Việt Anh, Phaok Mban pathau khan, Tổng Công ty Điện lực Ban raya HCM brei thau, gah điện daok jhul khang bruk pathau khan, tacei pato bhap bini dom bruk njauk ngak piah hu salamat điện dalam bilan hajan ribuk. Langiu di nan, Điện lực Ban raya HCM daok pasang iek taong abih dom labik dhaong, ia dauk mbuan rah tabiak bala piah samar pasiam veik, pambuak saong dom sở, dom gah pagam tal bruk padang ngak dom jalan langyah samar tuk phun kayau jaleih tame dom labik hu điện: “Điện lực TP jeng hu patagok bruk pasang iek dom talei điện di dom labik mbuan duak ia di Ban raya, tuk ia ndik atau hajan dui atah saong praong. Tapa nan, brei menuac di drei hu mbaok di dom labik mbuan dauk ia piah labik hu điện, dom labik điện njauk ia dauk mbuan ba tal bala.”

Gam saong bruk parilo urang ngak bruk, pandap panda piah langyah dom kan kandah di điện kayua bala meng langik hajan. Gah điện jeng hu panuac kakei bhap bini brei padam abih điện meyah sang ia dauk tame, abih di nyu lac plaih njiak atah, khan brei ka mikva daok jaik taphia thau meyah mboh gheng điện jaleih, talei điện klaoh laik trun jalan, plaih dom bala pandik harao meda rah tabiak./.

Urang lang: Aí Nghiêm - 6/7/2020

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân