Cái Nước hu salih bahrau di sa bhum palei dahlau diah biak kan kandah 

Dom harei ini, mai tal xã Tân Hưng Đông, khaol dahlak biak tatuak drei kayua mboh hu bruk salih bahrau di sa bhum palei dahlau diah biak kan kandah di huyện Cái Nước. Dom labik daok bahrau tamuh tagok yau ngak brei ka puk palei cuk tagok rup blah ao bahrau. Mbluak di abih nan lac labik daok kiểu mẫu ribaong Láng Tượng. Gah dalam canah jalan bê tông dui atah dom talei sang padang ngak meng kiak khang kajap tamuh tagok biak rilo, rah tui nan lac dom paga phun hijao, bein bingu sambo hadah tanjak. Gah langiu jalan, lac ribaong Láng Tượng, lavik lavik hu dom sruh ghe mac pataok taphia dom mbaik tatua biak karei di gah Miền Tây. Tapa nan nyu ngak jeng sa thaik binguk bhum palei kraong aia rilo sambo màu. Hu siam mekre yau nan meng hu bruk rik daong pren yava di bap bani. Ong Nguyễn Thành Vĩnh, sa dalam dom baoh sang nao dahlau dalam bruk ngak labik daok bahrau brei thau: “Langiu jalan ye sang dahlak pala phun hijao ngak paga. Pala gam gah langiu piah pacang khik jalan mbak plaih glut jaleih. Melam mai, truac gom hadah jalan palei. Padang ngak labik daok bahrau ye sang danaok brei hacih satat, laneng lanoi, mong tame mboh mekre meta. Langiu di nan, khik ramik môi trường jeng lac piah khik caga pren yava ka drei.”

Ribaong Láng Tượng hu palih ruah piah padang labik daok bahrau di thun 2017. Piah ka bruk padang ngak labik daok bahrau hu jak jeng siam mekre, karja palei hu ba tabiak yaok jalan ngak cambaih laih ka yaok tiêu chí pagam haong bruk ngak yaok harei di yaok baoh sang. Yau bruk puh ramik jalan dhuan dalam palei hu peih ngak tapa bruk jak ba lac mblang taneh di sang halei ye sang nan puh ramik. Oh ieu puh ramik yaok harei min brei khik ka nyu tuk halei jeng hacih sa-at, siam mekre. Dom tiêu chí kan peih ngak abih nan lac bruk “truac hadah jalan palei” saong padang ngak paga min tal urak ini, jaik abih labaih 70 baoh sang dalam labik daok bahrau hu peih ngak abih. Ong Phạm Tấn Tài khan lac: “Dahlau diah oh ka jak ba ye mikva ban thei thei ngak, ka oh siam. Meng tuk ba tabiak bruk, dom paga phun hijao hacih sa-at. Biar harei mai tabiak puh ramik mboh biak bui sambai. Dahlau diah phun kayau tamuh glaong pacang abih, urak ini, oh hu dhar phun parah tabiak jalan.”

Ong Nguyễn Văn Rở, Phaok akaok UBND xã Tân Hưng Đông brei thau, meng pataom tame pathau khan nan ye mikva mboh hu bruk padang ngak labik daok bahrau oh lac tok rik daong brei ka bol bhap rahra bo rup drei jeng hu mbang tui. Dom tiêu chí mbuan ye mikva ngak dahlau, yau: ngak hareik hareim, cakak phun kayau; blaoh tal bruk pala bingu, xử lý hareik thải sinh hoạt. Tuk bruk ngak mbang kinh tế hu tagok ye mikva mek gom jalan, gom di paga piah ngak gheih mekre jang ka puk palei: “Di jalan Láng Tượng urak ini dom asal kadha bo bhap bani eng drei peih ngak dalam 19 tiêu chí padang ngak palei pala bahrau ngak hu salah blaoh. Mong iek rah tapa, di labik ini hu padang tagok tổ hợp tác, mikva daok jak gauk ngak mbang, kinh tế baoh sang cak rok patagok. Meng nan, hu pasiam veik mblang bein sang danaok, padang ngak pabah mbang jang meng bê tông. Ini lac bruk jak ba gheih dalam dua thun gam.”

Hadei di tuk pataom tame cakrok patagok, ngak brei jien mek tame di mikva tagok labaih triệu đồng sa urang sa thun, karja xã Tân Hưng Đông hu patagok pren khang di bhap bani piah padang bhum palei. Yaok baoh sang jeng thau lac dom bruk ngak di drei piah rik daong ba labik daok bahrau Láng Tượng hu jeng labik gheih mekre di puk palei. Jeng meng jak jeng siam mekre nan, karja xã Tân Hưng Đông daok pambak prong labik daok bahrau tabiak rilo puk palei karei dalam xã./.

Urang lang: Jasi – 24/09

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân