Cập nhật ngày: 5/8/2020

Di mbang taom gaok cử tri Quận 1 ndom ka bruk dom urang tame negar Việt Nam 

Page harei ini 5/8, Mentri Y tế brei thau hu gilac 2 urang ruak Covid-19 birau. Nan lac, urang ruak ka 671 lac likei, umo 33 thun, daok di xã Duy Sơn, huyện Duy Xuyên, tỉnh Quảng Nam, daok iek ruak di Sang iek ruak Đà Nẵng. Urang ruak 672 lac likei, umo 37 thun, daok di xã Đại Hiệp, huyện Đại Lộc, tỉnh Quảng Nam, iek gauk gar di Sang iek ruak Đà Nẵng. Dua urang ruak nan lac F1 njom mbak meng dom urang ruak Covid-19 dahlau di nan. Yau nan, mbiah tal urak ini, Việt Nam hu abih tih 672 urang ruak Covid-19, dalam nan hu 8 urang metai.

Viện hacih saat dịch tễ Trung ương brei thau hu dut iek kháng thể di 5.000 dalam abih tih 7.000 mẫu kháng thể hu mek di ban Đà Nẵng. Tâp nan, piah thau dom mẫu njauk njom di akaok bilan 7, sruh jit di Đà Nẵng jeng tamuh tabiak dalam vaktu ni, pataom tame di 3 sang iek ruak: C Đà Nẵng, Đa khoa Đà Nẵng, Chấn thương chỉnh hình saong phục hồi chức năng Đà Nẵng. Virus mbang ni nyu đột biến, ba tal bruk njom mbak dalam sang, njom pambak tapa gauk.

Tal urak ini, di tỉnh Khánh Hòa hu 15 dalam 48 xã bhum ceik hu tanut chuẩn palei pala birau; 99% baoh sang urang bangsa takik hu pandar điện talei negar; 94% uranaih bangsa takik umo tal thun nao bac hu bac da-a; jien duah tame kuhria rah tapa di urang bangsa takik hu labaih 14 triệu đồng yaok urang yaok thun. Dom bruk jak jeng nan hu meng rik daong oh lac takik di dom urang taha akaok palei, urang hu angan je di bhum urang bangsa takik. Urang brei patagok bruk ngak di drei pathau khan ka jalan tacei ba di Đảng, sarak di Karja tal bhap bini, abih di nyu lac dom sarak bangsa bo bhap bini hu mbang tui; tui nan jak ba mikva tame dom bruk pakacah di bhum palei.

Di mbang taom gaok cử tri Quận 1 di melam kabroi, akaok UB bhap bini ban raya HCM Nguyễn Thành Phong brei thau, ban raya lac labik hu rilo urang Lo daok, ngak mbang nan ye hu rilo gauk gar haong bhap bini Trung Quốc. Vaktu tapa, rilo chuyên gia negar langiu hu brei tame negar Việt Nam piah ngak bruk. Pagam pambak tame sarak ni, rilo urang negar langiu tame negar Việt Nam drei suan hukum. UB bhap bini ban hu pato tacei dom sở, gah, doanh nghiệp jak ba dom chuyên gia negar langiu daok ngak bruk pak ini pathau khan y tế, patakik nao mai, gam tui di nan langyah catang dom bruk tame ban raya suan hukum.      

Công an ban Thái Bình, tỉnh Thái Bình daok duah thau ngak brei cambaic laic bruk kamuan likei umo jaik sa thun ruak metai glo kayua muk pajeng ame brei menyum ia tasau hlai jru pametai tikuh. Tui duah thau tuk camereip, harei 13/7/2020, kamuan likei nan angan L.T.D.M hu ba tame Sang iek ruak Nhi T.Ư iek ruak. Di labik ini, bác sĩ duah mboh dalam mẫu dut iek di sang iek ruak uranaih hu jru mek yau nan ye khan ka gah công an. Hadei di tuk pasang iek, công an iew muk Chử Thị Mỹ Lệ, umo 51 thun, lac muk pajeng di M. Muk Lệ taduan hu dua mbang buh jru pametai tikuh tame ia tasau brei ka taco likei menyum. Hu thau, muk Lệ urak ini lac Phaok akaok khoa ndih tapui Sang iek ruak Đa khoa huyện Vũ Thư, Thái Bình. Kamuan M ruak metai glo akaok, bhian ba tame sang iek ruak.

Kuhria tal dah page ni, hu takik di nyu 73 urang metai saong labah 4.000 urang njauk rambuac dalam 2 mbang patuh di pabah lamnge Beirut, Li- băng di bier harei sup kabroi (4/5).  Nan lac mbang patuh ngak khut lahik praong abih di Li- băng kuhria meng dahlau mai. Labaih 2.750 tấn khak drak amoni nitrat hu khik dalam rilo thun di sa baoh sang kho patuh tayah, ngak magei labik pabah lamnge saong ngak ka ban ine Beirut laik tame sarau kadhau. Tổng thống Lebanon Michel Aoun ieu dom urang dalam rajaei pataom gauk ginum baai chip di harei ni saong brei thau mada tabiak bruk samar drah di Beirut dalam 2 adit.

Rajaei Ấn Độ daok brei giới nghiêm dalam dua harei ngan saong bhum taneh Kasahmir meng harei ini. Bhap bini tok brei tabiak gah langiu meyah hu harak brei nao, bhian brei nao meyah njauk cấp cứu saong bruk an ninh. Kashmir lac bhum taneh hu 7 trieu bhap bini, parabha jeng dua kayua Ấn Độ saong Pakistan khik iek, min dua taneh ia ini thei jeng taduan bruk ngak po ngan saong abih bhum taneh nan. Yaom lac hu thỏa thuận di thun 2003 brei padeih cuh, mesruh metah jeng daok rah tabiak di dom urang lin di dua gah di labik tapen negar hu neh rabha.

Klau urang lakei hu daong tabiak truh sa baoh pulao sit di Thái Bình Dương hadei di tuk vak akhan SOS biak praong angaok cuah saong hu kapul daong manuac duah mboh. Dom urang ini tabiak meng pulao Pulawat, di pulao negar Micronesia mangaok gilai meng harei 30/7. Dom urang nan kuhria nao tal pulao Pulap jeng lac di Micronesia, min, gilai abih menyek mateh dhi saong seik tame pulao Pikelot, atah di labik tabiak camriep labaih 190km. Tuk mboh akhar SOS, trực thăng daong manuac hu par trun saong ba 3 urang tame baoh taneh, dom urang nan jeng hu prien yava tani tanat./.

Urang lang: Ái Nghiêm – Thu Thảo – 05/08 10:44:23

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân