Bruk peih jalan BHYT di tỉnh ba mai rilo kein laba ka bhap bini

Meng harei 1/1/2021, kadung jien BHYT biyar taong abih yaom jien ndih iek ruak ka urang hu BHYT tuk eng drei nao iek ruak, taong ruak oh njauk labik drei tut angan iek ruak di dom labik iek ruak di tỉnh dalam negar, ngan haong dom  urang lac: urang lin, công an, urang hu buh prein ka cách mạng, urang dahlau dieh ngak bol lin, ranaih ala 6 thun, urang hu mbang tui sarak kanja yaok bilan, bangsa takik; dom urang hu paok jien daong nao iek ruak sa mbang, taong ruak bier jang labaih 15% yaom jien bilan cơ sở (labaih 224.000 đồng); urang ruak hu tukvak hu BHYT 5 thun tagok, hu jien biyar dalam thun praong jang 6 bilan jien bilan cơ sở (labaih 8 triệu 9 rituh ribau đồng); urang mbang jien bilan padeih hưu, jien daong lahik prein ngak bruk yaok bilan. Daok gauk gar di urang hu buh prein ka cách mạng nao iek ruak BHYT suan labik meda hu kadung jien BHYT biyar 95% jien ndih iek ruak. Dom urang hu thẻ BHYT daok veik nao iek ruak BHYT suan labik meda hu kadung jien BHYT biyar 80%.

Muk Nguyễn Thị Hoa, puk 4, xã Hồng Sơn, huyện Hàm Thuận Bắc brei thau: Muk hu thẻ BHYT min labik tut angan iek ruak, taong ruak camriep di bilai Y tế xã. Bahrau labaih 2 adit dahlau, piah taong ruak laka tung pruac di sang iek ruak tỉnh, muk njauk ndih iek ruak langiu tukvak. Urak ni tok ba tui harak BHYT, muk meda nao iek ruak, taong ruak di dom labik halei di sang iek tỉnh jeng hu biyar jien taong ruak njauk jalan njauk tuyến nan ye biak mbuan lagaih.

Sa mbang tra bruk iek ruak, taong ruak meng bảo hiểm y tế hu siam mekre halei oh hu ba tabiak ndom tal tuk bruk peih jalan ini meda ba tal bruk hu biak rilo urang ruak mai tal. Bác sĩ  Vũ Cao Thiện – akaok jabat Kế hoạch -Tổng hợp, sang iek ruak đa khoa tỉnh Bình Thuận brei thau: urang ruak di sang iek ruak gah ala meda tagok sang iek ruak tỉnh rilo, saong meda rahtabiak bruk urang ruak khin ba tagok ban raya Hồ Chí Minh. Kayua yau nan ye, sang iek ruak njauk patagok labik iek ruak, pandap panda bahrau, paglaong prein taong ruak piah ka urang ruak sanang hatai. Tui Bảo hiểm xã hội (BHXH ) tỉnh, kein laba meng BHYT di urang ruak nao iek ruak suan labik hu bruk karei haong nao njauk labik, nan lac: Oh hu mbang tui kein laba tuk iek ruak, taong ruak lingiu. Daok urang hu BHYT ginup 5 thun gam gam saong mbang tui tanut 80% atau 95%: Oh hu miễn gam biyar jien iek ruak, taong ruak BHYT meyah hu gam biyar jien dalam thun yam tapa 6 bilan jien bilan cơ sở; jien gam biyar di mbang iek ruak, taong ruak ni jeng oh hu iek lac bruk piah brei harak chứng nhận oh gam biyar jien dalam thun.

Meda ndom lac, bruk peih jalan BHYT di tỉnh ba mai rilo kein laba ka bhap bini, min bahrau hu pandar ka urang ruak tame ndih taong ruak. Urak ni, dom sang iek ruak di huyện dalam tỉnh jeng hu paglaong siam mekre bruk iek ruak dịch vụ saong salih bahrau jalan khik ramik piah pabak siam jang caong khin di urang ruak. Kayua yau nan ye, bhap bini njauk nao iek ruak, taong ruak di labik drei daok, abih takik jien ndo nao mai, abih takik tukvak cang, gam rik daong paglaong ilamu di dom sang iek ruak dalam tỉnh. Meyah mboh njauk ngak, sang iek ruak pak ni meda langyah ka urang ruak nao tagok sang iek ruak praong gah mangaok piah taong ruak /.

Urang lang: Thu Thảo – 20/01

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân