Kalan Bình An (xã Bình Thạnh, Tuy Phong)

Tui taong yaom di Miuyim tỉnh, Bình Thuận daok dalam bhum gah angaok Nam Trung bộ, langik pandiak bingi luac thun saong takik hu bala meng langik tasik, takik ribuk ia sua, gam haong bruk khik iek di rilo baoh kandi hu ngak siam nan ye rilo kiến trúc, urak ini jeng daok hu khik ramik. Min kayua halei bo tui thun bilan, pabah mbang kalan palei jeng daok gum sre, lingiu di kalan Bình An (xã Bình Thạnh, Tuy Phong).

Ong Nguyễn Chí Phú – Phaok Yam ndok Miuyim Bình Thuận brei thau: kan kandah praong abih urak ini lac jalan tame dom kalan palei biak sit sot, radaih du lịch di công ty tour oh tame hu. Lingiu di nan, kalan palei ndung bak bruk di yaok bhum palei nan ye oh yam tapa hu ilamu puk palei saong oh pambak praong yau baha. Ta-eng kalan Bình An (xã Bình Thạnh) daok di  labik jaik takai tasik, dalam labik dom inem krung dane angan lac lăng Ông Nam Hải, mũi La Gàn, baha Cổ Thạch, mblang patau 7 sambo màu saong jalan nao mai mbuan lagaih. Di tuk ngak adat praong dalam thun, kalan peih ngak hu dom bruk ilamu, thể thao ba menuac sia dalam palei mai jaik gauk jang. Lingiu di nan, mBan khik ramik piah iek praong bruk khik ramik kiến trúc baoh kalan saong pasiam veik dom mbaih mbaoh sit. Yaok thun jeng hu kaoh tabiak meng jien công đức piah sơn phết pacang maok, pasiam veik dom daning, pabah mbang, pala bingu saong pasiam mblang bein vil taom dar…

Gah karja palei, bruk pambuak gauk yaih khan dom labik piah mai tal hu ngak biak siam. Dalam nan sangka padang ngak dom bảng tacei jalan, jak ba bhap bini kham merat tame khik caga sron mbon, hacih sa-at alam môi trường, ndom puac daok dang siam gheih piah padang labik nao tal siam mekre, salamat, dui pachreih urang.

Kalan palei lac 1 ilamu vật thể biak hu yaom glaong di urang Việt. Meng bruk yaok klak di kalan palei nyu brei mboh bruk chreih chrai dio sajarah, di halau gha yaok menuac. Tui dom urang khik ramik ilamu palei, piah patagok yaom glaong inem krung duh ka bruk ravang iek, duah thau, ravang me-in, lingiu di sangka ngak pasiam veik kiến trúc kalan palei, kol drei njauk pasiam veik labik ilamu kalan palei, dom adat cambat hu jeng inem krung phi vật thể. Meng nan ngak brei pambuak gauk jeng dom kalan palei, labik inem krung ilamu dalam bhum piah yaih khan haong tuai damuai, rik daong patagok du lịch ilamu, tâm linh. Gam haong nan, gah pato megru njauk patagok bruk ngak lingiu khóa, mai halau gha, yaih khan sajarah, ilamu puk palei piah ka dom adei sit hu thau cambaih jang ka bruk njauk ngak di drei dalam khik ramik, yaih khan labik nao tal. Hu yau nan, kalan palei meng hu ba drei tame haong raidiuk bahrau urak ini./.

Urang lang: Jasi – 22/11

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân