Sa-ai Hùng Ky, urang ngak nong bangsa Cam daok di palei Tuấn Tú, xã An Hải, huyện Ninh Phước, tỉnh Ninh Thuận

Thun 1989, sa-ai Hùng Ky hadei di tuk bac tamat THPT, kayua sang kan kandah nan ye sa-ai oh bac tagok đại học. Blaoh khin kumei dalam palei.

Bahrau tok gauk mai, diuk pasang sa-ai Hùng Ky oh hu drap ar hagait langiu dua palak tangin saoh. Harei harei diuk pasang sa-ai nao glang limo mbang pah di Tân Mỹ (Ninh Sơn) piah duah jien diuk tapa harei. Jaik 11 thun glang limo patak pataom hu hasit jien padai, sa-ai mai veik palei blei hu labaih 2ha taneh cuah thu lagu piah pala njam patam.

Tuk camereip, sa-ai pala baoh pau, cà rốt, ratak laow, meng hu langik siam laghaih saong pablei hu yaom nan ye sang sa-ai kuac bingun ngak jalan ba aia pruh patak pataom. 

Mboh rilo mikva ngak mbang hu meng phun rabung hijao, thun 2012 sang sa-ai salih sa binah mblang taneh tapa pala phun rabung hijao saong  meng janih phun ini hu daong ka rai diuk sang sa-ai dak harei dak ginup meda. 

Sa-ai Hùng Ky brei thau: "Ngak nong piah raong anek mbang bac, patagok jien mek tame ka baoh sang ye brei tari tareng, kham merat saong khang hatai  salih janih phun pala, pandar ilamu kỹ thuật bahrau tame bruk ngak. Dahlak ndom biak ngak nong biak glaih glar, oh samar kaya meda yau pablei salih, min drei jeng ngak kaya meda hu. Bruk ngak hagait jeng brei hu tari tareng saong thau cambaih, ngak nong jeng yau nan".

Mboh hu kein laba jang yau yaom kaom saong labik pablei tani tanat meng phun rabung hijao, sa-ai Hùng Ky buh phun jien tabiak, peih prong taneh pala saong pandar ilamu pruh aia patak pataom angaok taneh cuah. 

Tal harei ini, sang sa-ai hu labaih 2ha rabung hijao ngak tui jalan yau Yuan lac “cuốn chiếu”. Rabung hijao di sang sa-ai tuk halei jeng pablei hu yaom glaong kuhria rah tabiak jaik 50.000 đồng sa kg, pablei tabiak darak pasar jaik 108 tấn sa thun. Langiu di bruk pala phun rabung hijao, sa-ai daok hu raong 20 drei limo menek.

Meng bruk pala rabung hijao saong raong limo menek, yaok thun sang sa-ai Hùng Ky jeng hu jien mek tame grap tanat. Jien mek tame meng bruk raong glang, pala phun “njam patao” hu labaih 2,9 tỷ đồng sa thun, kaoh abih phun jien buh tame daok laba hu labaih 800 triệu đồng. 

Meng sa baoh sang kan kathaot tal harei ini sa-ai Hùng Ky hu labaih jien padai, padang ngak sang danaok prtaong siam saong blei hu radaih ô tô.

Sa-ai khan lac, phun rabung hijao lac janih phun mbuan pala, laghaih haong taneh cuah, takik pandar khak vô cơ, rilo meng pandar khak van ro, takik halak halin nan ye takik khut, phun tamuh siam saong samar praong. Abih di nyu lac urang pala rabung hijao harei halei jeng paik hu.

Brei thau ka ilamu di drei, daong ka urang nong tabiak truh kathaot, sa-ai khang hatai padang Hợp tác xã Tuấn Tú. Tuk camereip, tok hu 13 urang, tal harei ini, Hợp tác xã tagok hu 63 urang, tok pala sa janih phun rabung hijao, ngan haong taneh praong labaih 35ha tui jalan  mblang hamu prong.

Dalam thun 2019, HTX pala hu labaih 51 tấn rabung, tagok 19,5 tấn dut haong thun 2018. Rabung hijao di HTX hu DN mboh tangin pambuak bruk blei veik taong abih ngan haong yaom 50.000 đồng/kg.

Thun 2020, HTX Tuấn Tú daok peih prong taneh pala rabung hijao tagok 45ha, kham merat mek hu 65 tấn, jien mek tame labaih 3,2 tỷ đồng. HTX tuk halei jeng tacei pato urang dalam HTX palih ruah dom pajaih siam, hu năng suất.

Piah paglaong yaom rabung hijao, urak ini HTX Tuấn Tú jhul pakhang bruk pala rabung hijao tui tanut VietGAP. Taphia di nan, hu jalan peih prong taneh pala rabung hijao tui tanut hữu cơ.

Hợp tác xã palaa rabung hijao oh pandar jru khik caga phun pala, khik kajap dom tiêu chí ka chất lượng, siam mekre kaya mbang piah ba rabung hijao tame dom siêu thị, nhà hàng, patagok jien mek tame ka dom urang dalam  HTX.

Meng bruk pala rabung hijao hữu cơ pandar ilamu pruh aia patak pataok angaok mblang taneh cuah, sa-ai hu Kapul urang nong tỉnh Ninh Thuận saong UBND tỉnh Ninh Thuận pok meyaom saong taong yaom biak glaong. 

Sang sa-ai Hùng Ky biak hadah mbaok meta tuk hu Thủ tướng Raja-ei Nguyễn Xuân Phúc; ong Trần Quốc Vượng-Ủy viên Bộ Chính trị, Thường trực Ban Bí thư; amuk Đặng Thị Ngọc Thịnh, Ủy viên Trung ương Đảng, Phaok akaok negar;… saong rilo urang pal akaok dom mBan, Bộ, ngành Trung ương saong puk palei mai rivang, pachreih ba./.

Urang lang: Jasi – 01/11

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân