Meng tuk hu jalan bruk pajeng ba kaya nong jeng mbuan laghaih 

Jalan Kênh Lộ Ngang meng Kênh 79, huyện Tân Hưng, tỉnh Long An tal kênh Dương Văn Dương, huyện Tháp Mười, tỉnh Đồng Tháp. Dahlau diah jalan Kênh Lộ Ngang sit sot, prong oh ka tal 2m saong lac jalan haluk, langik pandiak ye dhul mul, daok langik hajan ye gluh baok janal. Bruk nao mai di bhap bani gaok biak rilo kan kandah. Bilan hajan, anek saih daok rah tui jalan ini bhian janal labuh, gaok tuk mai daok rah tabiak bala. Tuk karja huyện Tân Hưng, tỉnh Long An kuhria peih prong jalan ini, ong Nguyễn Văn Thơi sa urang daok di xã Vĩnh Đại, huyện Tân Hưng ba akaok nao dahlau halar hatian brei jaik 1,1ha taneh di sang drei piah peih prong jalan. Mblang taneh ong alin hadiah hu yaom glaong, daok ngak padai saong pala phun mbang baoh nan ye rilo manuac dalam sang oh njauk hatai. Ong jak ba, langyah brei ka manuac sia dalam sang thau bruk mbuan lagaih ka sang drei, ka mikva dalam palei drei tuk hu jalan. Puac abih ye manuac sia dalam sang ong Thơi jeng bui sambai, njauk hatai rik daong brei taneh ka karja ngak jalan: “Mesruh metak tapa blaoh 4 pluh dom thun min biak di nyu nao halei jeng nao meng ghe, atau nao kabak bo jalan ye oh hu tatua. Di bhum taneh aia ndik ini bo oh hu tatua ye nao mai biak kan kandah. Nan ye tuk hu Đảng saong Karja jak ba ye drei halar hatian ba akaok nao dahlau. Drei kham merat alin brei taneh piah hu jalan. Oh lac tok hu ka bhap bani bo tuk hu jalan  sang drei nao mai pajeng ba kaya nong jeng mbuan laghaih jang”.                      

  Kadha njauk bui sambai lac tuk hu Karja jak ba peih prong jalan Kênh Lộ Ngang, rilo sang karei jeng yau sang ong Thơi, abih hatai pachreih tui. Dom sang ong Nguyễn Văn Bô, amuk Nguyễn Thị Hương Lan, ong Đặng Văn Châu Sa… jeng halar hatian alin hadiah meng 0,4 tal labaih 0,8ha taneh di sang drei. Bruk alin brei taneh ngak jalan Kênh Lộ Ngang pambak prong tabiak grauk labik.

Ong Đào Hồng Ẩn, sa urang daok di ấp Vĩnh Hưng, xã Vĩnh Đại, huyện Tân Hưng khan lac, jeng thau taneh lac panyin lisei, lac blah ao di drei min thau hu kein laba suai lavik nan ye mikva urang nong abih hatai alin brei taneh bo oh caong khin karja ba-yar brei jien padai: “Ngak jalan ye urang hu kein laba jeng lac mikva drei, kayua yau nan ye mikva biak njauk hatai ngak tui jalan ba di Đảng saong Karja. Di ta-eng xã Vĩnh Đại khaol dahlak hu urang alin brei tal sa ha taneh piah ngak jalan”

Dalam jaik 9km jalan nao tapa xã Vĩnh Đại, bhap bani halar hatian alin brei abih tih labaih 6ha taneh piah piah ka jalan hu praong jang, tapak jang. 

Tal urak ini, jalan Kênh Lộ Ngang atah labaih 11km, mbaok jalan praong 5,5m, tuk camereip hu tuh patau blaoh, pambuak xã Vĩnh Đại haong rilo xã karei di huyện Tân Hưng saong pambuak huyện Tân Hưng haong huyện Tháp Mười di tỉnh Đồng Tháp. Angaok jalan ini jeng hu ngak blaoh dua mbaik tatua bê tông cốt thép, radaih pajeng pandap trak 13 tấn nao tapa hu. Jalan ini daok pambuak haong dom jalan di Long An saong Tiền Giang, piah meda nao mai meng bhum tapen negar Tân Hưng mai bal Mỹ Tho, tỉnh Tiền Giang bo oh daok nao tapa jalan roya 62, pakatut jang jaik sa meteh tukvak. Urak ini anek kamuan urang nong dalam bhum meda juak radaih nao tal sang bac, radaih pajeng pandap meda tame tal palei, tal sang piah duah blei kaya nong. Ong Trần Văn Chánh, Bí thư Chi bộ, Trưởng ấp Vĩnh Bửu, xã Vĩnh Đại, huyện Tân Hưng, tỉnh Long An brei thau: “Dom jalan ngak di Đảng, Karja ka pambuak bruk ngak mbang kinh tế, cak rok patagok bruk ngak nong, tuk huyện trun ndom biai jak ba mikva puk palei thei jeng pachreih tui. Tuk peih ngak jalan ye biak samar drah, oh tavak tave hagait, tuk hu jalan prong mikva dlam palei ngak mbang hu thei jeng bui sambai”.

Dalam saman taneh riya hu yaom yau ameh di urak ini, oh takik baoh sang kayua meblah gauk taneh riya, gaok mai tok mariak gauk hasit taneh di tapen paga blaoh lahik nao talei rohim adei sa-ai, puk paga. Bruk halar hatian alin brei taneh, rik daong pren yava peih prong jalan mbak nao mai di bhap bani xã Vĩnh Đại, huyện Tân Hưng, tỉnh Long An biak njauk pok meyaom. Kadha nan daok brei mboh bruk njauk hatai saong kham merat di bhap bani ba tangin tame haong karja palei padang ngak palei pala bahrau./.

Urang lang: Jasi – 24/11

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân