Tukvak tapa, yaom lac dom pabah mbang negar jeng kreik abih, rilo bilai pasang iek hu padang tagok piah patrun bruk njom mbak di jit ruak Covid-19, min bruk pablei salih pandap pakauk oh hu adat brei pablei salih jeng daok rah tabiak di jalan tapen negar dalam tỉnh An Giang. Kayua yau nan ye, gam haong bruk pataom tame pacang caga jit ruak Covid-19, dom gah chức năng daok glaih glar haong bruk pacang caga bruk pablei salih pandap pakauk oh brei pablei salih ini

Pacang caga bruk pablei salih pandap pakauk, pajeng ba pandap suan hukum tapa jalan tapen negar

An Giang hu jaik 100km jalan tapen negar haong 2 tỉnh Kandal saong Takeo (negar Campuchia) ngan saong rilo jalan praong, sit, rilo kraong, ribaong...nao mai di 2 gah meng jalan radaih gam jalan kraong, nan ye bruk pablei salih pandap pakauk tapa jalan tapen negar bhain rah tabiak srau kadau saong mbuan hu rilo kanjah jhak kan si caga hu.

Phó Cục trưởng iek gah Cục khik ramik darak pasar, Phó akaok mban tacei jalan 389 tỉnh Huỳnh Ngọc Hồ brei thau, meng akaok thun tal ini, bruk pablei salih pandap pakauk, pajeng ba pandap suan hukum tapa jalan tapen negar jeng daok rah tabiak min sit jang, takik jang, dom bruk cap mek hu rilo meng lac sit sot.

Hu yau nan meng hu dom gah chức năng, karja palei ngak catang bruk tui iek menuac, pandap panda nao mai tapa negar piah pacang caga bruk njom mbak jit ruak Covid-19 nan ye trun hu biak rilo bruk pablei salih suan adat hukum nan. Min kayua urang caong blei rilo, yaom kaom biar – glaong jang gauk biak rilo nan ye jeng daok hu bruk pajeng pakao hala saong saradang tapa negar meng rilo jalan ngak.

Pandap panda hu ba mai pataom jaik jalan tapen negar gah Campuchia meng angaok thu tal angaok kraong, tuk mboh lagaih ye kol pablei salih nan mek ghaiy jamriak, radaih môtô atau pah menuac cakaong, naong piah pajeng sit sot tapa negar meng dom jalan sit, jalan praong, baoh kraong di 2 negar, mblang hamu jaik taphia negar. Hadei di nan, samar pataom veik blaoh ba tagok radaih patuh 2 kong, radaih ôtô pajeng pandap saong hu gam radaih pajeng tuai ba tame dalam taneh ia piah pablei. Tukvak kol nyu ngak bruk lac meng kreh melam joa piah plaih bruk pasang iek di gah chức năng. Tuk drei mboh, kol nyu nduac plaih rup,  klaak veik  radaih, klaak veik pandap pakauk.

Ta-eng 4 bilan akaok thun 2020, dom gah chức năng hu pasang iek, mboh hu 694 bruk pablei salih, pajeng ba pandap pakauk, pandap oh hu adat brei pablei salih. Abih tih yaom pandap mek khik lac labaih 19 tỷ đồng, abih tih jien mek tame meng taong phat saong pablei pandap cap mek lac jaik 3 tỷ meteh. Dalam nan, dom janih pandap pakauk nan jeng rilo meng lac pakao hala, saradang, khẩu trang, gel rao tangin thu, ia yamen, mbia, khan ao, mỹ phẩm, pandap pandar dalam sang...

Piah ngak siam bruk pacang caga pablei salih pandap pakauk, pandap oh hu adat brei pablei salih tapa jalan tapen negar di tỉnh, Phó Chủ tịch UB bhap bini tỉnh An Giang, akaok mBan tacei jalan 389 tỉnh Lê Văn Nưng ieu mBan tacei jalan 389 dom puk palei hu jalan tapen negar, brei bruk cambaih laih ka dom gah chức năng patagok bruk khik iek catang di dom jalan tapen negar, bhum palei mbuan hu bruk pablei salih nan. Meyah mboh khang, brei padang dom bilai pacang cakak di dom labik pandiak saong pataom tame ngak catang piah palahik, piah oh tamuh tabiak dom labik pandiak, dom jalan talei pablei salih pandap pakauk dalam labik drei khik iek.

Gam haong nan, dom kapul di Bộ đội Biên phòng tỉnh, Cục Hải quan, Công an saong Cục khik ramik darak pasar lingiu di bruk praong urak ini lac pacang caga jit ruak Covid-19 tui tacei pato di Rajaei, Tỉnh ủy saong UB bhap bini tỉnh An Giang, njauk patagok parilo kapul khik iek catang jalan tapen negar, caik hatai sangka tal dom jalan praong, sit, kraong, ribaong di dua negar... Meng nan pacang cakak bruk tame, tabiak negar oh njuak adat hukum, pajeng ba pandap panda suan adat hukum tapa negar; oh brei hu dom labik pataom pandap, labik caik pandap pakauk di bhum tapen negar.

Taphia bruk caga daong, pambuak haong mBan tacei jalan 389 dom puk palei bhum taphia negar hu nao tui iek, khik pacang di dom jalan mbuan hu cakaong, naong, pajeng ba suan hukum pandap panda tapa negar piah samar langyah. Saong daok hu jalan caga palai tayah kol pablei salih pandap pakauk, dom labik pataom pandap pakauk, pandap oh siam, pandap ja pambuak tal bruk caong blei pandar di bhap bini, oh caik ka bruk pablei salih yau nan rah tabiak srau kadau dalam tỉnh An Giang./.

Urang lang: Musa-25/5 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân