Meng labik lagaih lac hu jalan tapen negar atah, hu rilo cửa khẩu pabah mbang dunya, negar saong pabah mbang phụ, gam haong gruak labik dalam taneh aia, dom puk palei dalam bhum Taneran kraong CL… hu rilo pren khang piah cakrok patagok bruk ngak mbang kinh tế tapen negar saong peih prong talei pambuak bruk pablei salih haong darak pasar Campuchia. Dalam nan, bhum taneh ini hu 4/13 tỉnh, bal hu jalan tapen negar haong Campuchia nan lac Long An, Đồng Tháp, An Giang saong Kiên Giang ngan haong rilo pren khang pambuak bruk patagok rilo gah, abih di nyu nan lac pambuak bruk jhul patagok bruk pablei salih, buh jien tame ngak mbang saong cakrok patagok bruk ngak nong, du lịch, công nghệ thông tin. Kadha vak ndom tal bruk ini di Thanh Tùng – daok di bhum ĐBSCL:

 

 

An Giang nan lac sa dalam dom tỉnh daok dalam bhum hu rilo bruk ngak mbang pablei salih tapa jalan tapen negar haong Campuchia. Meng dom baoh pabah mbang dunya, pabah mbang praong parabha gruak abih 100 km jalan kabak haong jalan aia gam haong 2 pabah mbang dunya Tịnh Biên saong Vĩnh Xương, 2 pabah mbang negar nan lac Khánh Bình saong Vĩnh Hội Đông gam haong rilo pabah mbang phụ, jalan tiểu ngạch… piah daong ka bruk ngak mbang pablei salih di 2 gah hu rilo mbuan laghaih. Dalam nan mbluak di abih lac bruk khik ramik, peih ngak Nyaom darak Pablei salih dunya Tịnh Biên meng thun 2007 tal ini hu daong jhul patagok bruk ngak mbang kinh tế jalan tapen negar di 3 tỉnh jaik taphia tapen negar lac: An Giang-Takeo-Kandal. Nyaom darak pablei salih  Dunya Tịnh Biên – An Giang thun 2019 pachreih hu jaik 18 ribau mbang tuai damuai mai meng negar Campuchia…

Ong Lê Minh Điển, Tham tán đầu tư Đại sứ quán Việt Nam di Campuchia brei thau, kuhria tal puac thun bloh, Việt Nam hu labaih 200 dự án buh jien tame ngak mbang di Campuchia dalam gah ngak nong, jien padai, gilang pariak, ngak glai. Taong abih phun jien buh tame ngak mbang tagok labaih 3 tỷ USD, ba Việt Nam ndih tame dalam top 10 negar hu phun jien buh tame ngak mbang tapak taneh aia langiu rilo di abih pak Campuchia. Dom dự án rik daong langyah bruk ngak ka labaih 25.000 urang ngak pak nan. Dom dự án di Việt Nam buh jien tame ngak mbang di Campuchia gruak abih dom gah saong peih prong di 25 tỉnh thành. Hu mboh rilo abih jeng lac gah ngak nong ngan haong jaik 50% phun jien tut angan di Việt Nam. Dahlak biak sangka tal pren khang di gah ngak nong di bhum taneh ini. Ini lac pren khang di Bhum taneh taneran kraong CL. Khaol dahlak jeng caong khin dom tỉnh duah thau saong buh jien tame ngak mbang di Campuchia, abih di nyu lac pala phun mbang baoh. Urak ini bruk pala phun mbang baoh di Campuchia oh pabak hu bruk pablei tabiak negar langiu.

Tui amuk Sok Channda, Phaok akaok klup kapul Doanh nghiệp Việt Nam pak Campuchia (VBCC) urak ini dalam klup kapul hu labaih 200 doanh nghiệp Việt Nam daok buh jien tame ngak mbang, pablei salih di Campuchia. Sa dalam dom jalan ngak bahrau piah ka dom doanh nghiệp Việt Nam buh jien tame ngak mbang, peih prong tapa darak pasar ini nan lac bruk taom gaok haong dom urang blei pandar mai meng Trung Quốc. Dom thun jaik di ini, dom công ty Trung Quốc buh jien tame ngak mbang di Campuchia dak harei dak rilo, gam haong nan lac sa binah prong urang ngak Trung Quốc tapa ini. Kayua yau nan ye, bruk ba pandap panda tapa Campuchia piah pablei ka dom ghing mbang di urang Trung Quốc nan jeng lac sa dalam dom jalan ngak mbang ka doanh nghiệp Việt Nam, abih di nyu lac bhum taneran kraong CL caong khin peih prong darak pasar pak ini. Ndom ka pandap panda that diuk ye drei meriak guak biak siam. Pak ini hu dom labik hu rilo urang ngak ngan haong rilo ghing mbang kapul nyaom. Dom doanh nghiệp di dom tỉnh di Việt Nam meda pabak pandap mbang that diuk, oh njuak  lac tapa trung gian.  

Daok ong Oknha Leng Rithy, Tổng Giám đốc Công ty Rithy Granith di Campuchia, Cố vấn VBCC brei thau urak ini, taneh riya di Campuchia daok biak rilo. Kayua yau nan ye, dom doanh nghiệp Việt Nam, abih di nyu lac bhum taneren kraong CL meda tapa pah taneh piah peih prong bruk ngak mbang ngan haong dom bruk ngak yau: pala drak, raong limo, ngak nong cong nghệ glaong… Bruk ngak mbang pablei salih, pambuak bruk pak ini hu 2 bruk njuak caik hatai. Pandap panda pablei salih nao mai ye hu mboh yaok harei, siam paje. Kayua yau nan ye, urak ini pren khang di Cần Thơ saong dom tỉnh njuak pataom tame bruk pablei salih pandap mbang menyu, nhà hàng. Njuak hu sa nhà hàng prong, pandap mbang diViệt Nam; taphia di nan lac bruk pablei salih kaya ikan dalam aia, abih di nyu lac hadang. Manuac urang blei pandar di Campuchia biak prong. Raong glang saong ngak tabiak nan lac pren khang di bhum taneran kraong CL. Dalam tuk nan Campuchia urak ini taneh riya jeng daok rilo, môi trường jeng daok biak siam.

Bhum taneran kraong CL saong dom puk palei, doanh nghiệp di Negar Campuchia daok hu biak rilo pren khang piah cakrok patagok rilo gah yau: pablei salih, buh jien tame ngak saong patagok du lịch, công nghệ thông tin v.v.. dalam tukvak anak tal, piah patui veik pambuak pagam doanh nghiệp bhum taneran kraong CL haong doanh nghiệp Campuchia, ong Nguyễn Phương Lam, Akaok Duk pablei salih saong ngak kong Việt Nam dhal di Cần Thơ (VCCI Cần Thơ) brei thau: Gah bo khaol dahlak saneng lac hu bruk pambuak guak siam abih di doanh nghiệp 2 negar jeng yau dom puk palei nan lac gah công nghệ, abih di nyu lac ICT. Urak ini VCCI Cần Thơ hu 1 klup kapul dom doanh nghiệp dalam gah ini. Gah ngak nong nan lac labik pandar công nghệ siam abih. Dalam 2 thun tapa khaol dahlak taduan raok rilo kapul nyaom di Nhật, binah prong mboh dom urang ini daok sangka rilo ka công nghệ dalam gah ini. Dom urang ini sangka bruk ba công nghệ pandar tame bruk ngak nong. Urak ini bhum taneran kraong CL hu rilo doanh nghiệp pandar công nghệ biak siam, meda pambuak bruk haong guak hu.

Dom bruk buh jien tame ngak mbang, pablei salih di doanh nghiệp Việt Nam rilo thun tapa hu Raja-ei Campuchia taong yaom glaong; rik daong biak rilo tame bruk an sinh xã hội saong bruk cakrok patagok di taneh aia ini. Ini lac bruk ngak prong rik daong patagok talei rohim nao mai, pambuak bruk ngak mbang pablei salih saong buh jien tame ngak; jhul patagok kinh tế Việt Nam dalam tukvak mbeik drei yam tame saong cak rok patagok; ngak brei cakrok patagok bruk ngak mbang pablei salih nao mai di 2 negar, rik daong grap tanat KT-XH bhum tapen negar gah Tây Nam./.

 

HỆ PAPAR SAP BANGSA VOV4 BHUM BAN RAYA HCM

Labik daok: 75 Trần Nhân Tôn, Phường 9, Quận 5, TP.Hồ Chí Minh
Yam ndok : Trần Văn Thao
Phaok yam ndok: Cao Thị Thoa, Trần Xuân Thân