Bruk pacang caga jit ruak Covid-19 di Việt Nam daok hu dunya taong yaom glaong tuk urang njauk ruak tok hu dom rituh urang, oh ka hu urang ruak halei metai saong labaih 1 bilan tapa oh ka mboh urang ruak njaom mbak dalam bol bhap rah ra. Dalam tuk nan di rilo taneh aia, jit ruak mbang ka dua daok tamuh gilac veik, yaom lac dahlau di nan pacang cakak hu jit ruak njaom mbak. Yau nan, jit ruak mbang ka dua meda tamuh tabiak dalam negar drei halei oh tuk jit ruak jeng daok njaom tame meng gah langiu saong bruk patakik brei manuac sia tame negar drei oh dui atah miat hu?

Mek mẫu dut iek ruak Covid-19

Bruk patakik brei manuac sia tame negar drei, tok hu dom urang biak caong khin meng hu brei adat mai atau mai veik Việt Nam min njauk brei daok karei 14 harei. Ini hu mong yau jalan ngak “beik ar” pacang cakak, pasang iek jit ruak Covid-19 njaom mbak tame negar drei. Ndom yau Thứ trưởng thường trực Mentri Y tế Nguyễn Thanh Long ye Việt Nam daok pasang iek catang “gah langiu” piah meda ngak brei cadu “gah dalam” piah peih ngak hu dua bruk haong gauk, lac gam pacang cakak jit ruak hu siam mekre gam cak rok patagok bruk ngak mbang kinh tế: “Khaol dahlak jeng daok brei ngak dom jalan pacang cakak njaom mbak meng gah langiu. Dalam nan hu gam dom mbang par hu urang  ngoại giao công vụ, atau urang Việt Nam jeng hu brei daok karei saong brei mek mẫu dut iek 2 mbang. Mbang ka sa tuk tame labik daok karei, mbang ka dua nan lac tuk nao tabiak truh labik brei daok karei…”

Yaom lac yau nan, bruk mbuan njaom mbak Covid-19 dalam bhap bani urak ini jeng oh ka abih. Kayua lac negar drei hu jalan tapen negar atah haong dom negar jaik taphia, rilo jalan nao prong sit, kan si pasang iek hu abih. Yau bruk urang  likei umo 39 thun meng Campuchia mai Tây Ninh min oh thei mboh, hu brei daok karei chip saong hu jeng urang ruak ka 315 meng blaoh nan lac sa kadha pagap yau nan. Ong Trần Đắc Phu, cố vấn di Pasak pabak samar drah kadha y tế công cộng Việt Nam brei thau, tuk urang ruak hu duah mboh samar drah, brei daok karei, pacang labik, meda oh tamuh jeng tabung jit. Jit ruak meda lac dom ngah apui sit saong padam hu abih oh caik ka nyu jeng dom mbang khuah prong. Yau nan min, meyah jalan par dunya hu peih veik ye meda hu mbang ka dua di jit ruak Covid-19 dreih yau di Singapore. “Bruk njauk huac di abih nan lac jit ruak tamuh khang dalam bol bhap rah ra ngan haong manuac urang njauk ruak biak rilo, ngak brei bak ganik dalam dom sang iek ruak, bo khaol drei bhian ndom lac talah gah y tế, talah gah iek ruak…  ”

Việt Nam daok tui iek catang jit ruak dalam taneh aia saong angaok dunya piah kuhria caga peih veik jalan par dunya saong ramik veik ka nyu njauk haong bruk di anak meta. Bruk ini daok khik siam ka jalan ngak “beik ar” pacang cakak jit ruak hu siam mekre. Yau nan min, dom urang ilamu gah y tế dalam saong langiu negar kuhria mboh lac, jit ruak Covid-19 dalam tukvak anak tal oh meda kuhria tui bilan bo meda dui atah dalam rilo thun. Dalam tuk nan, hu tal 60% urang njauk ruak ini gilac oh hu triệu chứng. Kayua yau nan ye, yaom lac hu taong yaom glaong dom jak jeng siam mekre dalam bruk pacang caga Covid-19 di negar drei min ong Kidong Park, Akaok urang lambaok Gah Y tế dunya di Việt Nam ndom lac, kan plaih hu mbang ka 2 di jit ruak. “Dom jak jeng dalam pacang caga Covid-19 di Việt Nam dalam tukvak tapa biak njauk pok meyaom min nan bahrau lac dom jak jeng di anak meta. Việt Nam yaom lac salamat haong jit ruak min daok dalam bhum pasak jit di dunya, mbuan hu dom urang ruak dalam bol bhap rah ra. Nan ye tuk halei jeng njauk caik hatai sangka, tui iek catang jit ruak, abih di nyu nan lac tuk dom negar karei daok pacang caga biak glaih glar haong Covid-19 yau urak ini”

Jit ruak SARS di thun 2002, njaom tame Việt Nam thun 2003 min hadei di nan par lahik angaok dunya, min ngan haong Covid -19, tui kuhria meda daok veik suai lavik, gaok mai hu mboh yaok thun yau ruak cúm. Kayua yau nan ye, dom negar angaok dunya hu kuhria tal bruk taduan “raok” jit njaom mbak dalam pasang iek hu tal tuk oh daok njaom mbak dalam bol bhap rah ra. Yau nan min, urak ini jeng daok rilo kadha bo dom urang ilamu oh ka thau cambaih tal jit ruak ini. Virus ba tal ruak Covid-19 hu daok veik dalam rup pabhap yau HIV halei oh? Oh ka hu panuac javap jalei cambaih laih nan ye jalan ngak hu ndom di angaok nan lac oh ka siam. Dalam tuk daok cang vaccine ngak iek hu jak jeng angaok dunya ye bruk caga pacang “mbang ka dua di jit ruak” meda rah tabiak, lac bruk njauk ngak di negar drei urak ini./.

Urang lang: Jasi-27/5

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân