Di mbang ndem biai nao mai, urang dang akaok tỉnh rivang prein yava saong raidiuk di bhap bini

Hadei di 15 thun daok dalam huac kanda kayua blei sang meng harak tangin, ye urak ini 8 sang di tổ 23, khu phố Đông Tân, phường Dĩ An, ban sit Dĩ An, tỉnh Bình Dương hu sahnang hatai kayua hu brei harak chứng nhận quyền pandar taneh. Ini jeng lac bruk tabiak meng mbang ndom biai nao mai di karja ban sit haong rahra. Ong Trần Tuấn Kiệt, akaok khu phố Đông Tân brei thau, brei langyah, brei sổ bhong hu daong ka rahra jia tame bruk pan akaok di Đảng, di dom pakat karja: “Urang sahneng lac oh tuk halei taduan hu sổ bhong, tal urak hu taduan hu. Caong khin urang dang akaok patui jalan lang talaih kan kandah ka dom labik daok di bhap bini oh ka hu brei sổ, kham merat brei ka mikva hu sổ piah hu quyền lợi yau urang karei”.

Ndom biai tapak haong rahra hu Bình Dương ngak meng rilo thun ini mai. Min piah ka bruk ini hu siam lagaih, thun 2018, Tỉnh ủy Bình Dương tabiak Sarak ka 10 “Ka bruk ndom biai tapak di urang dang akaok pakat ủy Đảng, urang dang akaok karja haong bol bhap rahra”. Tui nan, Tỉnh ủy Bình Dương ieu dom labik peih bruk ndom biai nao mai, hadei di 10 harei brei hu panuac langyah atau pok tagok pakat angaok jalan langyah bruk rahra sangka. Meng hu yau nan, rilo bruk di bol bhap rahra hu langyah samar drah. 

Pagap yau di phường Bình Hoà, ban sit Thuận An, tỉnh Bình Dương, tukvak tapa, hu dom kol jhak pagam pambak tame labik daok jaik quận Thủ Đức di TPHCM piah ngak bruk suan hukum, ba tal srau kadau puk palei. Hadei di mbang ndom biai nao mai, urang pan akaok tỉnh Bình Dương hu tacei brei gah công an tame bruk, khang hatai ngak brei palahik labik ba tal srau kadau puk palei. Ong Vũ Đức Mạnh, daok di phường Bình Hòa caong khik ramik saong patagok bruk ndom biai nao mai: “Caong hu rilo mbang ndom biai nao mai haong urang pan akaok meng pakat tỉnh, ban sit trun tal phường, xã, puk palei piah ka rahra hu lagaih brei thau. Meng nan, rahra hu ndom tagok dom bruk daok tavak tavaiy”

Urang pan akaok tỉnh Bình Dương brei thau, bruk ngak di urang dang akaok pakat ủy dalam ndom biai nao mai jeng hu ngak tui Sarak 11 patabiak thun 2019 di mBan Chấp hành Trung ương ka bruk ngak di urang dang akaok pakat uỷ dalam taom gaok, ndom biai tapak haong rahra saong langyah dom panuac brei thau, dom bruk caong khin di rahra. Urang pan akaok njauk ba tabiak langyah, pasang iek bruk ngak di drei meyah caik rah tabiak bruk pacadu dalam pan akaok, ba jalan, tacei pato, pachreih ba, tui iek bruk ndom biai nao mai, langyah dom panuac brei thau, dom caong khin, dom tố cáo di rahra.

Ndom biai nao mai lac jalan siam lagaih piah langyah dom suh sah, huac kanda di rahra, di doanh nghiệp, patrun hu bruk khiếu nại, tố cáo tapa pakat, saong tapa nan daok patagok hu quyền ngak po di rahra, palagaih ka rahra hu mbaok tame dak padang Đảng, karja. Ong Phạm Văn Bảy, Phaok akaok UBND ban sit Dĩ An brei thau, ini lac labik hu rilo menuac abih di tỉnh Bình Dương, gaok rilo kan kandah ka patagok kinh tế xã hội, dom bruk tamuh tabiak dalam raidiuk... Piah ka ban sit cakrok abih gah, lingiu bruk kham merat di dom pakat karja, brei hu bruk njauk hatai, pachreih tui di bol bhap rahra. Kayua yau nan ye, ndom biai nao mai lac jalan siam lagaih piah karja ba sarak tal rahra saong jeng lac labik piah ka rahra “daong jalan” dak padang puk palei. Ong Phạm Văn Bảy lac: “Tapa ndom biai nao mai hu daong ka dom urang pan akak ban sit thau hu hatai caong di rahra, ba brei njauk gauk, pachreih tui, rik daong dui pachreih dom prein khang ka bruk cakrok di Dĩ An dalam tukvak anak tal.

Tui ong Võ Văn Minh- Chủ tịch HĐ bhap bini tỉnh Bình Dương, ndom biai nao mai lac jalan siam lagaih piah thau hu hatai caong di rahra, patagok dân chủ dalam dak padang Đảng, karja: “Tapa dom mbang ndom biai nao mai hu bruk njauk hatai, pachreih tui, pok meyaom di rahra. Rahra sua tangi biak dalam, dom bruk nan jeng hu javap jalei biak dalam, daong lang talaih kan kandah, tavak tavaiy di puk palei)

“Mbuan yau habar oh hu rahra oh ngak hu, kan yau habar hu rahra ye ngak hu abih” – hu bruk daong prein, pachreih tui saong hatai jia di rahra ye oh hu bruk hagait bo oh ngak hu. Nan ye caik hatai pang rahra menyai, menyai veik haong rahra saong gam haong rahra ngak, meda lac jalan piah ka urang pan akaok tỉnh Bình Dương tacei ba bruk ngak hu siam lagaih, daong ka Bình Dương cakrok khang kajap dom gah dalam raidiuk, dalam bruk ngak mbang, ngak huak./.

Urang lang: Thu Thảo – 04/12

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân