Meng tuk Mentri Ilamo – Padhih saong rivang me-in ba tabiak danak dak “Urang Việt Nam nao rivang ma-in dalam Việt Nam”, piah pachreih bruk nao rivang ma-in dalam negar hadei di jit prong Covid -19, dom baoh panuac “trun yaom”, “pachreih blei” gam haong dom tour, combo rivang dalam megar hu dom doanh nghiệp ngak mbang gah ba menuac nao ravang me-in pakacah gauk meyaih khan tal tuai damuai. Taphia dom danak dak dui pachreih, yaom lap, anak meta mboh lac, jeng daok hu dom doanh nghiệp pachreih tuai damuai tui jalan cakak meneng dom dịch vụ atau dịch vụ oh ka siam.

Rija roya bhian pachreih urang mai rivang ma-in 

  “Khách sạn 4 patuk saong khan siuk sambo màu bu hatung” atau “Caik jamriak la-an 18 độ bo dalam bilik jeng daok pandiak patuh aia huac” nan lac dom panuac khan brei mboh bruk oh njauk hatai di sa kapul nyaom tuai damuai hadei di mbang nao rivang ma-in pak Quảng Ninh, hu ba tagok blah Facebook di sa urang nao dalam kapul nyaom nan. Jeng pak Quảng Ninh, akaok bilan 6 meng blaoh, gilai Hải Anh 10 QN-6018 ba tuai damuai nao rivang iek vịnh Hạ Long brei tagok yaom biak glaong dut haong harak pambuak bruk hu mboh tangin blaoh dahlau di nan. Hadei di tuk nao pasang iek, Cảng vụ jalan aia dalam negar di tỉnh Quảng Ninh oh brei adat nao tabiak truh pabah lamnge ngan haong gilai du lịch di doanh nghiệp ini dalam 90 harei.

  Urak ini gah rivang ma-in jeng daok dang anak rilo kan kandah, tavak tave, kayua yau nan ye, biak caong khin hu bruk nao gam di Karja haong doanh nghiệp lữ hành, meng dom bruk ngak biak biai yau trun yaom harak vé di labik nao rivang. Meyah tok hu doanh nghiệp trun yaom, daok dom labik nao rivang iek jeng daok khik tamo yaom klak ye oh samu gauk. Ong Đinh Ngọc Đức, Akaok Vụ Darak pasar Du lịch - Tổng cục Du lịch ndom lac: Khaol drei oh tame bruk ka nyu samu gauk, tok bal thei thei ngak. Jalan ngak di dom urang nan meda lac katut panak vaktu saong tagok yaom, min tuk taong abih tame bruk haong gauk, sa hatung hatai haong gauk pasiam veik bruk rivang ma-in dalam negar saong dui atah ye khaol dahlak mboh lac dom urang nan meda klaak tapa dom kein laba katut panak vaktu piah ba mai chất lượng saong trải nghiệm ka tuai damuai. Lavik nao meda ba mai rilo kein laba suai lavik saong bruk pasiam veik du lịch dalam negar di khaol drei meng hu jak jeng.

Daok gah labik ndih daok, ong Nguyễn Văn Dũng, urang dang akaok gah ngak mbang Khách sạn Malibu Vũng Tàu brei thau, tuk peih talei pambuak bruk du lịch di dom tỉnh, bal ye caong khin ngak ka nyu cambai labik dang di dom puk palei. Piah hu tame jalan siam lagaih meng tuk pambuak bruk dui pachreih ini, dom labik ndih daok jeng njauk kham merat patagok chất lượng duh ka tuai damuai: Tuai damuai urak ini roh duah, caong khin rilo jang ka bruk padeih padei. Kayua yau nan ye, dom labik rivang ma-in, ndih daok saong padeih padei njauk pasiam veik bruk pamere, dom dịch vụ siam lagaih njauk parilo jang piah ngak brei ka tuai damuai bui hatai, njauk haong jien ndo buh tabiak.

Piah hu dom danak danak yaom lap, yaom trun min bruk duh pamere oh trun atau khik tamo yaom saong tagok yaom glaong di tour, dom doanh nghiệp lữ hành, gah kapal haok, ndih daok saong puk palei njauk pambuak bruk haong gauk ka nyu siam, gaok mai klaak nao kein laba di drei, hu panuac sanya cambaih piah pachreih bhap bani nao rivang ma-in, tapa nan rik daong ba gah du lịch samar drah pasiam veik. Tui amuk Nguyễn Thị Thanh Hương – Phaok akaok Tổng Cục Du lịch, ngan haong dom doanh nghiệp ngak mbang oh siam, oh tapak hatai, dom puk palei saong saong jabat khik iek njauk tame bruk pasang iek saong taong phat tui adat hukum: Gah jabat khik iek karja ye khaol dahlak patagok dom bruk pasang iek. Yaih khan yau habar ye pablei yau nan. Pak ini dom adat hukum hu brei thau cambaih laih paje, pagap yau Hukum yaih khan, hukum pablei salih  hu dom paka brei thau cambaih ka yaom kaom, yaih khan njauk haong bruk, haong pandap nda juai meyaih khan suan. Dom jabat khik iek karja njauk pasang iek duah thau piah ngak yau habar khik hu chất lượng jeng yau quyền lợi di tuai damuai rivang ma-in.

Piah ka dom mbang nao rivang ma-in ba mai ka tuai damuai kadha bui sambai, dom doanh nghiệp saong công ty dịch vụ lữ hành njauk pamaong tal bruk padang hatai jia saong bruk njauk hatai di tuai damuai tagok dang akaok. Taphia di nan, tuai damuai jeng lac “urang blei pandar naih gheih”, dut iek saong sahneng kuhria cambaih laih tuk palih ruah dom tour nao rivang ma-in piah hu dom harei padeih padei bui sambai, chreih chrai./.

Urang lang: Jasi-9/7

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân