Dalam tukvak jit COVID-19 rah tabiak khang, Bhum taneran kraong Cuu Long hu mong yau labik siam mekre kayua oh hu urang halei njaom mbak ruak dalam bol bhap rah ra. Kayua yau nan ye, Hiệp hội Du lịch Việt Nam hu palih ruah bhum taneran kraong Cuu Long lac labik siam mekre, hu rilo pren khang gah rivang ma-in piah peih mbaok ka danak dak pachreih nao rivang ma-in dalam taneh aia.

Urang nao rivang iek angaok gilai 

Piah pasiam veik bruk nao rivang ma-in, Cần Thơ padang danak dak dui pachreih ngan haong jalan ngak praong nan lac samar pasiam veik bruk nao rivang ma-in dalam taneh aia. Tui ong Đặng Tấn Hùng, akaok Hiệp hội Du lịch bal Cần Thơ: dom doanh nghiệp du lịch njauk padang dom janih pandap dui pachreih bahrau, biak karei, hu yaom lap saong khuyến mại dom dịch vụ du lịch duh ka tuai damuai hu mbaok tame bruk pachreih caong khin tui jalan ngak: khik siam mekre ka tuai damuai, trun yaom min oh trun chất lượng dịch vụ, khik tamo yaom min patagok bruk duh ka tuai damuai: Dalam tuk peih ngak, dom doanh nghiệp khaol drei njauk caik hatai tal dom bruk pacang caga jit ruak ka tuai damuai, urang ngak saong bhap bani puk palei. Labik nao rivang ma-in di khaol drei brei khik hu hacih sa-at, siam gheih; taphia di nan, kham merat padang dom pandap dịch vụ du lịch bahrau, paglaong ilamu dalam bruk duh - pamere tuai damuai.

An Giang nan lac tỉnh hu pren khang gah du lịch tâm linh, bhian di nyu yaok thun hu meng 8-9 triệu mbang tuai damuai, min jit ruak Covid-19 jeng daok ngak kan kandah tal bruk rivang ma-in di tỉnh dalam tukvak biak atah. Ong Nguyễn Khánh Hiệp, Akaok Sở Ilamo - padhih saong rivang ma-in An Giang brei thau: Sở ilamo – padhih saong rivang ma-in padang 5 nyaom bruk ngak jhul patagok pasiam bruk nao rivang ma-in, khik siam bruk pacang caga jit ruak Covid-19 dalam tukvak bahrau, nan lac: daong ka doanh nghiệp; pathau khan, meyaih khan; pachreih caong khin nao rivang ma-in; peih ngak dom bruk ilamo – padhih meng kan; khik iek chất lượng dịch vụ; pambuak bruk haong dom sở, ngành, puk palei, doanh nghiệp... pato pathram manuac urang ngak: Dahlau diah lac meyaih khan praong rilo labik, urak ini khaol dahlak salih bahrau tui jalan lac; peih ngak hu labik cambaih laih. Patui jalan roh duah darak pasar, duah thau hatai sahneng di tuai damuai ngan haong yaok labik rivang ma-in. Jhul khang bruk peih dom bruk pablei salih, pachreih nao rivang ma-in tui tukvak tui định kỳ. Pambuak haong dom kapul nyaom di bhum taneran kraong CL piah padang dom tour katut panak harei, tour atah harei.

Di Đồng Tháp, piah pachreih bhap bani saong tuai damuai mai rivang ma-in di dom labik inem mek, labik rivang ma-in dalam tỉnh ini, tỉnh hu peih ngak Danak dak pachreih bruk rivang ma-in ngan haong kadha “Urang Việt Nam nao rivang ma-in dalam Việt Nam”, Danak dak pachreih bruk nao rivang ma-in hu peih ngak meng harei 1/6 tal abih thun ini.

Tui ong Ngô Quang Tuyên, Phaok akaok Sở Ilamo – padhih saong rivang ma-in tỉnh Đồng Tháp: Gah rivang ma-in tỉnh meda patagok bruk pambuak gauk, patagok bruk meyaih khan dom danak dak ưu đãi; ba tabiak bruk pachreih tui di dom doanh nghiệp ngak mbang gah du lịch, lữ hành, pajeng ba, ndih daok, blei pandar piah paglaong bruk duh – pamere tuai damuai: Pambuak tỉnh Đồng Tháp haong dom labik rivang ma-in bhum taneran kraong Cuu Long saong bal raya Hồ Chí Minh, khaol dahlak pambuak Đồng Tháp haong dom tỉnh, abih di nyu lac dom tour meng bal raya Hồ Chí Minh trun Đồng Tháp, blaoh tapa An Giang saong Kiên Giang. Jang yau meng Tiền Giang, meng Cần Thơ, Vĩnh Long saong nao tapa Đồng Tháp, ye khaol dahlak pataom tame dom bruk ni.

Meng pren khang rilo saong labik mai siam mekre hu Hiệp hội rivang ma-in Việt Nam palih ruah, du lịch bhum taneran kraong Cuu Long meda cakrok patagok hadei di tukvak atah gaok kan kandah kayua jit Covid-19. Yau nan min, piah dui tagok gah rivang ma-in, dom puk palei dalam bhum oh njauk lac tok pambak tame pren khang, bo njauk peih ngak ka nyu samu gauk rilo jalan ngak karei.

  Nan lac dom jalan ngak yau habar, daa mikva saong taong abih gauk pang kadha vak ka 2 “salih bahrau janih pandap rivang ma-in – dak padang labik mai siam mekre”./.

Urang lang: Jasi-29/6

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân