Jalan bingu Tết thun sak kubao 2021

Harei pataom jalan tapuk Tết thun sak kubao 2021 hu peih tabiak meng mon 6 melam 9-2 tal mon 10 melam 15-2 (lac meng harei 28 bilan Mat tal harei 4 bingun Tết). Thun ini, bruk nan hu angan ieu lac “Ilamu pambuak pagam harei hadei” rah tabiak di angaok 3 jalan lac: Mạc Thị Bưởi (labik meng Đồng Khởi tal Nguyễn Huệ), jalan Nguyễn Huệ (labik meng Mạc Thị Bưởi tal Ngô Đức Kế), saong jalan Ngô Đức Kế (labik meng Đồng Khởi tal Nguyễn Huệ)

Lambaok mBan peih ngak Jalan tapuk Tết thun sak kubao 2021 brei thau, yaok jalan di Jalan tapuk tết hu 1 asal kadha karei. Tui nan, jalan Nguyễn Huệ hu asal kadha lac “Gilang ilamu di menuac sia dunya”. Gam haong bruk parang tabiak, yaih khan tapuk gheih tal urang puac tapuk, harei pataom Jalan tapuk Tết thun sak kubao 2021 hu peih parang iek rup thaot,, harak gar, tui dom asal kadha lac: Parang iek harak gar, rup thaot, dom panuac ndom hu rilo menuac thau tal di dom urang hu angan je saong di Chủ tịch Hồ Chí Minh ka ilamu puac tapuk tapa dom kiến trúc hu angan di TPHCM; parang iek báo xuân thun 2021; parang iek pandap, tapuk, harak gar, rup thaot pathau khan ka tasik pulao Việt Nam ngan saong kadha “Việt Nam – Maong iek meng tasik” saong dom pandap hu angan di bruk pakacah “quyền ngak po tasik pulao oh thei meblah mek hu”; tapuk, harak gar pathau khan ka bruk padang ban Thủ Đức; parang iek mô hình toa tàu di jalan pasei TPHCM - Metro ka 1: Bến Thành - Suối Tiên.

Jalan Ngô Đức Kế hu angan ieu lac “Nao me-in dunya haong tapuk”. Di angaok jalan ini, rahra haong tuai damuai hu ravang iek labik tapuk brei ka uraniah ngan saong dom tapuk gheih, hu makna, hu pilih ruah saong yaih khan, labik me-in brei ka uraniah ngan saong dom bruk bui sambai, chreih chrai, kein lagaih, yau: cih rup cih, ngak thủ công, pakacah puac dalikan, pakacah vak brei thau hatai sahneng ka tapuk… Labik me-in công nghệ thực tế ảo VR (Virtual Reality) lac labik piah ka dom uraniah hu thau ka tapuk tapa labik thực tế ảo bui sambai chreih chrai. 

Jalan Mạc Thị Bưởi ngan saong kadha “Ilamu pambuak pagam harei hadei” lac labik parang tabiak saong yaih khan dom tapuk gheih, kein lagaih ngan saong rilo janih, rilo asal kadha. Lingiu di nan, pak ini daok hu parang tabiak saong yaih khan dom tapuk ka doanh nhân, ka bruk padang mbang ngui, tapuk yaih khan ka cách mạng công nghiệp 4.0 saong bruk chuyển đổi số…

  Harei pataom tapuk Tết thun sak kubao 2021 hu mbaok di dom gah lac: TTX Việt Nam, mBan Khik ramik jalan pasei đô thị, NXB Tổng hợp TPHCM, NXB Văn hóa - Văn nghệ, Gilang tapuk Khoa học tổng hợp TPHCM, Cty Fahasa...

Ong Nguyễn Đông Hòa, Phaok TGĐ Tổng Cty Du lịch Sài Gòn, Phaok akaok mBan peih ngak jalan bingu Tết thun sak kubao 2021 brei thau, thun ini, urang dang akaok TPHCM brei pilih ruah kadha “TPHCM - Văn minh - Hiện đại - Nghĩa tình”, piah brei mboh hatai caong, kham merat ngak ka pahu Sarak di Nyaom roya Đảng bộ TPHCM. Athur mek patuah di jalan bingu thun ini lac drei kubao. Drei kubao hu ngak praong, dom nghệ nhân kuhri kuhria tani tanat piah ngak hu drei kubao tui caong khin. Di Cty TNHH Sản xuất Mỹ thuật Văn Tòng (daok di phường Thạnh Lộc, quận 12), drei kubao thun sak kubao, dom uraniah gilang kubao gheih mekre, mbaik pei nung, ahar chưng hijao mekre meta... daok hu ngak jaik blaoh.

Dalam 60 drei kubao daok hu dom menuac di nghệ nhân Văn Tòng ngak, drei kubao sit di abih nyu atah 1m saong glaong 80cm, drei kubao praong di abih atah 4m, gklaong 2,3m, hu ngak meng jaik 10 khối mút xốp pambuak pagam veik, angaok mbaok hu rilo tal hala craih tauk tagok gauk, daong ngak brei ka nyu gam khang kajap. Lingiu di nan, daok hu dom drei kubao hu pagam jamriak, megei hu kaok haong iku, biak gheih mekre.

Jalan bingu Tết thun sak kubao 2021 hu peih pabah mbang duh ka tuai damuai meng maong 7 melam 9-2 tal mon 9 melam 15-2-2021 (lac meng melam 28 bian Mat tal melam 4 bingun Tết)./.

Urang lang: M. Phương – 23/01

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân